Muhammad Ali Nih A Fanu Chimhhrinnak Bia Roling

Mi cheukhat nih cun Muhammad nih a fanu a chimhhrinnak bia hi Muslim biaknak lei phungning in a chimmi a si an ti men, asinatein vun ruah deuh tikah cun chanthar nu zapi caah ṭhahnem santlai ding le ruah awk zohchun awktlak taktak a si ti’n ka hmuh ve ning a si. 

Muslim zongah cun hmaihup phun le hup lo phun rengreng zong cu um a si ve. Cun an biaknak lei zong nih thilpuan thlapade lang dawh cah lomi hrukaih kha an khapmi a si ve fawn tikah khelkhat lei lawng in hun ruah le cuanh ahcun anmah biaknak lei hoih zawng deuh in a chimmi ti khawh kha a si ve taktak ko. 


Asinatein hika zawn a biate hi thuk deuh vak in von zoh ahcun zeibantuk biaknak a simi nu ca ko hmanh ah ṭhahnem santlai a si hrimhrim ko lai ti ruahchannak ka ngei. 

A hleikhun in duhsaknak ka ngeihmi cu atu lio Lainu (Chinmi) ca ko ahhin ka vun uar. Ramchung siseh, ramleng um siseh, kan farle hna le kan nule hna nih hi chimhrinnak biatawite hi kan rel i kan i cawn cio ve le zeitluk in a sunglawimi dah kan si  ti, i thei in, hlan kan pile hna nih an rak i hrukaihning kha zeitluk in dah a sunlawi ti kan hngalhter sehlaw, oltarawk in hmuh khawh awkah maw, ka pholangh lai, asiloah lungvar mansung bantuk in dah ka thuhnawk/huhphen ve lai ti kha ṭha deuh le thuk deuh in ruat bu tein i cawn cio ve hna usih ti ruahchannak he hi bia tawite hi ka vun in hrawmh chinnak a si.

Vuleicung boksing thonghthiam minthang Muhammad Ali nih a fanu dawtcuk Hana nih thilpuan thlapade lang dawhcah lomi chanthar thilthuam aa hrukaihmi ruang i, a fanu sin a chimmi biatawi tung fiang tung felfai tung nu zapi caah cinken awktlak tiangin a chimmi a fanu Hana nih a chim ṭheo tawnmi cu a tanglei bantuk hin a si.

A ka dawbikmi hringtu ka pa nih cun a pheicung ah a ka pawm bu tein hi atu bantuk biaṭha thlum-al zeitikhmanh ah ka philh khawh ti lo dingmi cu a ka a pau i ka hnahramte ah a chim e. A mitfang dawtnak mit tein a ka zohtu ka pa cu hmaizah upat a va um hringhran dah. 

“Hana, hi vuleicung ah hin Pathian nih a sermi thil mansung hna hi olzaangte le fawi le baite in hmuh le ngeih khawh men colh dingah hin zei bantuk thil hmanh a chia hna lo i, ṭha tein a thuh i, a fim dih hna. Teirial tein fakpi i zuam hnu le ṭuan hnu lawnglawng ah hmuh khawh le ngaih khawh an si. Lungvar hi khoika in dah an lak i an ngahmi a si? Vuleitang a thuhnak hmun ah thuh le chiah a si. Rili lungvar zong cuti ṭhiamṭhiam in cun rili a thuhnak bik tawne ah aa dawhnak hen thuh in a um i, sui zong vuleitang a thuhnak leichung lunghak nih thap hnih thapthum in a tuam i a thuh hna, thazaang tampi chuah hnu lawnglawng ah lak khawh le ngeih khawhmi an si.”

Cuticun a van ka zohning cu a vun i biatak deuh ṭhan i, “Na taksa hi thil thianghlim le mansung taktak dahkaw a si, cu lungvar le rili lungvar tepawl nak a let tampi in a sung deuhmi a si cucaahcun, olzaangte i hmuh khawh dingah pholangh loin na thuh/khuh ve hrimhrim ding a si,” tiah a ti.

Source: Taken from the book: More Than A Hero: Muhammad Ali’s Life Lessons Through His Daughter’s Eyes.