 |
| Donald Trump |
US President avoi 45-nak caah Republican Party candidate Donald Trump cu thim a si cang. Kum 70 upa, Donald Trump nih Democratic Party candidate Hillary Clinton a hun tei ruangmang tikah, US rampi Democratic Party nih kum riat chung ro an relnak cu a hun chimh hngithnget cang lai. Anih hi President aa chuh hlan ahhin ramkhel lei he pehtlai in nehnang a ngei lomi a si.
Donald Trump nih electoral college vote 530 chungin vot 270 a hmuh, tlinnak hrangah vot hmuh herh zat cu 270 a si i, a hleihluat in vot 6 hmu in a teinak a co. Trump hi; President term khatnak rianṭuan dingin a tlingmi vialte chungah a upa bik a si; public office ah sinak zeihmanh a ngei/tlai bal lomi le US military
ralkap a si lomi president hmasa bik ding a si.
US president thar hi hmai kum January ni 20 ahkhin baibal nenh in biakamnak he phungning te rianṭuan dingah fehter a si lai i, kum li chung term khat tiang a ṭuan lai. Hi rual ṭhiam in hin vice president candidate, Indiana governor Mike Pence zong a rian fehternak tuah a si ve lai. Mike Pence hi kum 58 a si i, a thaisung Karen he fa pathum an ngei. Pence hi Khrihfa ṭha a si, Evangelical Christian a si i, kum 13 chung congress member a tuan cangmi a si.
President caah thim a hun si hnu, Hilton Hotel, New York City ah amah ṭanhtu pawl hmai biachimnak ah, Trump nih America mizapi caah President a si lai nak kong a chim. Hillary Clinton zong nih a ka lawmhpi hringhran ve tiah a chim. Clinton nih ram le miphun caah rian a rak ṭuannak vialte ka philh lo, a cungah lunglawmhnak biachim ding tampi ka ngei ko a ti. Trump nih America rampi an hliamkhuaimi hma vialte damter caan a cu cang a ti lengah, Republican le Democrats an dihlak lungrual tein an ṭuanṭi a herhnak zong a chim. Cuti ṭanrualnak le lungrual i ṭuanṭinak in rampi cu dirkamh ṭhan in, America mizapi ruahchannak hun tharchuah ṭhan a si kho lai tiah a chim.
A Voikhatnak Vote A Tlak Tam Bik Tan
Tutan US president thimnak ah vote thlami hi 15% cu president election i vote an thlak avoi khatnak ah a si. Kum 2012 thimnak lioah khan avoi khatnak ahkhan vote a thla zat hi 9% an si. I thimnak ni, November 8 hlan deuh ah state tam-u ah vote rak thlak chung khawh sihmanhseh law, vote thlak ni caah tiah chiah in vote a thlami hi 13% an rak um i, kum 2012 ah 9% nakin a hun kai deuh ngaite ti a lang. Candidate pahnih hna, Hillary Clinton le Donald Trump zong nih hin November 8 ah vote an thlak ve.
November 8 hlanvak i, vote thlakmi, early voting ah hin vote million 42 a tla i, kum 2012 lio vote million 32.3 rak thlakmi cu a khuhchilh dimdiam.
Mizapi Nih Sunhsak Tuk Theng Lo Candidate
Tukum US President thimnak ah party candidate pahnih hna hi President candidate a simi chungah lawmh a hlawhlo le uar a hlawh lo bik an si. Vote thlak vakhlan deuh ah Fox News nih mizapi ruahnak lak, result a hun chuah tikah voter chungah 61% nih Hillary Clinton cu a ṭha an ti lo i, 56% nih Donald Trump a ṭha an ti ve fawn lo.
