China Nih Muslim Biaknak Thla Thianghlim Ramzan Ah Rawl-Ulh A Khap

China acozah nihcun an ram chaklei kam Muslim biaknak a zulmi pawl an tamnak bik, Xinjiang hmunram ah Muslim pawl nih an biaknak ah an sunhsak bikmi, Ranzan thla i rawl-ulhnak an ngeih tawnmi cu acozah rianṭuan, sianghngakchia le cachimtu saya/mahte nih an tuah ve dingah a hnatlakpi ti hna lo.

Muslim biaknak a zulmi pawl thlathiang timi, Ramzan hi nizan in khan caan hmannak cu an ot cang. 

Hi thla chungah hin Muslim paohpaoh nih cun ni a chuahka in a tlak tiang zeihmanh rawl an ei ding bal lo. Asinatein, hi biaknak he aa pehtlaimi thil cu China cozah nihcun a onh ti hna lo, rawl-ulh a khappiak hna sianghngakchia pawl vialte hna sin zongah anmah biaknak he aa pehtlaimi thil tuahnak ah i telhmoih lo dingin a ti rih fawn hna. Ramzan thla chungah hin rawldawr (restaurant) tepawl vialte hna zong ong dih dingin theihternak thawng a thanh fawn rih hna.

Uighur muslim tamnak bik, Xinjiang hmunram ah hin acozah nawlngeitu pawl hna zong nih khan kum dang tawn zongah Ramzan hman hi an rak khap balmi a si i, hi an khapmi ruangah hin mi soisel zong an tong ngai tawn. Uighur rights group pawl hna nih cun Muslim biaknak a zulmi pawl nih an biaknak he pehtlai in acozah nawlngeitu lei nih an khenkhammi thil nih hin daihnak lei si loin, buaibainak a chuahter deuh tiah an chim. 

Asinatein, China acozah nih Xinjiang hmunram ahhin mihraang rual pawl cawlcanghnak ṭha lo hi zeitik caan paoh ah a cang kho mi thil a si tiah an chim hnu, hi hmunram ah hranhram cawlcanghnak ṭhalo a cang tawnmi zong kha biaknak lei mi kalsual tuklehpek pawl hna ruangah a cang tawnmi a si, a ti.#