Mayweather Hi Lentecelh Celhthiam Vialte Lakah Phaisa A Hmu Bik Si

Floyd Mayweather Jr.

American boksing thonghcelhthiam Floyd Mayweather nih phaisa a thongh zat hi a tam hringhran, Forbes mekazin nih thla 12 chung lentecelh aa celhmi pawl nih phaisa an hmuhning kha a hun chuah tikah pakhatnak a hmuh.

Forbes nih hin kum fatinte lentecelh aa celhmi pawl phaisa an hmuh zat kha an chuah ṭheo tawnmi a si i, atu ah lentecelh pawl phaisa hmuhning an chuahmi hi a hmanung bik nikum June thla in khan tukum June thla karlak lentecelh pawl phaisa ruh zat an hun zulhdawi hnuah an hun tarlanghmi cu a si.

Mayweather nih thla hleihnih chung bak ah dollar million 300 a hlawhchuah i, tutan a hlawhchuahmi tam-u hi cu tukum May thla chungah Manny Pacquiao he an i thongh celhmi khan a hmuhmi a si.

Filipino boksing thonghcelhthiam Pacquiao zong Mayweather he an i thonghmi nih khan rumnak lei ah hunchonak tampi a pek. Thla hleihnih chung bak ahkhan dollar million 160 a hlawhchuah i, Pumpululh celhthiam minthang Cristiano Ronaldo nakin a phaisa ruhmi a rak ṭhahnem deuh. Portuguese pumpululh celhthiam nih hin dollar million 79.6 khengte bak a chuihmi a ti ve.

Nu lentecelh celhthiam chungah hin bibik top 20 ah aa lang kho an um lo. Russian tennis star midawhte Maria Sharapova hi nu lentecelh vialte lakah cun phaisa a ruut tam bik a si i, dollar million 29.7 a hmuhmi a ti.

Forbes nih lentecelh celhthiam phaisa hmu bik a chuahmi lakah hin Barcelona forward kum 23 upa Neymar hi hngakchia bik a si i, 23-nak ah a dir i, thla hleihnih chungah dollar million 31 a chuih khawh ve.

Indian lentecelh celhthiam chungah cun India cricket captain Mahendra Singh Dhoni a tel kho ve i, IPL i, Chennai Super Kings captain le Brazil captain Neymar tepawl nih hin dollar million 31 cio kha an ruh khawhmi an si tikah, 23-nak ah an dirṭi hna.

June 2014 – June 2015 karlak lentecelh celhthiam pawl phaisa hmu bibik 10 hna:

-Floyd Mayweather, US, Boxing $300million 

-Manny Pacquiao, Philippines, Boxing  $160 million 

-Cristiano Ronaldo, Portugal, Football  $79.6 million 

-Lionel Messi, Argentina, Football  $73.8 million 

-Roger Federer, Switzerland, Tennis  $67 million 

-LeBron James, US, Basketball  $64.8 million 

-Kevin Durant, US, Basketball  $54.1 million 

-Phil Mickelson, US, Golf  $50.8 million 

-Tiger Woods, US, Golf  $50.6 million 

-Kobe Bryant, US, Basketball  $49.5 million