Donald Trump:
Donald John Trump hi kum 1946, June ni 14 ah Jamaica Estates, Queens ah a rak chuakmi a si i, unau panga lakah ngakchia bik changtu a si. Kum 13 ati ah New York Military Academy ah sianginn a kai i, kum 1968 ah University of Pennsylvania ah Wharton School in economic ah Bachelor Degree a ngei. Kum 1971 ah a pa chawlehhrolnak, Fred Trump’s real estate and Construction firm a rak zohkhenh i, a hnuah The Trump Organization tiah a rak thlen.
Trump hi nupi pahnih a ṭhen cangmi a si, atu a nupi pathumnak Slovene model Melania Knauss henhin kum 2005, January 22 ahkhan an rak i ṭhium. A nupi pathum lakah hin fa panga a nei i, tu pariat a ngei hmu cangmi a si.
Mi chawletthal lian a si lengah television producer a si i, film le television series tehna zongah a lang ve lengmang ṭheomi a si. Reality TV series, The Aprrentic cu kum 2004-2015 chungah khan a produce lengah amah nih a rak host-mi a si i, Miss USA pageant zong kum 1996-2015 chung kha a rak tuahto i, amah zong aa rak i langh lengmang ve tawn. Fobres magazine nih tukum mirum min cazin an chuah tikah, Donald Trump hi vawlei pumpi ah 324nak ti a si i, US ramchung ah hin 156-nak a si.
Ramkhel politics leiah aa teltum bal lo, asinain kum 2015 June thla ahkhan, US President thimnak dingah Republican party candidate aa cuh ding kong a rak chimphuan. Party candidate primary election tuahnak ah a cawlcanghning a hun hlawhtlin tuk ruangah tukum May thla ahkhan candidate cuh aa timmi midang pawl vialte hna cu an rak i zukpiak dih i, July thla ah Republican National Convention ah khan Party official candidate caah phungtling in thanh a rak si.
Trump Nih Riandomh Aa Timhning
Donald Trump nih hin a campaign tuahnak ah a aukhuan biknak bia le hla cu ‘Make America Great Again’ ti hi a hmanmi a si i, hihi president ah thim a si ahcun hlawhtlin ding hrimhrim zong mizapi a kamhmi hna kha a si.
America president candidate pawl nih hin Oval Office ah term an hman chungah hin an rianṭuan dingmi kha an timhlamh cia ṭheo tawn. Natein, Trump nih cun midang pawl nakin roling a sinak langhter tim in, President office zung a ṭhut ni thok in ni 100 chungah a rianṭuan ding vialte ahlankan in a timhcia khitkhet hna.
Thla hmasa Gettyburg i biachimnak ah, Trump nihcun a President nikhatnak in America mizapi cu rianṭuan ding ka tuahpiak dih colh hna lai tiah a chim. Cun Sml. 24 chungah President in a tum cang dingmi Barack Obama nehnang vialte rehvial in ka hnawh thlu lai i, America rampi caah biatak thlak in rianṭuan ka domh colh lai tiah a chim.
US ram chungah phungning loin a peem lutmi le criminal record neimi vialte cu an ram ah tlunter an si khawhnak dingah biatak tein rian ka ṭuan lai tiah a ti. Culeng ah ramchung hmun himlonak deuh timi ahcun ramdang in a rak peem lutmi ṭhialkaam a khap ding kong zong a chim rih.
Mexico ram in a rak peem lutmi pawl nih US ah sualnak phunphun an tuah lengmang ruangah, President a hun si ahcun Mexico letin an iramrinak kham a timhnak kong zong a chim rih, asinan hihi zeiti kalpi a timh belte fiang in a langhter lem lo. Eihmuarnak um lo dingin biatak thlak in hmalak zong aa timh kong a chim hnu, mizapi nih thimmi acozah a si bangin mizapi caah acozah fel le ṭhami dirh asi lai tiah bia a tiamkamh hna.
