India Ram Ramkulh Kip Nih Maggi Cheknak An Tuah Cio

Nestle India serchuah, Maggi khohsuai kong buainak cu reh lei panh aa tim kho rih ruam lo. 

National Consumer Dispututes Redressal Commission le Central Food Regulatory authority, FSSAI sinah lungtlinlonak (complaint) an tuah hnu, ramkulh kip cio ah chek hneksaknak tuah dingah maggi sample cu an lak cio cang.

Maggi khohsuai ahhin minung ngandamnak caah zatawk telh dingmi leng suan hmuhchuah a si cupinah, a thawtter deuhnak caah monosodium glutamate MGM (a-chu-muk) an telh rih timi hmuhchuah a si.

Retailer pawl hna zong nih Maggi packet an zuarmi vialte cu lak hram an ot cang. Indian Army lei zong nih theihternak thawng an thanh i, ralkap pawl nih Maggi ei lo ding tiah an thanh hna. 

Ralkap Canteen pawl vialte hna zong Maggi Stock cia an ngeihmi cu bia dikhmaan a um chung rih hlanlo paoh cu zuarzamh rih lo siseh tiah an ti hna. India ramchung ahhin Ralkap Canteen 1,000 lengkai a um.

Delhi cozah nih Maggi hi ni 15 chung zuar rih lo ding tiah khapnak an tuah lengah, a serchuaktu Nestle India cungah tazacuai an timh rih hna.

Delhi ahhin sample 13 chek tikah 10 ahhin rikhiahpiak ning leng luan in suan a um ti hmuhchuah a si ve i, acozah nih Maggi lawng si loin khohsuai  a serchuaktu kampani brand ṭengnge dangdang hna zong chek hneksaknak tuah i, a herhning in dantatnak pek an timh kong a chim. 

Haryana, Punjab, Tamil Nadu, Telangana, West Bengal, Himachal Pradesh, Meghalaya, Maharashtra le Assam ramkulh pawl zong ahhin Maggi sample cheknak tuahter a si ve cuahmah ko. Hiti thil a sican lio caan ahhin Goa acozah nih sample an cheknak ah an hmuhchuahmi aphi (result) ahcun minung taksa caah ṭihnung a si lo a himbawm ko ti an hmuhchuahning a si ve.

West Bengal acozah nih Maggi khohsuai lengah hin kampani dang serchuah ei supsap (snack) pawl zong chek tuah an i tim tiah a chim. State Consumer Affairs Ministers Sadhan Pande nihcun, “Kurkure le Lays ei supsap pawl zong hi lungtlinlonak (complain) a tuahmi an um ruangah hi hna pawl zong hi chek tuah dih an si ve lai,” a ti.

Kurkure le Lays (ei supsap)

Hi atu bantuk sipuazi tuahtu kampani lianlian pawl hna hi an ṭhatlonak zozalangh hi khat le khat an i tim lengmang tawn i buaibainak tete hi a um lengmang ṭheo. A tir zongah khan India ram ah Coca-Cola haangthlum hi minung ngandamnak caah a him thlu lo ti le a him ko tiah an rak i elhnial lencangmi zong a si.#