Hidden Camera le Two Way Mirror Zeitindah Kan Theihhngalh Khawh Lai?

Hidden Camera: Hi bantuk thlithup tein zoh nakding caah an thuhnawhmi camera hi a fate a si caah khoika zawn ah dah an chiah ti kha hngalh khawh a si lo. Cu ruangah hi an thuhnawhmi theihkhawh nakding lam fawi bik cu; Nai ṭhumhnak riahbuk (hotel) na luh bak in zeidang thil na tuahto hlan ah camera a thli tein an chiah le chiah lo na chek ta tawn lai.

Cu thil an thuhnawhmi cu zeitindah kan theihhngalh khawh lai tiah cun;

Na mobile phone ah balance ṭha tein na neih ko bu le network zong ṭha tein na zoh i a kal ko bu khan mi pakhatkhat kha na hei chawnh (call) chun hna lai i, chawnh a ngah lo a si ahcun hi ka umnak khan (room) chungah hin mizei maw nih camera an thuh/chiah ti khan a hngalh lai. Phone call na tuah i, na call khawhlonak a ruang cu na phone nih network tlaih ding a range a kal ko mi kha Optic Fibre cable timi nih a rak hmuh (detect) i hnahnawhnak a rak pek caah khan a si. Nangmah le na pawngkam velchum hrawnghrang kha vedio camera nih a rak thlak len ko cang ti kha i fian colh ding a si lai.

Two Way Mirror: Nai ṭhumhnak riahbuk (hotel) khaandal ah maw, Bathroom ah maw, thilhruk thlennawnnak (try room) tbk. ah thlalang a rak um lai i, mah cu thlalang in cun na bihzoh len, asinain na zohbih hlan ah kaa bih zohnak thlalang an chiahmi hi thlalang pangai a si maw, si lo? Ti kha ṭha tein zoh/chek ta tawn. Na theih lo karte khan na hnunglei in rak in hmuh khawh na si diam kha philh hrimhrim hlah.

Cucu zeiti’ndah kan theihhngalh khawh lai tiah cun? Thlalang khan a kutdong khan hun tong law, thlalang le kut karlak ah a lawngmi (space) a um lo a si ahcun Two Way Mirror tinak a si i, hihi nangmah a thli tein na muihmel hmuh zohnak dingah an chiah ti khan a theih lai. Nangmah nih cun na mui lawng na hmuh lai, asinatein khan dangin khan na tak nai kholh lio maw, thil thlennawn lio tbk. hna kha an rak in hmuh ziar khawh pengmi a si.

Asinatein na kut le thlalang karlak ah a lawngmi (space) a um a si ahcun thlalang pangai a si ko tinak a si caah zeihmanh lungṭha lo le lunghring in um ding a si lai lo.

Hi a cunglei phunhnih hna hi zei ruangah dah kan hun ṭial tiah cun Laimi chungin Kawlrawn leiah siseh, India ram lei zongah siseh, ram cangkang tbk. khualtlawng lamli mi hi kumkhat hnu kumkhat in kan tamchin lengmang cang. Mi cheukhat cu khua va hmuh duh  ah le cheukhat ve cu sipuazi sumdawng in atu le tute a kal lelek zong kan karhchin lengmang cang.

Hiti bantukin kan tlunkal caan ahhin a tam u cu phaisa ngei deuh hi kan si ko hna i, phaisa ngei lo ngaingai hi cu kan um lem hna lo i kan ngeih ruangah siseh, rian he aa pehtlai in a herh ruang zongah kan tlawnnak a si. Cu tikah khual kan tlawn tik riahbuk (Hotel) cangkang taktak mi ah aa thum lenmi zong kan um kho cang hna i zeitluk in dah lunglawmh awk asi. Asinain cuti lunglwamh awk a si rualrual in cun kan rak i ralrin ding zong hi an rak tam lengluang ve hoi cu lakah a biapi ve ko theih awktlak a si ve ko hlah maw tiah ka ruah ruangah tutan ah hin ka hun ṭialnak cu a si.

Hmundang kadang dang i khualtlawnnak ahhin kan i ṭhumhnak Hotel hna zong hi an i dang cio ve i, atutan ah ralrin ding tiah phunhnihte ka hun langhter mi hi kan i ṭhumhnak hotel bedroom, tbk. ah a um lo zong a si kho men, asinatein cheukhat hotel ahcun miṭhalo hna nih an thuhnawh mi le an chiahmi hi a um ṭheo tawn caah tutan ah culak i kan him khawh nakhnga theihtlei ah cang ve hram seh ti sa duhthahnak he hun tarlangh ka duhnak a ruangbik cu a si.

Cun dawr ah thilpuan kan cawk tik zongah hnipuan hruk-aih chunnak (try room) kan kal hlan ah camera an thupnawk el maw, ello dah? Ti kha mah pumpak cio nih theihkhawh nakding lam phunhnih hin hngalh khawh i zuam cio ding a si ko cang.

A bikin kanmah he aa naihbik a simi Mizoram a ummi kan unau pawl zei sualnak a tuahlomi hna cheukhat nih cun hi bantuk hi an ton lulhmalh cang ti a si. Cu tikah kannih cio hna zong Mizoram le Vairam siseh, hmundang kadang ram cankannak kan i chawhleh ve leng cang tikah hin kan tong lai lo ti hi ahohmanh nih kan chim kho hrimhrim lo cucaah cun hi bantuk mual i phohnak le zoza i langhnak hna hi kan tonlonak ding caah le kan himnak dingah a hlankan tein ralrin dingah kan sawm hna.

Hi a cunglei thil phunhnih hna hmang in hin nungak tleirawl zei sualnak a ngei lomi hmanthlak pawl in hin mi zoza langh le thangchiat an hman tawnnak hi a si. A bikin nu hna hi kan i ralrin deuh cu a haumi a si.

Cucaah cun khoika hmun kan kalnak le khual kan sinak hmunhma ram cio ah fimkhur tein um i zuam cio hram hna usih tiah kan sawm hna.

(Theihternak: A cunglei “Hidden Camera le Two Way Mirror Zeitindah Kan Theihhngalh Khawh Lai?” timi hi Mizo le Burmese ta hun zohchih in hun lehcawhmi a si caah a ruahzia nan ka thiam naklai kan nawl hna. Cun hi hun lehcawhmi ahhin Mizo deuh kha hun chirhchan deuh a si ti zong kha ka van chim duh ṭhan rih. Kai lawm ngai. Calettu: John Zilpici Cinzahh)

Vaupi {April} 2013

New Delhi

India

****