Nazi Pawl Ruangah Kum 77 Hnu Ceo Ah Doctorate Degree A La Kho

Ingeborg Syllm-Rapoport

German university sianghleirun nih cun kum 1938 ah Ph.D degree caah thesis ṭial a rak i lim dih cangmi, kum 102 mi Ingeborg Syllm-Rapoport cu Cawnnihnih ahkhan degree an pek cang.

Pediatric expert Rapoport hi Nazi pawl nih a degree laknak dingah a donghnak bik camipuai final exam phit ding kha an rak sianh lo ruangah Ph.D degree hi a caan liote ah a rak lak khawh lonak a ruang cu a si. 

Rapoport hringtu a nu, Maria Syllm hi Judah mi a si ruangah hin Nazi pawl nih a lak dingmi he pehtlai in oral exam tuah dingmi cu an rak khenkhamnak hi a si.

Hamburg i, UKE University Medical Center nih Rapoport nih kum 1937-1938 lio caan ahkhan a doctoral dissertation hi a rak timhlamh tiah a chim. Asinatein, Nazi pawl ruangah a rak lim khawh ti lo ruangah a thesis lim dih cangmi chungin kum 77 a ti hnupi, May thla ahkhan oral test hi a tuah ṭhannak a si, a ti.

UKE medical director le chairman, Burkhard Goeke nih a dongma toi ahcun Rapoport nih aa rak i timhmi suttungpi cu hlawhtling in a um cang. Zeitluk lunglawmh awk dah a va si, tiah a chim.

UKE University Medical Center nih Rapoport nih kum 100 a rak tlin ahkhan amah kong hi Dean nih a rak theih tikah, biatak tein a rak buaipi tiah a chim.

Syllm-Rapoport hi kum 1938 ahkhan United States ah a rak peem lut i, pasal a ngeih hnuah paediatrics rianṭuan cu aa rak i otmi a si. Natein official tein Ph.D degree pek a rak si lo ruangah Philadelphia ah kum hnih a cawnchap ṭhan kha a rak hau phah i, kum 1950 ahkhan a pasal le a fale pali let’n Germany ah an kiar ṭhan i, East Berlin ah khua an sak lio cuahmah a si.#