Vawleicung Khualipi Nuam Le Ṭha Bik Vienna

Mercer Quality of Life Survey nih vawleicung khualipi 299 chungah zei khualipi dah a nuam le ṭha bik ti cu dothlatnak an tuah tikah, a hun hmuhchuahmi cu Austria khualipi Vienna hi a si. 

 

Hi survey ah hin khualipi cheukhat pawl cu ngandamnak lei ah i zohkhennak tehna, fimcawnnak hmunhma le cawnnak lei an kalpi ning a ṭhat le ṭhat lo tehna, inn tehna, environment thil dangdang pawl an hlathlai hnuah, Vienna khualipi hi umnak dingah dotla bik khualipi ah an thim. Khualipi ṭha bik le dotla bik thimnak ah hin German holh hmannak khualipi pawl tam ialte an lang hna. Austria hi German holh hmannak pakhat a si.

New York, Paris, London tehna pawl hi khualipi minthang le langsar, fashion lei lebang ahcun vawleipi a hruaikawitu ah chiahmi si ko hna hmanhseh, umnak hmun taktak hrangah cun hi khualipi pawl nakin a nuam le ṭha, dotla an rak um lengluang ko.

Umnak dingah khualipi nuam bik changtu cu German holh hmannak khualipi, Switzerland khualipi Zurich hi a si. Switzerland ramchung nichuah lei ahhin German holh an hman. Zurich hi thil man fak le fah lo kongkau ah cun zohchun bik a si lem lo natein, thil man fak ngai ko hmanh sehlaw, tahfung an hmannak phun dangdang ah ṭhat lei in a tlinh ngaimi a si i, pahnihnak ah chiah a si.

Pathumnak cu New Zealand khualipi Auckland a si i, Europe ramleng in thimchuahmi chungah cun khualipi nuam le ṭha bik sinak sang cem a phan khomi a si. Top 10 ahhin pasarih cu Europe ramchung lawngte an si i, hi chungah pathum cu Germany chung khualipi pathum, - Munich, Dusseldorf le Frankfurt hna an si.

Hi atu bantuk khualipi thimchuahmi ahhin sinak sang dirhmun a phan kho cu Europe, Ocenia le North America deuh ngawt an si i, Asia ramchung in sinak sang a phan khomi cu Singapore a si i, 26-nak a si. 

Khualipi langsar minthang lakah Berlin, Germany cu 13-nak, Paris cu 37-nak, 39-nak ah London, 44-nak ah New York, Hong Kong 70-nak, 75-nak ah Dubai, 117-nak ah Rio de Janeiro, 118-nak ah Beijing, 129-ah Bangkok tehna an si. India ram ah cun Pune hi a sang bik sinak a phan khomi a si i, 144-nak, 145-nak Bangalore, 150-nak Chennai, 152-nak Mumbai, 160-nak Kolkata, 161-nak ah New Delhi tehna an lang kho ve.

Minung umnak hmun nuam le ṭha bik bik (10)

1 Vienna, Austria

2 Zurich, Switzerland

3 Auckland, New Zealand

4 Munich, Germany

5 Vancouver, Canada

6 Dusseldorf, Germany

7 Frankfurt, Germany

8 Geneva, Switzerland

9 Copenhagen, Denmark

10 Sydney, Australia