Britain Mirum Bik 10 Lakah India Mi Aa Tel

The Sunday Times nih Britain ram mi rum hlei cazin 20 an langhtermi ah India mi sinak a tlaihmi minung pahnih an it el i, top 10-nak ah pakhat deuh cu a lang kho. 

Sunday Times Rich List 2016 ah hin Property le Internet in a hlawhtling takmi, David le Simon Reuben te unau hi mirum bik an si i, British rammi an si. An ngeihchiah rum zat hi £ billion 13.1 (England phaisa Sterling Pound) lengkai a ti i, nikum ahkhan cun £ billion 9.7 an ngeih tiah rak theihmi an si tikah, tutan an ngeihchiah he hin cuaithlai tikah cun an rumning hi an i lethal tuk hringhran ti hmuh khawh a si. 


Forbes thawngcabu  nih kum 2013 ah UK mi rum tiah a langhtermi chungah khan pahnihnak an rak si i, nikum ah The Sunday Times nih a tarlangh tikah cun panganak ceo an si. An rumnak a ruang hi real estate le internet lei thil lengah, thir lei phun pawl hmang in chawhlehnak an tuahnak in a si. Kum 1990 hnulei in khan Russia ram ah thir (metal) lei phun pawl hmangin chawleh thalnak biatak tein an rak thok i, mah hi lengah hin an chawhleh thalnak hi an kauh chin vima cang ti a si rih. 

Mirum bik tarlanghmi a hun cang ahhin India rammi, Hinduja Group ngeitu pawl – Srichand le Gopichand te unau hi a si. A tir ahkhan cun India in hram an bunhmi a si i, kum 1979 in khan hmunlipi bik ah an hmanmi cu London ahhin an ṭhialkam i, an chawleh thalnak hi an hun kauh chin lengmang ṭhan. 

Hinduja Group tangah hin coporation tampi a um i, cu lakah cun Ashok Leyland tehna, IndusInd Bank tehna hi min langsar zual an si. Gulf Oil Coporation Ltd. zong hi hi Group tangah a telmi ṭhiammi a si. Hi hna unau ngeihchiah zat hi £ billion 13 a si i, nikum lio rich list an rak chuah zongah khan pahnihnak ṭhiamṭhiam an rak si.

UK ram ah hin mi rum pathumnak cu Judah pa, Ukraine ram a chuakmi, US miphun sinak aa tlaihmi, London ah khuasa lio, Leonard Blavatnik a si i, investor a si i, philanthropist lei mi langsar ngai zong a si rih. A ngeihchiah rum zat hi £ billion 11.590 a si i, nikum ahkhan cun pakhatnak a rak si i, tutan ahcun pathumnak ah a tla.

Palinak ah hin Canada rammi, London ah khuasa, Galen Weston le George G. Weston te an si. An ngeihchiat rum zat hi £ billion 11 a si i, nikum zongah khan palinak an rak si. Galen Weston hi Businessman a si i, philanthropist mi langsar tak pakhat zong a si ve. Forbes thawngcabu nihcun kum 2014 ahkhan vawleicung mirum an thimmi ah 147-nak ah a min a rak lang kho. George G. Weston hi Associated British Foods ah an CEO a si, kum khat chung a hlawh bak lawng ahhin £ million 7.15 a si.

Ernesto le Kirsty Bertarelli te nupa hi rum lei ah panganak dirhmun ah an i chuah ve i, Switzerland le United Kingdom rammi sinak a ngeihmi an si i, sii-ai lei serchuah kha an ei kawl hawlnak bik cu a si. £ billion 9.780 an ngeihchiah rum zat a si i, nikum ahkhan paruknak ah an rak lang ve cang.

Tutan mirum lian thimnak an tuahmi top 20 chungah Lakshmi Mittal hi aa tel ve i amah hi India miphun a si i, 11-nak ah a lang kho ve. Chelsea ngeitupa, Russian mirum pa, Roman Abramovich cu 13-nak a si.#