Ramdang Um Le Busy

Minung hna kan khuasak tintuknak ah rianṭuan cu a hau hrimmi a si. Laitlang kan khuaram kan um zongah rian cu mah le sining hoih in ṭuan cio kha a  rak si ko. 

Ram rum le ṭhangcho cangmi hna sin kan um tikah cun rian ṭuan caan zong cu a va sau deuh ve. Zeica’htiah cun inndai tang le thilsiamnak sehzung phunphun hna ah ṭuan a si i, chun zongah siseh, zaan caan tiang zong in rianṭuan khawh kha a si cang. 

Sihmanhsehlaw cuti bantukin kan ram ahcun ṭuan a si thiam ve rih lo khi a hei si ko. Zeitik ahdah chun he zaan he kan ṭuan ve khawh hnga?

Chun le zan in ram ṭhangcho hna bang ṭuan khawh lo ruangah buai le bai, manh lo (Busy) caan an nei lo, an i manh ti ding khi kan hman lo ding a si zia zong hi ruah ding a si hnga. 

Zeica’h kan tiah minung hna nifatinte kan nunnak ahhin kan umnak ram sining le mah le tawk cio tein buai le manh lo (busy) nak tete hi cu a tlawm maw, a tam ah ngeih cio viar khi a si tawn. Cucaah kan umnak aa dan bang buainak, manhlonak (Busy) zong aa rak i dang. 

Vawleicung ahhin a buaibai asiloah manh lo (busy) lomi ngaingai hi rak um a si rua lo, kan um lo ti hi i theihpiak thiam khawh ahcun cucu ahopaoh caah a ṭha tuk hnga.

Voikhat Mizoram, Aizawl khua ka um lioah ka pu nih hitin a rak chim bal, “Kannih Laimi ramdang a kal mi cheukhat pawl hi dah ngai an kan chawnh paoh ah ka buai, manh lo tuk (busy) le timi hi an chim lengmang, mi an neng ngaite; ramdang  an hei um thawngin kan upat hna nakding zong a um lo i, an busy hlei nakding zong a um hlei lai lo. 

Kan busy ti lawng hi an i theih le mi hi a busy ve lo ah maw an kan rel hnga zei dek,” a ti. Ka ruah ve tikah a hmaan tuktak hi ta tiah ka ti. Umnak ram aa dan bangin buainak, manhlonak, le ṭuanmi tu an rak i dan bia khi a rak si.

Ramleng a ummi ka hawi pakhat nih phone a hun ka chawnh, “Kei cu sianginn kai si peng ko ee, ka busy kho tuk, manh caan khi ka ngei bak lo hi…,” a ka ti. Cun ka hawinu ṭhiam he Email in kan i chat chawn, “ Kei cu rian ka ṭuan kho lo, inn lawngte ah kaa benh rih ko fasem ka cawi lio cu a si le ka busy kho tuk manh caan ka nei kho bak lo..,” a ti. 

A dang pakhat nih, “Rianṭuan peng a si ko, na hung phan lai le na theih ve te ko lai manh caan a neih in neih khawh a si bak lo, busy peng a si ko…,” ti khi a si ve hoi cang. A busy lo, rian a ṭuan lo le rian ngei lo, aa manh tuk ah an ka ruah diam ko khi ka lawhter; midang cio zong an si ve cio lai ka zumh.

Lairam zongah ramdang bangin sianginn kaimi an kai ve ko, rian ṭuan mi an ṭuan ve ko, innlei rian ah a tuaitaam in a buai mi le manh lo khin a busy ngai mi zong um a si ve len ko. Zeipi khi i dannak le ka buaibai busy t’in ramdang kan um ruangah i ti hlei nakding zong khi a si lo. 

Ramdang kan um hlante khan busy ahcun busy khawh diam khi a si ko. Lairam kan um lioah kan rak i manh tuk (busy) bia tu deuh dek a si, cu kan rak um lio bantuk khan kaltak a simi kan ram a ummi cu kan ruah hna khi dah a si hnga ti zong ruah awk ngai a um ve hoi. Hun ruah ṭhan tikah busy ti hi kan rak uar pah ve hrim khi dek a si ko rua ka ti. Kan ram tel chih in vawleipi hi a busy tihi kan ruah hrim lo bia tu khi dek a si deuh.

