Hitler Nih Zuksuaimi Euro 391,000 In An Zuar

Nazi haotu, Adolf Hitler nih zuk a rak suaitakmi pawl tiah theih a simi cu kan hnuzarh a luancia Zarhte ahkhan Germany ram Nuremberg ah lilamnak tuah a si i, a zuksuai 14 hna cu euro 391,000 in an zuar khawh.

Hi atu Hitler nih Watercolour Painting le a zuksuaimi pawl hna hi kum 1904-1922 karlak hrawngah Germany ram Nazy Party pawl nawlngeihnak an rak tlaih lio chan ahkhan a suaimi a si tiah theihhngalh a si. A zuksuai zuarmi chungah a man fakhleimi cu Bavaria i, Neuschwanstein Castle zuk a suaimi a si i, hihi China mi pakhat nih euro 100,000 in a cawk.

Hitler nih a suaimi zuk dangdang pawl hna hi caan zeimaw zat chung cu zapi hmuh khawh loin rak thuhnawh an si hna i, a zuksuai chungah Nazi symbol a um lomi paoh cu Germany ram zongah zuarnak nawl onh a rak si. Pangpar zuk a suaimi cu euro 73,000 in zuar a si ve. #