NSCN(K) Hriamtlai Phu Haotu Khaplang Sizung Ah A Um

June 4 ah Manipur, Chandel ramṭhen ah, 6^th Dogra Regiment pawl a rak tukdoh i, ralkap 18 thihnak tiang a chuahtertu, Nationalist Socialist Council of Nagaland (NSCN-K) hriamtlai phu pawl haotu, SS Khaplang cu a damlo ruangah Myanmar ram Yangon sizungpi ah a um, tiah Press Trust of India (PTI) nih cun a thanh.

PTI ripawt ning ahcun kum 75 upa Khaplang hi a tar ngai cang tikah a thazaang zong a ṭhawng ti lo caah India-Myanmar ramri dep, Tago hmun a umnak in Yangon ah ṭhialkam a si, a ti i, hi thil kong hi Myanmar nih India ram sinah theihternak a tuah hnuah, India nihcun Yangon khualipi sizung ah chia ko u tiah hnatlakpinak a ngei, a ti. NSCN (K) le India cozah kahdaih hnatlaknak an tuahmi kha March ni 27 ah a dihmi a si.

Khaplang hi Naga miphun a si i, kum 1940, April thla ahkhan Waktham khua, Myanmar ah a rak chuak. Kum 1975, November thla ahkhan Naga National Council haotu, Angami Zapu Phizo nih Shillong Accord a rak tuahmi cu NSCN-IM haotu pahnih – Isak Chishi Swu le Thuingaleng Muivah leti’n an rak dohdal i, Nationalist Socialist Council of Nagaland (NSCN) an rak dirh i, an nikarlak ah theihthiam lonak a rak chuah ṭhan tikah, Khaplang nih kum 1988, April ahkhan NSCN (K) hi a rak dirhmi a si.

Khaplang hrihhruainak tangah kan hnu nai chungah khan India ram nichuah-chaklei (northeast) chungah a ummi hriamtlai ṭangrual phu pawl, United National Liberation Front of Western South-East Asia (UNLFWSEA) dirh a si i, Assam i hriamtlai phuhnih –ULFA (I), NDFB(S) le PLA hna zong an i tel i, Manipur i hriamtlai ṭangrual phu pawl Coordination Committee (CorCom) zong nih an hnatlakpimi hnami a si.