Vawleicung Hla Tam Bik Zuarmi White Christmas

Vawleicung ahhin hla dawh le ṭha tampi an chuak len i, hi hnu zongah a chuak chin lengmang rih ko lai asinatein Bing Crosby hla ‘White Christmas’ tluk in zuar tam a hlawhmi hla cu an har cang ko lai. Musician roling taktak, hla phuah thiam taktak an chuak lengmang asinatein Bing Crosby hla a chawhkanh le a lan khotu belte nihin tiang an um kho rih lo; Adele hla bing fukhat, a hit taktak mi zong nih khan a tluk lo.

‘White Christmas’ hla hi kum 1942 ah Irving Berlin nih a rak phuahmi a si i, hi hla, Bing Crosby nih a sakmi hi Guinness World Record nih hla bing fungkhat ah zuarh tam bik tiah record a chiah. 

Physical sale an timi, cassette maw, CD maw, DVD bantuk pawl in an zuarmi lawng hmanh copy million 50 hrawng a phan i, digital leti’n cun copy million 100 hrawng a si tiah an chim.

Hi hla hi kum 1942 ahkhan Bing Crosby nih a rak i chuah i, a hawhtlinpi hringhran. Amah lawng si loin, hlasak thiam minthang tampi nih an hunsak ve thluahmah tikah, hi an sakmi vialte leti’n cun, ‘White Christmas’ hla hi copy million 150 hrawng an zuarmi a tling.

Bing Crosby hi American hlasak thiam le lemcan thiam a si i, a hla zuarmi vialte hi copy billion pakhat a tling tiah an chim. Kum 1977 ahkhan a nunnak a rak liam.

Bing Crosby

  

White Christmas a hun changtu hla zuar tam bikmi cu Elton John hla pahnih – Candle in the Wind le Something About the Way You Look Tonight’ kha a si i, copy millin 33 hrawng an zuar khawh ve. Candle in the Wind le The Way You Look Tonight hla hna hi cassette pakhat ah awkhumh in rak chuahṭi an si i, Lady Diana philhlonak ah pekchanh a rak si.

Pathumnak cu Bing Crosby sakmi ṭhiam ‘Silent Night’ a si i, kum 1935 ah a rak chuakmi a si, copy million 30 an rak zuar. Palina ah Mungo Jerry hla ‘In the summertime’ a si i, copy million 30 hrawng a zuarh khawh ve i, Bill Haley & His Comets sakmi ‘Rock around the Clock’ cu panganak a si i, kum 1954 ah a rak chuak i, copy million 25 an zuar.

Hla bing fungkhat zuar tam bikbik 13 lak chungah hin Chinmi hna nih kan uar ngaimi pawl zong an i tel len ve. Whitney Houston hla ‘I will always love you’ cu 7-nak ah a um i, Elvis Presley hla ‘It’s now or never’ cu 8-nak, USA for Africa pawl nih an sakmi minthang emem ‘We are the World’ cu 9-nak a si. 

John Travolta le Olivia Newton John nih sakmi “You’re the One That I Want” tehna, Bryan Adams hla hit “(Everything I Do) I Do It for You” tehna, Celine Dion “My Heart Will Go On” tehna zong an lang kho ve hna.#