Britain Ah Kum 30 Tang Mirum Cazin Ah Adele Le Rooney An I Tel

Britain ramchung kum 30 tanglei mirum, The Sunday Times nih minung 10 a thimmi chungah vawleicung hlasak thiam minthang Adele, Footballer Rooney le actor Daniel Radcliffe tezong an i tel hna, asinain a rum bik panga chung bel ah an lang kho lo.

Britain ramchung kum 30 tang mirum bik cu Fashion leiah mi hlawhtling, Tom Persson, kum 30 mi a si i, a ngeichiah zat hi £ million 672 a si. (US Dollar 1.44 le British Pound Sterling 1 an i tluk). 

Tom Persson hi British miphun kek ticawh lo timi kha cu a si lo i, Swedish miphun, Britain ram ah a ummi a si. Ealing ah Met Film School in cawnnak a dihmi a si i, inn a ngeihmi lakah a roling bik cu Wiltshire i a ngeihmi kha a si.

A rum bik pahnihnak cu Fawn le India Rose James te unau hi an si i, kum 30 le kum 24 mi an si. An ngeihchiat zat hi £ million 482 a ti i, an pu sinin an hmuhmi ro a si. Nikum ahkhan Rose nih hin Artist hmanthlak suaithiam pawl nih an suaimi chiahnak hmun, Soho Revue cu onnak a rak tuah. Atu ahhin Rose a dawtcuk hi Yarborough earl pariatnak fapa, William Pelham a si.

Electric thilri lei kongah theihhngalh a hlawh hringhranmi, Thomas Mackie te chungkhar hi ngeihchiat rum lei ah a pathumnak kha an si i, an ngeihchiat zat hi £ million 380 reng lo a si. Thomas Mackie hi kum 28 mi a si i, electric thilri, wholesale in a pechan tawntu, CEF Holdings dirhtu i a tupa a si. Kum 2014-15 chungah an sipuazinak in thil an zuar khawhmi dihlak man hi £ million 504.2 lengkai a tling.

Property le rang tlik zuamnak lei zohkhenhtu, Tim le Pollyana Gredley te chungkhar hi palinak dirhmun ah an um i, £ million 194 an ngeihchiat a ti. Bill Gredley hi property developer a si i, rang tlik zuamnak hmun ngeitu a si ṭheo tawn, amah hi kum 83 a tling cang tikah, a fale nih pehzulh in a rian hi an zohkhenh cangmi a si.

Kum 30 tang mirum thimmi lakah panganak, Pete Cashmore hi an chungkhar sipuazi lei le ro le rah in a rummi si loin, mah kutke tein mirum sinak dirhmun a phan khomi mirum top 30 lakah a lang umchun a si. A hlawhtlin biknak cu internet a si. 

Kum 19 mi a rak si liote in khan amah khandal chung in Mashabel website a rak tuahser i, kum 2014 a hun phak khan cun vawleicung website zoh duh bik le len a tong bik le a hlawk lei pawl dirhmun a rak phan cang. A ngeichiah rum zat hi £ million 170 a ti.

Wayne le Coleen Rooney hna hi paruknak ah an i tel i, an pahnih an ngeihchiat zat hi £ million 96 a tling i, hlasak thiam Adele hi pasarihnak a si ve, £ million 85 a ngeih tiah ruah a si. Harry Potter cangtu (actor) Daniel Radcliffe cu pariatnak a si i, £ million 74 a ngeih tiah ruah a si ve, pakuanak ah £ million 70 a ngeih tiah ruah a simi, Chris Phillips a si i, Twilight cangtupa (actor) Robert Pattinson cu 10-nak ah a lang kho ve, a ngeihchiah zat hi £ million 65 a ti.#