America Ram Ah Zika Virus

Pan American Health Organization (PAHO) buu pawl nih cun America ram ah minung million 500 hna hi Zika virus zawtnak rungrul a ngei kho dirhmun ah an dir tiah a chim.

PAHO Zika incident manager, Sylvain Aldighieri nih, “A luancia kum 15 chungah Dengue le Chikungunya virus rungrul a umnak ram pawl ah, Zika virus a um ve sual kho i, hi ram hna hi thinphan biknak ram cu an si” a ti. 


Hi ruangah hin Middle America in Latin America, Argentina chaklei le Carribean ram tiang khin Zika zawtnak rungrul hi a leng kho pengmi a si a ti.

Aldighieri nih America ram ah Zika virus hmuh khawhnak ram hi ram 37 an tling cang tiah a chim i, hi chung i ram panga ah hin hi virus nih a chuahter tiah theihhngalhmi, hngakchia chuak bawhte chungah tlamtlinglo i chuah, bawhte dang nakin an lu a fa deuhmi pawl an um kong ripawt a um cang tiah a chim fawn.

Zika vaccine (ka-kuas-si) hi tuchun ni tiang an hmu kho rih lo i, US National Institute of Allergy and Infectious Disease nih September thla ahkhin Zika vaccine cu hneksak an i timh kong an chim. Director Anthony Fauci nih an vaccine serchuahmi hi kum 2017 thawkka ahkhin a ṭhat le ṭhat lo cu kan theih khawh ceote lai tiah a chim.

Zika virus hi fikfa phunkhat, Aedes species timi sehnak in ngeih khawhmi zawtnak a si. Hi zawtnak a ngeimi hna cu, khuasik, takthah, le ruhcang fah an ngei i, an mit a sen, asinain hi zawtnak a ngei i a thihpimi belte hi an tam theng rih lo.@