Trump nihhin President a si tikah NATO ram dang, tukdoh a tongmi cungah venhimnak pek aa timh thlu hna lonak zong a chim hnu, an rianṭuanning phunglam he pehtlai in cu kalning phunglam a zulmi lawnglawng America nih bawmh le ṭanpi a si cang lai a ti. Iraq leti’n nuclear agreement an tuahmi a leet ding kong tehna lengah, Islamic State ralhrang pawl cihmih khitkhet ding ti zong a rak kamh hna.
Donald Trump nih President Barack Obama nih a rak fehter cangmi remnak le biahren pawl ka hrawh lai ka leet dih lai ti zong kha a rak i tiamkam i, hihi a rian hmasa bik asi ding kong zong a chim. Obama signature policy, health insurence scheme Obamacare cu ṭheh hrawh dih i, Health Savings Accounts system hmangin thlen aa timh kong a chim. Hihi state kip sinah chawlehthalnak nawlngeihnak sang deuh a pek dingmi cu a si.
Donald Trump Entertainment Vawlei Cawlcanghnak Hnuhmai
Ronald Reagan zong kha lemcangtu (actor) a si i, Arnold zong kha California governor a si kho ve ti kan hmuh i, Clint Eastwood zong mayor a si kho. Tikah, Entertainment vawleipi ah min a rak ngei len cangmi Donald Trump, tutan president i a hun tlin hi thilmak le khuaruahhar len awk a si theng lem lo.
Trump te hi unau panga chuak an si i, an upa bik hi zu ruangah kum 1981 ahkhan a nunnak a rak liam i, mah hi a upa thihmi nih Trump cu zu ding lo le, kuak zu loin a nun a thlen phah. A pa sin in real estate lei ah pawcawmnak hngeh le ṭha a rak ngei cia cangmi a si i, amah Donald Trump zong college a dih hnuah a pa kuttang ah rian a rak ṭuan.
Kum 23 a ti in show business leiah chawlehthal hram a bunh, natein a hlawhtling theng lo. Kum 1973 in khan Trump Organization ah president a hun si. Kum 1999 ah a pa a thih ahkhan a pa nih an unau a rohtakmi ngeihchiah rumzat, USD million 250 in 300 karlak hrawng a ti. Hi a pa nih a rohmi hna hi an unau rual in an i phawzaam cio hna. Real estate lengah hin golf course lei zongah rian a ṭuan rih i, hmun kadang kenkip ah golf course a tuah.
Kum 23 a ti in show business leiah chawlehthal hram a bunh, natein a hlawhtling theng lo. Kum 1973 in khan Trump Organization ah president a hun si. Kum 1999 ah a pa a thih ahkhan a pa nih an unau a rohtakmi ngeihchiah rumzat, USD million 250 in 300 karlak hrawng a ti. Hi a pa nih a rohmi hna hi an unau rual in an i phawzaam cio hna. Real estate lengah hin golf course lei zongah rian a ṭuan rih i, hmun kadang kenkip ah golf course a tuah.
Kum 1996 in khan Miss Universe, Miss USA le Miss Teen USA ah a ngeitu sinak ngeih hram aa thawk i, kum 2015, Septermber 11 in khan a dihlak tein a kut ah a hum khawh dih. Kum 2003 in khan NBC hen reality show hlawhtling cukmak, The Apprentice a kalpi i, amah kha executive producer a si lengah a host-tu a si.
Hi show thlak a si hramthok in khan episode pakhat in USD sing nga a rak hlawh i, a hun hlawhtlin chin lengmang hnu lebang cun episode kip in USD million 1 lengmang aa hlawh. Nikum july thla ahkhan NBC Universeal nih hi show i episode 14-nak caah USD million 213 renglo phaisa an pek.
Hi show thlak a si hramthok in khan episode pakhat in USD sing nga a rak hlawh i, a hun hlawhtlin chin lengmang hnu lebang cun episode kip in USD million 1 lengmang aa hlawh. Nikum july thla ahkhan NBC Universeal nih hi show i episode 14-nak caah USD million 213 renglo phaisa an pek.
