One World Trade Center Observatory Innsang Onnak An Tuah Lai

09th April: Kum 2001 November ni 9, lioah ralhrang pawl nih an rak hrawhmi World Trade Center (Twin Tower) cu kum 8 chung sak a si hnu, kum 13 hnuah a thar in rianṭuannak hmun caah onnak puai cu hlunghlai in tuah a si cang lai.

Kum 2014 November thla lio ahkhan rianṭuantu phu zeimawzat caah One World Trade Center onnak zong rak tuah a si cang. Hi innsang hi New York khualipi ummi hrang lawng si loin United State pumpi thinlung mitthli hnawhpiaktu lungphun thar ah a hung cang.


Hi World Trade Center observatory tiah siseh, One World Obserbatory ti’n an auh tawnmi New York ah an sak tharmi hi a ralaimi May 29 ahkhin onnak puai an tuah lai. Hihi World Trade Center, a luancia September 11, 2001 (9/11) ralhrang pawl nih vanlawng in an rak pahmi a thar i an sak nolhmi innsangpi kha a si. Hihi sipuazi tuah pawl caah November ni 13 thawk khin onnak tuah a si fawn rih lai.

Hi One World Trade Centre hi Pe 1,776 (meter 541) innsang a si. A cung dot 102nak tiang phanhnak dingah hin elevator in second 60 leng a rau lai lo ti a si.

One World Trade Centre, dot 104 a sannak hi, $ 3.9 billion dih in an sakmi a si. Hi innsangpi hi America ramchung inndot sangbik a si. Hi innsangpi atu a dirnak hmun hi, a hlan Twin Towers a rak dirnak hmun acre 16 a kauhnak lila ahkhan sak ṭhanmi a si. A tir World Trade Center ralhrang pawl nih an rak pah i, a cimh lioah khan, minung 2,700 lengkai nunnak a rak liam.

September ni 11, 2001 kum lioah ralhrang pawl nih vanlawng in an rak pahmi Twin Tower

Observatory ah kal a duhmi vialte kal khawh nakding lehmah (ticket) cu nizan cawnnithumni thawk in khan zuarzamh hram an ot cang. Hi onnak puai ahhin 9/11 lio nunnak liammi chungkhar pawl caah siseh, kha lio innsang cimh lio nun chanhhimnak rianṭuantu paoh cu a lak tein zoh/telnak nawl pek an si lai.

Lehmah man cu hiti hin zuarzamh a si i, kum 13 – 64 lehmah man $32, kum 6-12 kar lehmah man $26, le $30 hi kum 65 le cunglei kum upa pawl tiah an ṭhencheu ning cu a si.

A Thar

Hi innsangpi a dirnak hmun thlanglei ah Twin Tower a rak cimh hnu in dirhmi, National September 11 Memorial & Museum hmuh khawh a si fawn rih lai. Hi hmun nih ai tinhbikmi cu September zing niceu dawhte sinah nunnak a liammi vialte hna cawimawi le upat peknak caah an tuahmi a si.

A inn pungsan design suaisamtu Skidmore, Owing & Merrill firm ah a ṭuanmi, TJ Gottesdiener nih cun “Kan hlawhtling cang, a donghnak ahcun kan hlawh a tling kho cang” tiah a rak ti.#