Nestle CEO Nih Maggi A Him Ko Tiah A Chim: FSSAI Nih Maggi La Dih Dingah Kampani Theihternak Thawng A Thanh

Nestle India Kampani serchuah, Maggi khohsuai cu taksa caah a him lo ṭihnung a si ti ruangah ramkulh zeimawzat nih zuar an khap cang i, ramkulh cheukhat nih cheknak an tuah cuahmah lio hna a si ve.

Nestle global CEO Paul Bulcke nih cun Maggi hi ei dingah ṭihnung a si lo a him ko tiah cawnninga ahkhan a chim i, hi lio caan ahhin Central Food Safety Regulator Food Safety and Standards Authority of India (FSSAI) nih kampani pawl sinah cun Maggi khohsuai zuar dingah an pekmi vialte hna cu la ṭhan dih hna u tiah theihternak thawng a thanh hna.

FSSAI nih hin Maggi khohsuai phun kua hna cu minung ei dingah a him lo timi le ṭihnung a si tiah an chim i, ramleng lei in a lak chinmi le zuar dingah a pekmi vialte hna cu ngol dingah theihternak thawng an thanh hna. Maggi khohsuai chekmi cheukhat ah phung nih a onhmi leng suan aa tel timi hmuhchuah a si lengah hin a thawtter deuhnak hrangah, monosodium glutamate (MSG) a-chu-muk an telh ti kha an hmuhchuahmi a si.

Cawnninga zan, zanlei in khan Nestle nih India ram ah zuar dingah Maggi khohsuai an pekchuahmi hna cu ngolter chung rih an si natein, zuarter ṭhan dingah biatiamnak a tuah ve. Bulcke nih cawnninga ah press conference a tuahnak ah, kampani nih ni zeimawzat a liamcia caan ahkhan Khohsuai batch 1000 cu chek hneksaknak a tuah tikah, an hneksakmi aphi chuak result cu a ṭha dih i, ei dingah a him dih, a ti. Vawleicung hmunzakip ah kan zuarmi pawl leti’n quality le safety standard aa khatte bak in kan tuah dihmi a si tiah zong a chim rih.

Bulcke nih India ram ah Maggi khohsuai an chek hneksaknak an tuahmi ah a him ko ti si ko hmansehlaw, kampani nih khohsuai a chuahmi vialte cu a lak dih ṭhiamṭhiam lai tiah a chim, “Zeica’htiah customer pawl nih ṭihphannak le lunghrinhnak an ngeih ruangah a si. Kampani nih cun customer pawl nih zumhngam awktlak si hi kan duh bikmi le kan i timhmi zong a si i, biapi bik ah kan chiah fawn,” a ti. 

Atutan harsatnak kan tonmi vialte hna zong hi a rauh hlan ah a felfai dih ko lai tiah a chim rih. Bulcke nih kan kampani laboratory le laboratory dangdang ah chek hneksaknak tuahmi vialte an i dannak a ruang hi kan kawl hrimhrim lai, a ti rih. Maggi khohsuai a him thlu lo minung ngandamnak caah ṭihnung a timi a chimtu, Uttar Pareadesh ramkulh ah chek hneksaknak an tuah hmasa bikmi khohsuai kha ni thla luancia (expiry date) cangmi a si tiah kampani nih cun an chim ve.

Asinatein, ramkulh dangdang Maggi khohsuai chek hneksaknak an tuah tikah a-chu-muk telhmi zat le, suan aa telmi zat zong kha phung nih a onhmi leng an pet ṭhiamṭhiam i, hi thil ruangah hin ramkulh panga Tamil Nadu, Gujarat, Uttarkhand, Jammu & Kashmir le Assam pawl nih cun Maggi zuarchuah hi an khap dih cang.

Tamil Nadu ramkulh lebang nih cun Maggi lawng si loin, Wai Wai Xpress Noodles, Reliance Select Indtant Noodles le Smith and Jones Chicken Masala Noodles tepawl zong zuarchuah rih lo dingah a khap chung rih hna.

India ramchung ah Maggi khohsuai chek hneksaknak cheukhat ah phung nih a onhmi rileng an luan timi hmuhchuah a si hnu, Singapore acozah zong nih India ram in Maggi khohsuai an ra lutmi vialte cu cawnninga thawk in khan an phih colh ve. 

Agri-Food and Veterinary Authority nih an ram chung Maggi a zuarmi pawl hna sinah cun India ram in rak luhpi rih hlah u tiah a nawl hna i, India ram serchuah an lakmi pawl hna zong chek hneksaknak tuah lio cuahmah an si hna, a ti. Chek hneksaknak aphi chuakmi a um hlan chung paoh cu an ramchung ah Maggi luhter rih lo dingah le zuar lo dingin an ti hna.#