Mumbai ah zu chia din ruangah a thimi 90 an tling
cang i, minung 30 cu si-inn dangdang ah zohkhenh in an um liopi a si.
Atu sii-inn ah zohkhenh liomi cheukhat cu an dirhmun
a ṭhat lo tuk caah a thimi zong an um ṭhan temen lai tiah zumh a si. Zu chia
din ruangah a thimi chungah hin a tam-u cu mirethei sifak sang le veng, Laxmi
Nagar ah a ummi an si.
Zu chia din ruangah atu bantuk in a thimi le
damlonak a tongmi hna hi Cawnnithum zan le Cawnninga zingah Rathodi khua ah zu
a dingmi pawl an si. Hi thil ṭhalo a tlungmi ruangah hin Malwani Police Station
Inspector, Prakash S. Patil lengah palik haotu 3 le rianbawmtu (constable) 4 cu
an rian an ṭuanṭha lo tiah sual an phawt hna hnuah an rian in dinhter an si
cang tiah Police Deputy Commissioner Kulkami nih a chim.
Palik pawl nih atu ah zu ṭhalo an timi hi sample an
lak i, chek hneksaknak tuah dingah an kuat cang.
 |
| Zu chia din ruangah a thinak tongmi chungkhar nubik a si |
Chief Minister Devendra Fadnavis nih hi atu bantuk
thilṭha lo a tlungmi kong hi biatak tein kherhlainak tuah ding le ni hnih chung
hrimhrim ah ripawt pek dih dingin Cawnninga zan ahkhan theihternak thawng a rak
thanh cang hna.
Kum 2004 ahkhan Mubai ah hin zu chia din ruangah mi
87 an rak thi bal cang i, hi thil a rak tlungmi kong he pehtlai in aa
telhmoihmi minung 19 cu hremnak dantatnak pek an si.#
No comments:
Post a Comment