India Cozah Nih Ralzam 4,300 Rammi Sinak A Pek Hna

15 June: India ram cozah dir tharmi nih kum khat nawlngeihnak an tlaih chungah Pakistan le Afghanistan ram in Hindu le Sikh ralzam pawl a ram ah a rak lutmi minung 4,300 lengkai hna cu India rammi sinak, citizenship a pek hna.

UPA acozah nih khan a term hnihnak, kum nga chung ahkhan rammi sinak citizenship hi minung 1,023 sinah a rak pek bal ve.

Home Minister Rajnath Singh nih BJP policy cu nehsawh thlanglamhnak le serhsatnak a tongmi Hindu pawl caah India ram hi an i dornak le dinhnak thladem inn ah ser a si a ti hnu, India ram ah himnak hmuhruah ah a rak zammi ralzam paoh cu lunglawm tein don an si lai, a ti.

Nikum thimnak tuah laite zongah khan campaign-nak ah Prime Minister Narendra Modi nih Pakistan le Bangladesh in Hindu ralzam a rak lutmi paoh cu India mi bantuk tein zohkhenh an si lai, tiah a rak chim bal cangmi zong a si.

India ramchung ahhin Pakistan, Bangladesh le Afghanistan ram in Hindu le Sikh ralzam dirhmun in a ummi hi sing hnih (ting 2) hrawng an um.

PM Modi hrihhruaimi acozah a hunkai hnu thawk in khan ralzam a rak lutmi minung 1,900 cu Madhya Pradesh ah long-term visa pek an si cang i, Rajasthan ah mi 1,100 le Gujarat ah mi 4,000 cu long-term visa pek an si cang, tiah official tein thanhnak an chim.#