Nestle India Sinah Maggi An Zuarmi La Ṭhan Dih Dingin An Thanh Hna

India rampi Food Inspector pawl nih Nestle India sinah ramchung hmunka dangdang ah zuar dingah a tuah tawnmi Maggi Noodles khohsuai cu lead (Khohsuai chungah an telhmi suan) level taksa caah ṭihnung rikhiahmi zatawk fang leng in a luan ruangah la ṭhan dih u, tiah theihternak thawng an thanh hna.


India ram, Uttar Pradesh ramkulh ah hrambunhmi, Food Safety and Drug Administration (FDA) lei nih Nestle company nih a tuahmi, Maggi Noodles Khohsuai packet 24 cu dothlatnak ṭha tein an tuah khawh hnuah aphi chuak a hung langmi cu lead content an telhmi a tam tuk timi kha an hmuhchuah.

FDA official minung pahnih nih an state chungum Laboratory hneksaknak hmun ah Maggi khohsuai an hneksak chunmi vialte chungah hin lead level, telh ding tiah rikhiahmi leng in tam tuk a luan tiah an chim. Lead level telh ding tiah rikhiahmi zat cu 0.01 parts per million (ppm) – 2.5 ppm ti a si lioah, Maggi ahhin cun 17.2 ppm tiangin an telhmi a sang tiah, an ti.

Nestle India Company nih an chuahmi Maggi Noodles (Maggi Khohsuai)

Scientist pawl nih Maggi khohsuai ahhin Monosodium Glutamate (MSG) level zong a sang tuk hringhran tiah an chim chap rih.

Lucknow ah FDA Deputy Inspector General, DG Srivastava nih, “Maggi Instant Noodles khohsuai an tuahmi ahhin lead le MSG a ummi hi taksa caah a zatawk telh ding timi nakin a sang i, hi ruangah hin company zong theihternak thawngh thanh an si cang.” a ti.

Hiti dothlatnak an tuah hnuah minung taksa pum caah ṭihnung a si timi kha fianghlang tein an hmuhning aphi chuak cu a si cang natein, Nestle India company nih cun Maggi Noodle khohsuai kan tuahnak ah hin raw material hmanning ding kongah zulh ding phung felfaite in kan ngei i, “Maggi Noodle ahhin MSG hi kan telh lo i, Glutamate hi khohsuai chung an hmuh a si zongah mahcu thil cu kanmah telhmi si loin amah kokek natural resource in aa rak telmi hrim a si lai. Khohsuai chungah telh tawk timi suan (lead) zong hi felfai tein cheknak tuah nolh lengmangmi a si. Cucaah tutan ah telh dingmi level nakin zatawk a luan sualmi hi thil khuaruahhar bik ah kan ruahmi a si,” a ti.#