India Ram Ah Driving Licence Deu A Tam

India ram ah driving licence a ummi vialte lakah 30% hrawng cu a deu a si i, document deuh hmangin minung 5 crores lengkai nih mawṭaw an mawngh tiah official data nih a langhter.

Driving licence deu a hmangmi hi tlaihkhih an i huah sual ahcun Rs. 10,000 cawiter an si lai lengah, kum khat tiang thong ah thlak khawh an si lai. Atu hrem dan peknak hman liomi ahcun Rs. 500 cawiliamter le a sau bikah thla thum chung thong thlak ti kha a si.

Kum tling loin mawṭaw mawngmi cu a mawṭaw ngeitu maw siseh, amah zohkhenhtu nih khan hrem dantatnak fakpi an tuar lai i, kum thum tiang thong thlak an si lai pinah, Rs. 20,000 cawiliamter an si rih lai i, an mawṭaw registration certificate zong hnon (cancel) hlihpiak a si cang lai.

Road Transport and Highways Minister Nitin Gadkari nih, “Driving licence 30% hrawng hi a deu an i tuahcawpmi a si i, hi pawl hi ralringte le thiamthihte in kan hlathlai kha a herh. Driving licence aa tuah dingmi pawl caah computerised test tuahnak ding online system zong kan ot colh cang lai. Mizei bantuk hmanh – politician, official le minthang, milar zong si ko hna seh, licence ngeih duh ahcun hi test-nak hi an tuah dih a herh cangh lai. Zeizongzate kha langhngan in kalpi a si cang lai” a ti.

Ministry nih hin licence 18 crores lengkai data an khomhsuat i, hi in hin 5 crores hrawng a deu (sercawp) an hmuhchuahmi kha, tha tein chekhlat dingah fim a si. Hi hlan deuh i acozah nih hlathlainak survey a tuah ahkhan, driving licence 6 crores chungah sing 74 a deu an um timi kha a rak hmuhchuah bal cangmi zong a si.#

(India ram khualipi New Delhi le Mizoram ah Chinmi (Laimi) tampi nih Driving licence a deu kha hmangin tlunkalnak, vanlawng in tlunkalnak tbk. ahkhan kan hman len hna. Cu tikah mah cu kong he pehtlai in tlaih kan ton sual ahcun hitining hin acozah nih dan a kan tat lai timi thei cio dingah ka hun tarmi a si. Chinmi i ralring tein um hna usih. Abik in Delhi ummi deuh kha kan i ralrin a hau)