MERS Ruangah A Thimi An Karh Chin Thluahmah

16 June: South Korea ramchung ah atu lio a tlung cuahmahmi Middle East Respiratory Syndrome (MERS) zawtnak rai ruangah a thimi an karh chin lengmang i, nizan tiang ahkhan hi zawtnak in a thimi hi minung 16 an tling cang i, midang panga taksa chungah zawtnak hmuhchuah a si rih.

Official pawl hna nih cun SKorea ahhin MERS zawtnak rai a ngei tiah theihfian cangmi 150 an tling cang tiah an chim.

Zawtnak karh aa otnak hmun pakhat, Samsung Medical Center president Song Jae-hoon nih mizapi sinah ngaihthiam halnak bia a chim. Sizung ah hin a lenglei minung mizaw lak kan i timh rih lo pinah, a lenglei mi hna nih rak palkai zong kan duh rih lo i kan khap chung tiah a chim. Hiti an ruahkhanmi hi June 24 ah ceih ṭhan a si lai. MERS zawtnak rai theihfian cangmi chungah mi 70 cu Samsung Medical Center in zawtnak kai/chawnhmi an si.

MERS hi tlangrai bantuk in cumpiit le SARS (Servere Acute Respiratory Syndrome) bantuk zawtnak phun kha a si; kum 2012 ahkhan Middle East ah hmuhchuahmi a rak si i, Saudi Arabia ahhin a zualhma bikmi zawtnak a si. 

Zeibantuk setset in dah hi zawtnak rai a tlungmi hi an i chawnh ti hi fiang ngai in theihhngalh thlu khawh rih lomi cu a si. Natein, hi zawtnak rai a ngeimi an khuh le hachiaunak in i chawnhmi a si tiah ruah a si. 

Hi zawtnak a ngeimi pawl cu an khua a sik i, an khuh pinah, thawhchuah lei harsatnak an ngei i, pneumonia le kal (kidney) chiatchuahnak tiangin taksa ṭengnge a hrawkhral khawh ti a si. 

MERS a ngei cangmi zatuak 36% nih an thihpi cangmi zawtnak a s ii, atu tiang hi zawtnak thlopbulnak ding sii-ai maw siseh, ka-kuai-se vaccine siseh a um rih lo.#