Kum 2007 ahkhan The Apprentice ruangah hin Hollywood Walk of Fame ah star a rak hmuh. Tukum February thla ahkhan The Apprentice ah host ṭhan dingah an chimhchawnh natein president cuh a duh ruangah an sawmnak cu a rak hnon hna.
TV show ah lawng hlah, film pangai zongah a tel len rih i, cu a langhnak film langsar pawl cu Home Alone 2: Lost in New York tehna, The Little Rascals tehna Zoolander tehna, Wall Street: Money Never Sleep tehna ah a si. Kum 1999 in khan modelling industry ah chawlehthal hrambunh invest a thawk i, modelling company, Trump Model Management a dirh.
Wrestling vawlei zongah hnuhmai tehton a ngeimi a si rih, World Wrestling Entertainment fan a si i, WWE ngeitu, Vince McMahon leti’n zong hawikomṭha ngai an si. Wrestle Mania 23 ahkhan Trump hi a lang ve i, Vince McMahon lu an rak konghpiak khah! Wrestling lei hi a rak huamsazawng a si ve hrimhrim a si lai, Stone Cold nih helaw tiah hnuhmai ah a rak rehdih lenmi zong a si. Atu cun president a hung si cang lai sikaw, Stone Cold caah cun, “Kan president hi heh tiah ka hnuhreh lenmi a si hi,” tiin a duh cun a chim khawh hnga teh! Kum 2013 ahkhan WWE Hall of Fame ah a rak khumh vemi a si.
Aa Pum Khawmmi Le Vunraang Pawl Nih Trump An Duh Deuh
 |
| Donald Triump & Hillary Clinton |
US President thimnak ah Republican party candidate, Donald Trump nih a tling dingah zumh deuh a simi, Democratic party candidate Hillary Clinton cu a hun tei tikah, vawleipi khuaruah a harter dih.
Chawletthal lianngan le mirum vantawng, Trump hi ramkhel ah hnuhmai tehton a ngei lo i, nikum June thla Republic party president candidate cuh aa timh ding a phuan hnu thok ceo khan ramkhel lei hi a hun virhkhoih a si. Hi lioah hin Hillary Clinton cu President hlun Bill Clinton thaisung hlun a si lengah, US Secretary of State zong a tuah cangmi a si rih hoi, ramkhel le politics cawlcanghnak ah tehton a ngei ṭha deuhmi kha a si.
Trump nih hin a campaign tuahnak ah a bia le hla cu America ram le a ram mizapile, khrihfa biaknak venhimnak ding a aupi bikmi a si i, an ram himnak le mizapi dirhmun a derthawmtertu tiah a ruahmi paoh cu thianh le hrawh dih ding aa timhmi pawl cungah soisel a tong ngaingai, nu kong he pehtlai in biaka ṭhalo thurhnawmmi a chimmi pawl cu, amah a zuamcawhtu nih amah lila dohnak ah heh tiah an hman ti zong hmuh khawh a si.
Exit Poll data:
Edison Research in exit poll dangdang a tuahnak result in a langhning dan in cun Trump hi America ram vunraang tam deuh le khrihfa aa pumkhawmmi nih an vote bik ti a si.
-America ramah hin vunraang milurel hi a tlakniam ning rang ngai ko ti hmanh hna seh, phun lian bik an si i, Trump nih teinak a hmuh khawhnak thazaang tungpi zong a si. Vunrang a ummi chungah 58% nih Trump hi President caah an vot i, 37% nih Clinton an thim.
-African-American lakah Clinton a cawlcanghning maksapi a ti, minak vote 88% a hmuh lioah Trump nih 8% lawng a hmuh phah. President in aa din chom ding Barack Obama nih hin President term hnihnak aa cuh ahkhan minak vote hi 95% le 93% a rak hmuh phah a si.
