South Korea ram ah Middle East Respiratory Syndrome
(MERS) zawtnak rai a ngeimi hmuh chapchuan chin lengmang a si ruangah
dothlatnak tuah dingah World Health Organization (WHO) dothlatnak lei ṭuanvo
ngeitu phu pawl thlah an si lai.
South Korea Ministry of Health and Welfare nih WHO
leti’n i bawm in an ramchung ah a tlung cuahmahmi MERS zawtnak rai hi ṭha tein
chek hneksaknak tuah hnu, Saudi Arabia ram ah a tlungmi zawtnak rai leti’n an i
lawh le lawhlo zohchun an i timh kong zong a chim.
Nizan tiang ahkhan SKorea ahhin MERS zawtnak rai a
ngeih tiah lunghrinhmi cheknak an tuahmi ah minung 41 nih an kai cang tiah
theihfian a si cang i, hi zawtnak rai a ngeimi chungah minung 4 nih an thihpi
cang.
MERS zawtnak rai a kai thar tiah hmuhchuahmi ahhin
kum 45 upami ralkap pakhat zong aa tel ve. Mah hi ruangah hin amah a umnak hmun
South Korea le US ralkap umnak Air Base i, ralkap minung 60 hna zong cu an
taksa chek hneksaknak tuah dingah a dang tein umter an si cang.
WHO nih a langhterning ahcun, SKorea ahhin MERS zawtnak rai a ngeih
men lai tiah lunghrinhmi minung 1,600 hrawng hmun dang teah umter an si cang i,
hi chungah hin a tam-u cu an umnak inn ah midang leti’n i palkai lo dingah umter
an si i, cheukhat ve cu sizung ah umter chung rih an si hna.
Kum 2012 ahkhan Saudi Arabia ram
ah hmuhchuah a simi, MERS zawtnak rai hi vawleicung pumpi ah minung 1,185 nih
an ngeih ti a si i, hi chungah hin minung 443 nih an thihpi cangmi a si. Hi
zawtnak rai hi vawleicung ram 20 leng ah hmuhchuah a si cang i, a tam bik
hmuhchuahnak hmun cu Saudi Arabia ramah a si.
MERS zawtnak rai a ngei tharmi
hmuhchuah belh an si chin lengmang ruangah Seoul mayor Park Won-Soon nih hi
zawtnak rai hi biatak tein kan doh lai, a lamkip dap in kan ti khawhning paoh
in hi zawtnak rai hi rehter kan i zuam hrimhrim lai tiah a chim. Hi zawtnak
ruangah hin South Korea ramchung sianginn zeimawzat cu khar chung rih an si
cang i, acozah nih MERS hotline a tuahmi ah nifatinte mi chawn biatu thong
leikai an um ti a si.#
No comments:
Post a Comment