MERS Ruangah SKorea Ram Ah Sianginn An Khar

Middle East Respiratory Syndrome (MERS) zawtnak rai ruangah South Korea ram nih ralrin thil ah an ram Primary School sianginn 200 lengkai a khar i, public event tampi a cancel pinah mi 1,300 cu an ngandamnak chek dingah a dang tein a chiah rih hna.

Health Official pawl nih cawnnithum ahkhan minung panga cu MERS zawtnak an ngei ti hmuhchuah belh an si a ti i, hi atu an hmuh belh chapmi hna minung leti’n hin an dihlakte mi 30 an ti cang i, mi pahnih nih an thihpi cang tiah a chim.

South Korea ram ah MERS zawtnak rai a tlung cuahmahmi hi vawleicungpi nih an tuaktanpi ngaimi hna zong a si. Hi zawtnak rai hi minung pakhat sinin, midang va chawnh chin kha, a olzaang tukmi zawtnak phun a si ruangah vawleipi an lungretheihnak zong hi a si. Ram cheukhat ahcun hi MERS zawtnak rai hi an hmuhchuah ve ko natein, SKorea ram bantuk in a karhcak kho theng lo ti a si.

SKorea ram ah MERS zawtnak rai hi May 20 ahkhan hmuh hmasat bik a rak si i, Middle East ram pawl ah khualtlawng in aa chawkvakmi kum 68 mi taksa chungah rak hmuhchuah a si. A tlun hnuah hin pumpak ngandamnak lei i, soiselnak zeihmanh a ngei lo ti a si, natein caan tlawmpal a hun rauh hnu harsatnak lei soiselnak a ngeih hnuah out-patient clinic pahnih le sizung pahnih ah zohkhenh a si i, hi hnu in hin mah zawtnak rai hi a karh chin lengmangmi a si tiah an ruah. 

Health care worker pawl hna nih cun an rak zohkhenh lioah hin MERS zawtnak rai a ngeimi mi damlo bantuk in zohkhenh loin, mi damlo pangai bantuk tein an rak chiahmi a si. Cu tikah amah bantuk in a dam ve lomi a pawngkam mi zaw dang pawl cu a chawnh hna i, a chungkhat le a rak zohtu hna le sizung rianṭuan pawl tiang tel in a chawnh rih hna.

Acozah nih Primary School sianginn an khartermi lakah a tam-u cu Gyeonggi province chungummi an si i, hi hmun hi MERS zawtnak rai a ngeimi tambik an hmuhchuahnak a si.#