A Thi Lo Nain A Nun A Thimi, Titanic Lawng In A Luatmi Japan Pa

Titanic tilawngpi khualtlawn aa rak i thawh ahkhan Japan miphun pakhatte a rak i tel ve. Hi thil hi theih awk zongah a har ngaimi a si natein, an theihhngalhmi chungah aa telmi khuaruahhar ngai pakhat cu a si ve ko.

Hi Titanic tilawngpi in khual a tlawng vemi pa hi Japan ram Transport zungah cozah zungrian ṭuan kum 42 upa a si. Amin cu Masabumi Hosono a si. Amah hi Russia ram ah tlanglawng lamser lei fimthiamnak a va cawn dih i, a tlun lei ah London khualipi a palkai pah dih hnu, a tlun lei ah Titanic tilawngpi ah aa cit ve hi a si.

Titanic i khualtlawngmi lakah a sangbik pahnihnak dirhmun in khual tlawngmi a si ve. Titanic tlawngpi hawrhra tlang aa suk lio ahkhan a ihnak cungah a um i, tilawng rianṭuantu pawl nih an thawh hnu ceo ahkhin a tho duak i, cuticun a umnak khaandal in a cunglei dot a hun phak tikah cun tilawng a ummi mizapi cu buaicercur in khuamui lakah an rak i tuai ko kha a hmuh hna.

Tilawngpi cu a pil deng cang ti theih a si tikah cun nunchanhnak vokkuanglawng zeimaw zat ralrin ah an rak i chiahretmi hnihchun a um. Cu hmanh ahcun nunau le hngakchia papek a si tikah vokkuanglawng cu nunau le hngakchia lawngte kha an nunchanh ding cun timh an si i, pa pawl caah cun hmunhma a um lo.

Mah lak i nunchanh dingin vokkuanglawng cungah hmunhma pekmi hna hmanh ah, khualtlawngmi chungin a sangbik pakhatnak dirhmun in khualtlawngmi mirum deuh kha papek an si rih. Cuti bantuk in thil sining a hmuh tikah cun amahle mah hmanh kha ka thi cang tiah aa ruat ve ko cang, natein aa ruahchannak belte cu a tlau kho taktak lo.

Poipang ton sual tikah nunchanhnak ah tiah an chiahretmi vokkuanglawng ahcun nunau le hngakchia lawngte cu papek in citter an si. Mah lio caan ahcun nunchanhnak ding vokkuang lawng numbat 10 ah minung pahnih citnak caah hmun a lawng rih tiah aw thangpi an au len thawng cu a rak theih.

A ngaingai ti ko lo ahcun mahlio caan ahkhan, chiatserh tein biakamnak tuahningte ahcun hi minung pahnih caah ṭhutnak hmunhma a lawnnak ahhin pa cu citter lo ding a si hnga, zeitintiah nunak le hngakchia papek ding ti kha a si. Nunau le hngakchia lawng bak kha papek in an nunchanh him ding ti kha muitinh bik a si.

Culio caan ahcun electric mei zong a rawk i a mit dih cikcek, tilawngpi cu muicercur in a um lio cu asi tikah, aho muihmel i hliah khawh a si ti lo. Culio caante cu Japan pa Hosono timi pa nih cun caanṭha ah i lak riangmang in nu bantuk awcawi chuah in thangpi khin a au.

Cuti nu bantuk in a aw aa chuahter tikah cun, lawng rianṭuan pawl zong nih nu a si hlah maw tiah an ruah i, nunchanhnak vokkuanglawng ahcun aa vai i cit kho ve i, thihnak in a rak luat khawhnak cu a si.

A hmasa bik ah Hosono hi New York khualipi a phan i, cu hnuah American acozah nih Japan ram tiang phak khawh nakding ah ṭuanvo an lakpiak i cuticun an ram cu ṭha tein a phan kho.

Japan a phak lecangkate bak in a minthang, mi theihhngalh a hlawh ngaimi ah a cang. Zeiti’ndah a min a rak than tiah cun, Titanic tilawngpi in a luat khomi Japan pa keimah pakhat lawng ka si tiah uanthlar nih a dawh ngaingai.

Asinatein nunchanhtu vokkuanglawng cungah i cit ve bak lo tein a nun a himbawmmi Archibald Gracie IV timi American caṭialthiampa nih Titanic lawng cungah thil sining a cangmi vialte cu tling tein a rak theih, aa cinken dih khitkhet hna. Archibald Gracie IV nih tilawngpi a pilnak kong tuanbia a ṭialmi cauk ah Japan miphun pakhat cu nu ah aa canter (aa umter) i, nu awcawi chuah in a aw a chuahter ruangah a nunnak a rak him, timi zong cu a dikdiar ning tein a ṭial chih.

Cutikah cun, Hosono nih kha lio caan ah thil sining a dik hmaanning tein pa a sinak in zul ko ding kha zul duh loin, a silo ning in a hmaanmi cu hnulei ah chit riangmang in, nu bantuk in aa umter ruangah a luatmi a si kha mizapi nih theih dih a hung si.

Cuti a sining zapi nih theih a si tikah cun Japan cozah nih a zungrian ṭuanmi tiang in an rak phuah. Cu hnuah Samurai timi buu pawl zong nih atu bantuk thil a tuahmi cungah ka palh ti’n anmah nunphung bantuk tein mahle mah i that dingin an rak fial. Asinatein Hosono cu miralchia a si ruangah a ngamh lo i, Japan Samurai tiang zong in cun a rak chuak diam.

Mah hi hnu thawk in a nun chung caan vialte ningzak le mihmai khap lo dirhmun in a nun cu a hmang i, nunnuam lo taktak in khua a sa thai ti si. Amah lawng a ningzakmi a si lo a chungkhar chingla rualchan vialte hna zong an ning a zak i, mi hmai khap loin a tuah ve hna.

Kum 1939 ah khan Hosono hi a rak thi natein a ralchiatnak kong hi Japan ram fimcawnnak cauk ah miralchia timi hmuhsaknak ca chungah telh chih in tuchun ni tiang a min hi a tang peng ko rih.

Vawleicung miphun vialte nih nunphung bantuk ah ruahmi le ngeih a simi cu Nunau le Hngakchia papek ding timi cu buar in amah a sahimnak a kawlmi, mahzawn ruat pa asi ko na tein, Masabumi Hosono hi ṭhatnak lei si loin chiatnak, miralchia hmusaknak lei in tuchun ni tiang minung tampi theihhngalh ngaimi ah a cang ve.#