Hillary Scott Nih ‘Thy Will’ Timi Hla A Phuahnak Sullam A Chim

Lady Antebellum nih vawleipi theihhngalh in a lartermi, Hillary Scott nih a album thar ding ‘Love Remains’ ah a telh ve ding, ‘Thy Will’ a phuahnak a sullam cu hitihin a chim, “Hi hla hi Pathian sin ka cakuat’ a si a ti.

‘Thy Will’ hi ‘Love Remains’ album in hla bingte in a chuah hmasa bik a si i, Hillary Scott nih hi hla hi Pathian sinah thil a halnak i, ca a kuatmi a si kong a chim. “Thy Will” hla hi na caah ka chuah hmasa bik ding siseh law ti ka duh. 


Hi hla hi tunai chungte i ka thil tehton, ka thinlung kekkhuaitu thil ka tonmi in ka phuahmi a si. Caan harsa ka ka ton ciami lakah harsa bik bik ka timi pawl in a hung chuak i, ka phuahmi a si,” a ti.

“Hi hla hi Pathian sin ka cakuat cu a si ko. Biahalnak har tak ka hal i, ka nun ah hin ka hmuh khawh lo thil harnak a hung cangmi tampi an um i, cubantuk sican bu in cun bia dik, dinfelnak cu kaa tlaih zungzalmi a si. Amah cu bochan i, zumh taktak kha kaa tim i, amah lawnglawng hi ka thimmi cu a si,” a ti. Harsatnak tong len ko hmanh usih law, ‘Nangmah nawl si ko seh’ ti khawh a biapitzia zong a chim i, harsatnak le lungretheihnak kan cung i a tlun caan zongah Pathian cu hnget tein zumh i, amah lei hoih kha thil biapi tuk a si tiah a chim.

Scott nih atu Pathian thangṭhatnak hla album chuah a duhnak hi amah a sining dikte kha phozar a duh ruangah a si tiah a chim. A hla tam deuh hi cu a nun chungah harsatnak a tonmi vialte a ṭha a tinak hla a si. “Hi hla pawl le hla dang tampi cu ka thin lung in a rak chuakmi a si. ka nun chung ahhin hi bantuk hla hi ka sa ṭheo lengmang tawn hna i; biakinn ah maw siseh, ka chungkhat rualchan le hawile he maw siseh.. ka dawtmi le tlaihchanmi tampi, a thi colh ding an kutza nem tlaih bu te zong in ka sak ṭheo tawn i, ka sa zungzal ko lai,” a ti.

Hillary Scott nih hin Gospel album hla chuah dingin aa timhlamh cuahmah lio a si i, a album ding min hi ‘Love Remains by Hillary Scott & The Scott Family’ ti a si. Hi album in hin a nule pa – Lang Scott le Linda Davis te lengah, a chingla rualchan, a nau, Rylee Scott tehna zong kha hlasa ah an i tel ve.#