India ram, Assam Ramkulh Ah Wai Wai Khohsuai An Khap

India ram Assam ramkulh cozah nihcun an ramkulh chungah Maggi khohsuai zuar le luhpi a khap hnuah Wai Wai khohsuai zong a khap tel chih cang.

Food Safety and Standards Act- 2006, Section 30 (2)(a) phunghram chirhchan in, Wai Wai khohsuai zuar le luhpi cu a khap cang i, hi atu an khapmi hi ni 30 chung a nguh phot rih lai ti a si.

Acozah thanhnak biachuakmi ahcun Wai Wai khohsuai ahhin Food Safety Regulation onh a si lomi, MonoSodium Glutamate (a-chu-hmuk) aa telmi hmuhchuah a si ruangah khapnak a ruang a si tiah an langhter.

Food Safety and Standards Authority of India (FSSAI) nih tunai chung ahkhan India ram pumpi ah Nestle India kutchuak, Maggi khohsuai cu lead content a san ruangah le a-chu-hmuk (MSG) hmuh tel chih a si ruangah la ṭhan dih dingah theihternak tuah an si hnu ahhin Assam ramkulh acozah zong nih a khap colh venak a si.

Atu ahhin Nestle nih an tuahmi, Maggi $ dollar 50 million (£32million) man, India ram hmun dangdang ah a kuatmi vialte cu lak dih dingah biakhiahnak an tuah cang. Hi atu an lak ṭhan dih dingmi Maggi hi a laknak dingah siseh, a hrawhnak ding hmun phakpi nakding ah phaisa tampi a dihheu ṭhan lai tiah an chim.

Nestle hi kum 1983 ahkhan India ramah sipuazi tuah dingin a rak lutmi a si i, India ram ahhin khohsuai market 80% hi cu anmah nih an tlaihmi a si. Nestle global chief executive Paul Bulcke nih kan rung kir ṭhan zokzok ko lai, a ti.

Atu zong hi a dai kho rih thlu lo, FSSAI sinin a chuakmi bia cungah Nestle India nih Bombay High Court ah tazacuainak a tuah lio cuahmah a si.

Wai Wai hi Thailand ram Thai Preserved Food Factory Co. serchuahmi khohsuai a si i, Thai Kampani thiamnak hmangin Nepal ah Chaudhary Group pawl hna zong nih India ramchung ah Production plant pahnih an tuah i, annih nih hin serchuah le zuarzamh lei rian hna kha an ṭuanmi cu a si.#