- Donald Trump nih an ramchung mi peem satlai cungah dinhdorhnak ngei loin rianṭuan aa timh kong a chim ruangah hlawt a tong ngaite, hi nih hin mipeem satlai vote tiang in a thih. Clinton nih Latino vote 65% lengkai a huai phahnak ah a cang.
- Nupawl a tam-u nih Hillary Clinton vote an pek, nu 54% Clinton an duh deuh lioah, Trump a vote tu hi 43% an ti ve. Nu kongkau he pehtlai in Trump nih hin biaka thurhnawm le ṭhalo hmangin chim lenko hmanhseh, vawleipi zumhnak nakin Trump nih hin nupawl sinin vote a hmuhning maksapi a ti. Hi lioah hin mizapi lakah Trump a duhtu hi an tam deuh fawn.
- Khrifami, biakinn ah aa pumkhawm deuh mipawl nih Trump an ṭanh ning maksapi a ti ve. Zarhkhat ah voikhat naktam biakinn a panh tawnmi hna sinin Trump nih vote 56% lengkai a ruh i, Clinton nih 40% a ruh ve. Hilio caan ahhin pumhkhawmh zong aa pumkhawm bal lomi 62% lengkai nih Clinton hi an duh deuh i, Trump duhtu hi 31% an ti ve. Evangelical Krihfa lakah Trump hi amak a kai tuk hoi, 81% vote a hmuh phah.
 |
| Mike Pence & Donald Trump |
US Vice-President Ding Mike Pence
Hmaikum January 20 i Donald Trump, president 45-nak fehter a si rual in, a vice president nominee, Indiana Governor Mike Pence zong US Vice President ah fehter a si chih ve colh lai.
Vice President-elect Mike Pence hi kum 57 mi a si i, a nupi Karen henhin fa pathum an ngei. Khrifa ṭha, ka hrinṭhan bak aa timi a si i, nau hrawh khawhnak phung le ngeih ngeikhat ṭhiumnak phung a dohtu a si. kum 2000 in khan Congress member ah rak thim a si i, kum 2013 ah Indiana Governor ah thim a rak si i, hihi hlan ahhin Righ-wing radio host a rak ṭuan bal.
Politics leiah tehton ngeihṭha ngai a si tikah hin acozah iṭhithruainak leikip ah Trump thazaang ṭhawntertu le ai hngatnak biapi taktak a si kho lai tiah ruahchannak ngeih cio a si.
Mike Pence hi Irish Catholic chungkhar ah a ṭhangmi a si i, college a kal lioah Jesuh ah hrinthannak a rak ngei cangmi a si. Kum 1990 hnulei in khan Grace Evangelical Church ah member tling an si.
Israel a ṭanh taktak mipa a si i, ka biaknak he aa pehtlaimi a si ruangah Israel ram cu ka hnakkar ah tenh lo le ṭanh loin ka um kho lo tiah a chim ṭheo tawn. Nikum December thla ahkhan Republican Jewish Coalition conference ah biachimnak a rak ngei i, “Israel ral pawl cu kan ral an si i, Israel buainak cu kan buainak a si. Hihi vawleipi nih a hngalh lo a si ahcun atu in hngalh cang seh, America hi Israel caah a dir zungzal lai” a ti.
Nikum ṭhiam ahkhan Pence nih hin Indiana state i ‘Religious Freedom Restoration Act’ tuahmi cu a hnatlak hnuah, hi phung tangah hin chawlethrol le pumpak mibing mizeipaoh, an biaknak lawhlo ruangah midang nih chawlehhrolnak an tuahpi duhlo a si zongah, hrem khawh an si lo.
Pence nih cun, “Biaknak zalonnak zeirel lo lei hoih in bill ser/tuah cu ka hnathla kho lai lo i, an biaknak ruangah fahnak pek le hremnak pek lungput an ngeih ding ka duh lo” a ti. Sina’n hi bill hi chawlethrol lian, phu dangdang le minthang pawl nih fak ngai in an rak doh khenkham tikah, Indiana state boycott tiang tuah an timh ruangah caan zeimaw hnuah remh ṭhan a si.