Ramdang um sianginn kaimi, inn ah um in fale bultawl le, rianṭuan mi tibantuk cio in kan busy ti khi a si, a hmaan ko. Na tein kan ruah awk pakhat tu cu khoi zeika hmun paoh ah cubantuk cu a cangmi thil khi an si i Lairam zongah a cang ve peng mi thil a si ti kha kan ruah ve a herh.

Minung cu kan umnak hmun cio in manh lo le rian he t’in um peng le i tuaitaam peng cio khi a si. Kan umnak Lai khua tete zong khan manh lo (busy) ti khawh khi a si. Natein a tam u kan sining ahcun ramleng a chuakmi deuh hi phone a chawntu si chapchap lo ah kaa manh lo ti hi chim a tam ngai tawn. Mi he phone kan i chawnh tikah khin busy ti khi a phung a si lo, cun a hei chawntu lebang nih cun hman lo ah a ṭha a phung zong a si lo. 

Mi pakhatkhat kan hei chawnh hna maw tikah khin kan hei hnahnawh, buaibai, manhloter ti zong khi ruah a hau i, kan pahnih khan kan busy ti theih ah a ṭha. Phone kan hei chawnhmi hna nih khin cun a duh ahcun ka busy tiah a ti khawh, natein a chawntu nih khan cun ka busy ti khi cu chim phung zong khi a si lo. Kan busy ahcun phone chawnhnak caan zong cu kan nei kho hnga lo; caan karlak kan hun tenhmi a si zongah busy ti ding a si lo tenhmi cu tenh a si i, kan hei chawnhbiakmi minung hna nih an caan ṭha ah an kan tenh ve ti zong ruahpiak awk ngai khi a si.

Rian kan ṭuanmi kong he pehtlai in kan ṭuannak kong maw, zing in zaanlei suimilam cuzat tiang ka ṭuan le kaa manh caan cu tbk., cu pakhat le khat i chimh phung a si. Natein chim lengmang a haumi a si lem lo. Cu tikah phone chawnh paoh i manh lo hnawksabur (busy) in umnak kong chim khi cu; ka fel tuk ka ṭuan tuk i ti le cua zong a lo. 

A langtlang ummi kan si, ram aa dannak hmun ah a ummi kan si hna tikah kanmah bang an i manh lo kho ve ti zong hi aho paoh i ruahpiak thiam ah a ṭha bik. Cun Lairam ahcun mah pumpak rianṭuan a si deuh tikah mah duh caan ah mahte ṭuanlo khawh off a si.  

Nain ramdang ahcun mi kuttang company ah a ṭuanmi si ruangah duhning in dinh caan pek khawh lo kha a si ve.  Cucu i dannak cu a si. Umnak cio ah mah tawkte cun rian  le khai ngeih cio khi a si ti kan i philhpiak lo ding a si. Khuazeika hmun le ram kip ah cu bantuk buaibai, manhlo (busy) cu nifatin a um i, a cangmi thil tete an si ko hna. 

Cu tikah ramdang um ruangah ka buaibai manh lo (busy) ti hman hi cu kan chimnak minung hawi zeihmanh a tuahlo kan lawhter tuk hna. Kei cu rian dawh ka ngeih peng cu ka ṭuan tuk le hi tiah mah le mah fak hoi khi kan lo cang. Kan I mah lonak cu kanmah le pumpak te manhlonak a si ko cu tikah phone in maw mi kan chawnh tik hna ah busy ti hi cu chim lo ahkhin a ṭha hnga maw ka ti ṭheo tawn? Kan busy ruangah a pel hmanh hlawknak a neilo mi sinah cun chim lo ah a ṭha bik lai.

Cucaah cun minung hi ramrum le ṭhangcho kan phakphanh ruangah kan busy buai le bai nih a kan ciah khi siloin kan umnak hmun le ram he aa tlakning tu in mizapi hi kan rak buaibai manh lo (busy) cio tu a rak si deuh. Cucu pakhat le khat i theihthiam kan hauhnak cu a si. Ram ṭhangcho le ramdang kan um ruangah kan kaltak mi kan ram i a ummi minung an buaibai lo, an i manh tuk, rianṭuan awk an nei lem lo ti ruahnak kan ken sual ahcun cu ruahnak cu a palh cikcek mi ruahnak a si hnga dah. Hi kan umnak vawleipi a chung ummi ahhin rian ngei lo ahohmanh an um lo, rian cu ngeih viar a si nabeltein ṭuanmi tu hi an rak i dang hna ti hi kan theih cio awk a si.

Zing {September} 2012

9:05am Saturday

N. Delhi- 110059

India.