A Fanu Pasal Ngei Thlahnak Hringtu A Pa Hmurka

Nihin ni cu zeibia ka chim ding zeiti ka ot lai kai harh hringhran ko zeihmanh siseh law a poimawh bikmi mo ngeitu ding chungkhar lei hoih deuh in kaa thawk ko lai.

Kan theih bangin atu in cun ka fanu dawt cu chungkhar thar nan sinah a rak ra cang lai. Cu tikah, a caah cun a hmaasa bik le biapi bik ah a chiah dingmi nan si ko cang. A nun hman nakding ah a herhbik dingmi mawh a phurtu ding zong nan si cang lai ruangah hal duhmi kan nei ko hna. Zaangfahnak tein ka fanu hi nuam tein nan rak ka zohkhenhpiak lai.

Keimah zong nih kai kam i, kai fianmi cu nuamte in nan chiah hrimhrim ko lai ti hi a si. A hmaanning tein ti ko lo ahcun a chungkhar hlun nakin, atu a chungkhar thar ah hin ai lawm in ai nuam deuh hrimhrim lai ti zong ka hmuh hrimhrim khawh caah hin kai lawmhnak a zual khun ko. 

Zeikhom siseh, pa ka sinak bantuk tein, ka fanu lawmhnak le nuamhnak ding hi a pakhatnak bik ah a chia zungzalmi ka si bantuk hin ka von chim ṭhan ri ko lai, ka fanu hi nuam le lawm tein nan rak ka zohkhenh piak lai mu.

Ka fanu hi lungfahnak a ka petu le thilrit ka caah a chuahtertu a si bal lo. Asi tak ko, a hmaan, ka lawmhnak bik a hram le ka damchan cu amah hi a si deuh lehlam!

Nihin ahhin ka fanu cu Pathian nih minung hna si hna seh tiah a kan duhpiak ning bangin, Pasal a ka neihtak ve cang lai. A puitling ve cang tinak a si ko cuta mu.

Kan innchung khurkhar ah lawmhnak phurtu a si zungzalmi ka fanu hi chungkhar thar a umnak ding zongah lawmhnak chuahtertu le phurtu si ve zungzal hram ko seh.

Kei ka vawleipi cu nan sinah kan pek cang hna i, zaangfah velngeihnak he par bang parter ve ulaw, ṭhate le felfai tein rak zohkhen hram ko u.

Ka hrang ah, ka suifanu ngeihchunmi cu nan sinah kan pek cang hna lai i, zaangfah tein bawinu bangin rak ka zohkhenhpiak hram u law, rak ka dawtpiak u.

Thi le thau cawh in le thlan hripi tla in ka rak zohkhenh puitlintermi a si.

Dawtnak a ngeihmi hna, zaangfahnak a ngeihnak le duh a nunnak hna nih chungkhar thar cu zohkhenh hram ko seh. Asinatein nuam le lawm te chia dingin kan hal ve rih ko hna.

Nan duhloning in maw siseh, nan i lawmhlo ning in maw a um sual asi ahcun, sica ulaw, nun chimhring ulaw, cawnpiak zungzal fawn u. Asinatein serhsatnak in si loin dawtnak le velngeihnak ngei bu tein chimhring u, rak cawnpiak tawn u mu.

Ka fanu dawtte hi cu aw… a kekkuai kho thil bang domhtlaih a herh caah a si ko.

A lungdongh i, lungretheih caan zongah a pawngte ah umpiak peng ulaw, nan duhpiaknak le ruahnak langhter ve tawn ko umu.

Tlangrai le zawtfah damlonak nih a tlunh caan ah dawtnak he zohkhenh u, zeica’htiah cucu anih caah cun damnak sii-ai ṭhabik a rak si ko hnga.

Chungkhar khuasaknak ah a ṭuan ding rian a tlamtlinh lo tiangin a tlonlen si ahcun khuasak phung ningcang cawnpiak u. Sihmanhsehlaw cucu dawtnak ngei tein cawnpiak u, zeicahtiah chungkhar thar ai thawkkate a si caah a si. Theihthiamnak nganpi ngeih in zohkhenh kha a herhbikmi a si lio caan a si.

Ka nunnak chungah a sungbik a simi ka fanu cu nan kutah a um cang, kan chanh cang hna, cu ruangah kan nawl ṭhan ko rih hna lai mu – nuam tein rak zoh hram u!

Ka mopa dawtmi, atu ka chimmi bia hna hi ka duhnak na ka theihpiak ko lai dah tiah ruahchannak ka ngei ko. Asinain, Pathian thawngin fasem nan hun cawi vete lai i, fanu zong na hon nei vete lai. Cu tikah cun atu ah ka chimmi bia a duhnak le sullam taktak cu na rak hngalhthiam vete ko lai. Ka fanute hi nuam le lawm tein na rak chiah lai mu.

Lawmhnak, hnangamnak, theihthiamnak le dawtnak nan cungah tlung zungzal ko seh!

Bawipa nih thluachuah a hmumi nuva chungkhar tha zohchun tlak ah vel in ngeih ko hna seh! Kaa lawm tuk hringhran.

(Theihternak: Hi cabia hi online chungah hun char chinmi a rak si, a ṭialtu min aho a si ti kaa rak fim chih lo sual. Theihṭha ngai a si ve ko tiah a hnu ceo ah ka hun thlah hi a si.)