Pence nih cun, “Biaknak zalonnak zeirel lo lei hoih in bill ser/tuah cu ka hnathla kho lai lo i, an biaknak ruangah fahnak pek le hremnak pek lungput an ngeih ding ka duh lo” a ti. Sina’n hi bill hi chawlethrol lian, phu dangdang le minthang pawl nih fak ngai in an rak doh khenkham tikah, Indiana state boycott tiang tuah an timh ruangah caan zeimaw hnuah remh ṭhan a si.
White House Ah Obama Le Trump Tonnak An Ngei
 |
| Donald Trump & Barack Obama |
US President Barack Obama le President-elect Donald Trump cu Cawnningani ahkhan White House ah Sml. pakhat lengkai i hawikomhnak in caan an hmang.
President thim lai hrawng campaign lioah khan Obama le Trump hi an hmurka in an ṭhuatning a fak veve. Trump nih ka tlin a si ahcun Obama nih a kalpimi policy vialte ṭheh dih cikcek a timh kong le, US ram leng ah a chuakmi a sinak tehna, US President vialte lakah a chia bik le a ṭha lobik a si kong tehna a chim. Obama zong nih Trump nih a lam tampi in President sinak rian tlaih ding inhin tlinhnak a ngei lo tiah a chim ve.
Sinain US President thar ding hrangah Donald Trump thim a hun si hnuah, Obama nih a lawmhpinak kut a zaoh i, ram mizapi sinah lungrual tein Trump pom ding le cohlan ding kha a forhfial hna.
Obama nih January thla ah President thar sinah nawlngeihnak chanh ding cu, tluang tein tuah a si khawh nakhnga dingah biatak tein buaipi a si lai tiah a chim. Trump leti’n hin domestic le foreign policy dangdang pawl i ruahṭinak an ngei i, Trump nih US caah Obama team rianṭuanpi a duhnak kong a chimmi nih a lunglawmhter ngaingai.
Donald Trump zong nih President Obama leti’n i hawikomhnak caantha le sung an ngeih khawhmi cungah lunglawmhnak a chim lengah, rian ṭuanṭi kho dingin ruahchannak lianpi zong a ngei fawn. Trump cu a nupi, Melanie he an si.
President Obama an hmuhton dih hnu ahhin, Donald Trump le Vice President-elect Mike Pence nih Republican House Speaker Paul Ryan tonnak an va ngei.
US President A Țuanmi Lakah A Rum Bik A Si Cang Lai
Donald Trump, president a hun si tikah cun president tuancia mi vialte lakah a rumbik a si lai. A tir US nih president a rak ngeihmi vialte hna lakah John F. Kennedy cu mi rumbik a rak si. American Civil War hlan le hnulei deuh mi paoh cu a tlangpi in mirethei an si ngot.
John F. Kennedy hi a rum ngaingaimi a si i, hihi a pa chan lio in a rum ngaingai cangmi chungkhar a si. A pa, Joe Kennedy nih khan banking lei tehna, stock trading tehna, phungning loin zu zuar le movi chuahnak in phaisa a rak hui lengluang ṭheo tawn. President a rak ṭuan lioah khan an chungkhar ngeihchiah rum zat hi USD billion pakhat hrawng a ti. An chungkhar phaisa kha aa tawm vemi a si i, meithal in kah i a nun a hun liam riangmang tikah cun ro le rah zeihmanh a khawm kho manh lo.
George Washington zong kha a rak rum ngaingaimi a si ve i, ramhmun kaupi a ngei i, plantation kaupi a nei. Virginia ah ram hmun kaupi an nei i, culeng ahcun Mount Vernon lawng hmanh ah tin 8,000 leng hmunram kau an ngei rih. George Washington zong kha pumpak a ngeihchiah rumzat tiin khingthlai le chut khawh a si lo i, an chungkhar ngeihchiat rum zat cu USD million 525 lengkai a ti.
