Daniel Craig Cu James Bond Film Thlak Aa Tim Ti Lo, Aa Din Lai

Spectre timi film a chuah hnu in khan film thlak a pehzulh ding le dinglo kongkau ahhin bia lengvak tampi a hung um hnu, Daniel Craig nih James Bond film pehzulh in thlak kaa tim ti lo, kaa din cang lai tiah fiang tein a chim.

Daniel Craig nih hin Metro Goldwyn Meyer haotu pawl sinah James Bond character hi pehzulh in thlak kaa tim ti lo tiah fianghlang tein a chimh cang hna. James Bond film aa thlami vialte hna lakah Daniel Craig hi phaisa a hmu tam bik a si i, Bond film aa thlakmi a dihlak hi pali a si i, hi pali aa thlakmi chung in £ million 38 renglo a hlawh manhmi a ti.

Kum 2005 in khan James Bond film thlak hi aa rak i otmi kha a si i, amah aa thlaknak James Bond film pali in phaisa an hmuhmi dihlak hi £ billion 2 lengkai a ti, MGM phaisa lei in harsatnak a rak ton liopi kha rak si kaw, a tluthai kho men tiah an timi kha, amah ruang bak ah ningkel pangai ah a hung dir khawh phah ṭhannak zong a si.

Insider nih an phozar ningdan ahcun MGM nih hin Craig hi James Bond film i thla ṭhan dingin an lem i, £ million 68 khengte bak hlawhter dingin an ngamh tiah a chim. Asinain Craig nih hin hi zozai phaisa zong in awk tarhhnawh le sio tim ko hna hmanhseh James Bond film i thlak ding hi aa tim ti lo, kaa din lai a ti. 

Hiti atu bantuk in thlak nolh ṭhan a timh in aa timh ti lo ti kha an hngalh ruangah studio haotu (MGM haotu pawl) nih lungthiang tein chuahtak dingin hnatla an ngei kho cang. Nikum i tonbiaruahnak an tuah ahkhan Craig nih hin Bond film i thlak ṭhan ding nakin cun ka banrek ruh i khiah hmanh hi ka duh deuh ti tiang in a rak chim bal. 

Studio lei haotu pawl nih cun Craig i Bond film pehzulh in i thlak a duh ti lonak kong he pehpar in thawngthanhnak an tuahmi ah cun a khup a ṭhat lo ruangah le, amah hrimhrim ve zong a thazaang a der le a bat ve cang ruangah a si tiah an chim. Cun aho nih dah Craig hi a chawn kun lai ti hi an chimcaih i an i buaipi colh cangmi a si i, micheukhat nihcun Thor film ah Loki dirhmun ah aa cangmi cangtupa (actor) Tom Hiddleston a site lai tiah an zumh ngai.

James Bond character hi caṭial thiam Ian Flemming nih a rak dirhmi a si.

James Bond film hi a dihlak an i thlak cangmi film 24 a tling cang.

James Bond film cangtu (actor) pawl hi an dihlak ah minung pasarih an si cang i, Roger Moore hi film pasarih a thla i, amah hi James Bond film aa thla tam bik a si.

James Bond film ah aa thla hmasa bik cu Sean Connery a si i, James Bond film ah a chuak hmasa bik, Dr. No let’in khan film paruk ah aa ra thla.

George Lazenby hi aa thla tlawmbik a si i, ‘On her Majestry’s secret service’ lawng ahhin a si.

Kum 1962 ah Dr. No film an rak chuah dih hnu in khan spy film tuah cu vawleipi hmun zakip ah an hun ot lulhmalh cio i, kum 1966 tiang ah khan hi bantuk film lawngte tingawt hi 22 bak a ra chuak manh!#