Thomas Jefferson kha USD million 212 lengkai a ngei ti a si i a rum bik pathumnak a si. chawlehhrawlnak lei ah a hlawhtling ngaingai mipa zong a si i, a ngeihchiah rumnak bik hna cu hmunram le inn a ngeihmi hna a si. Theodore Roosevelt nih khan USD million 125 lengkai a ngei i, palinak a si. Andrew Jackson kha panganak a si i, a ngeihchiah rum zat USD million 119 a ti ve.
Hillary Clinton pasal, Bill Clinton kha USD million 55 a ngei i, top 10-ah a lang kho phah vemi a si. Cun Barack Obama nih hin USD million 7 hrawng a ngei lai tiah ruah a si. US president a ṭuan cangmi lakah mirethei, harsa USD million khat zong a ngeihchiah a tling kho lomi cu Abraham Lincoln tehna, James Buchanan tehna, Andrew Johnson Ulysses S. Grant, James Garfield, Chester A. Arthur, Woodrow Wilson, Calvin Coolidge le Harry S. Truman tehna an si.#
US President A Țuanmi Lakah A Rum Bik A Si Cang Lai
Donald Trump, president a hun si tikah cun president tuancia mi vialte lakah a rumbik a si lai. A tir US nih president a rak ngeihmi vialte hna lakah John F. Kennedy cu mi rumbik a rak si. American Civil War hlan le hnulei deuh mi paoh cu a tlangpi in mirethei an si ngot.
John F. Kennedy hi a rum ngaingaimi a si i, hihi a pa chan lio in a rum ngaingai cangmi chungkhar a si. A pa, Joe Kennedy nih khan banking lei tehna, stock trading tehna, phungning loin zu zuar le movi chuahnak in phaisa a rak hui lengluang ṭheo tawn. President a rak ṭuan lioah khan an chungkhar ngeihchiah rum zat hi USD billion pakhat hrawng a ti. An chungkhar phaisa kha aa tawm vemi a si i, meithal in kah i a nun a hun liam riangmang tikah cun ro le rah zeihmanh a khawm kho manh lo.
George Washington zong kha a rak rum ngaingaimi a si ve i, ramhmun kaupi a ngei i, plantation kaupi a nei. Virginia ah ram hmun kaupi an nei i, culeng ahcun Mount Vernon lawng hmanh ah tin 8,000 leng hmunram kau an ngei rih. George Washington zong kha pumpak a ngeihchiah rumzat tiin khingthlai le chut khawh a si lo i, an chungkhar ngeihchiat rum zat cu USD million 525 lengkai a ti.
Thomas Jefferson kha USD million 212 lengkai a ngei ti a si i a rum bik pathumnak a si. chawlehhrawlnak lei ah a hlawhtling ngaingai mipa zong a si i, a ngeihchiah rumnak bik hna cu hmunram le inn a ngeihmi hna a si. Theodore Roosevelt nih khan USD million 125 lengkai a ngei i, palinak a si. Andrew Jackson kha panganak a si i, a ngeihchiah rum zat USD million 119 a ti ve.
Hillary Clinton pasal, Bill Clinton kha USD million 55 a ngei i, top 10-ah a lang kho phah vemi a si. Cun Barack Obama nih hin USD million 7 hrawng a ngei lai tiah ruah a si. US president a ṭuan cangmi lakah mirethei, harsa USD million khat zong a ngeihchiah a tling kho lomi cu Abraham Lincoln tehna, James Buchanan tehna, Andrew Johnson Ulysses S. Grant, James Garfield, Chester A. Arthur, Woodrow Wilson, Calvin Coolidge le Harry S. Truman tehna an si.#
No comments:
Post a Comment