Hla Kan Sakning Hi Thlen A Herh Cang

By. John Zilpici Cinzahh

L

aimi hi hla kan sak tikah hin zoh i hlasak hi kan hman le kan uar phah tuk  tikah tuchun ni tiangah thinh awkah a har ngaimi thil pakhat ah a cang ri ko rua. Cun hlasatu hna style pakhat bantuk ah a cang lan cang hlah maw ti awkte in hin a um cang rua ka ti. Zei ruang bik ah dah zoh thengmang bu in hla hunsak hi kan uar hnga? Zohlo tein hlasak hi kan i zuam hna hnga lo ti zong hi a caan tete ah ka ruah len zong hi a tlawm ti lo dah ka ti.

Hiti ka ruahnak a ruang bik cu hei ṭhinh kho cang hna seh law a va ṭha hringhran hnga dah ti ka duh tuk ruangah khin a si bik ko. A zei dang awṭhat le ṭhatlo ah cun kanmah le kan sining tawk tein cun a za bakmi kan si ka ti ko. Sihmanhsehlaw pulpit cung asiloah donhhlei cung i kan hun kai i cahnah tein maw, cauk in a si ah zoh bu tein hla kan sak lengmang mi hi cu zoh a chia tiah ka ti i, ka sia a ra rem ziar lo hi avoi a tam cang i ka caah cun celh chuak lo bak khi a si cang in ka hngal. Zeica’htiah hla le ringawn lei hi ka uar ruangah a si ve pah men lai dah, a sak cu keimah nih ka ti khawhmi thil cu a si ve lem lo.

Casette Album tape phel aa chuah cangmi hlasa kan i ngeihmi hna nih hin cun an album an i chuahmi chung hla paoh kha cu zeitik caan paoh ah by-heart tein sak khawh dingah ready bak si peng kho hna seh law a ṭha tuk hnga.

Cu ti an tuah a si ahcun a ralaimi hmailei chan zongah aa dawhmi kan hnu zulh awkṭha kha a si lai tiah zong zumhnak ka ngei. Zeica’htiah miphun dang ti ko usih law annih cu an album an i chuah cianak chungta Pathian hla maw, dawtnak zuun hla maw, ram hla maw, an si ah stage cung le biakinn chung tbk. i hlasak fial an si tikah zohlo by-heart tein an sakpiak ṭheo tawn hna kha mithmuh kuttongh in theihhngalh a si.

Asinain kannih Laimi ve cang cu hika zawnte hi kan chambau bik ko rua dah ngai ka ti. Zohlo tein a sa kho mi hi an tlawm ngaingaite. Guitar huntumh i hunsakter hmanh ah aa ua-aa rihmi tape phel hlasa hi kan tam ngaingaite. Ningzah tuk awk kan si. Kan hla album chuahcia hmanh maw by-heart in hin kan ra sak khawh lo le cinken huam rumro lo hnga timi zong ka ruat len. Kan Lai hlasatu hna nih pawcawm nakding tlak in hlasa dirhmun phak te lai ding cu atu lio kan hlasak ningcang zoh ah cun a har rih ko men lai dah. Zeica’htiah by-heart tein hla a sami le by-heart hlasak ah a tuimi le cawlcangh a thiam lomi kan tam ngaingai rih caah a si.

Voikhat ah Hlasak thiam pakhat a min cu ka chim lai lo cu amah ṭhitumnak puai ahcun ka ra kal ve bal. Cu ahcun Lai hlasa zong cu Album pahnih thum hrawng ai chuah cangmi hna minung pahnih thum cu an rara kho ve. A nuam ngai lai tiah zong ka ti i, an hlasak lai kaa ngaih dom. 

Tikah zan caan ahcun upa hna nih cun mah na hla kha an hun ti, guitar cu an hun tum. Ka ngaih ziarziar ve ko i, anti mi paoh hi ka by-heart lo a ti viar ko ai! Ka khuaruah a har bak ko a ar khin ka ar cu bantuk cu dah ngai! tiah ka lung chung tein cun ka phun len. Ka rak i ngaihziarmi kha a zeihmanh lo viar ah cang ai. Midang zong keimah bang an si ve men lai dah!

Patung le tlangval pawl nih cun a siahcun na by-heart lonak zawn tete cu sa duh kun hlah na thiamnak lawng kan sakpiak ko kun an van ti. Amah ve zong nih cun asiahcun ka thiam deuhmi le by-heart deuh mi selaw kan sakpiak hna lai a hun ti. Ka hmai aa vun panh deuh ngaite. A hun sak ciammam cu a tlangpi in a chorus le thawkka hrawng deuh hi tluang tein a sak khawh hna i theih/cinglonak a dang paoh kha cu... Na..na..na... ti’n a sa. Cu ticun an hun fial lengmang ṭhan tikah a sak ve ceomau ko natein a hlasak mi kha pakhat hmanh a dihdongh tiang a saknak ka hngal ruam lo. Keimah nih hlah maw ka ra by-heart deuh ziar mu titiang in khin ka ti phah.

Ka chim duh bikmi cu zeicah ahdah kan hlasak thiam pawl hi anmah nih an sakmi hla ko ko le hla cia cung ta hmanh duhduh mama in sak fial tikah hin an kan sakpiak khawh hnga lo. Hi zawn ah hin Lai hlasatu hna hi huamnak le tumruhnak kan zaang a der tuk hi ta mu ka ti. Mah ka hunchimmi dirhmun ah hin a tlangpi cu Lai hlasa hna hi an i fu thlu ri ko hna rua.

Zoh lo tein a sa khomi ah cun Sung Tin Par lawng hi a si rih ko hlah maw van ti awk in khin kan um rua. Anih hi hla zoh zongin hla zoh lo chinchin ah cun umtu cawlcangh zongah a tui kho veve mi hlasa a si. Ka chim duhmi cu cheukhat hlasak thiam kan timi awtha hna hi miphun dang hlasa he an i lawh lonak zawnte cu anmah an hlasakmi Album an i chuahmi hmanh kha an by-heart in zapi caah a kan sakpiak kho lomi hi an tam ialte.

Cun cheukhat cu zoh bu in an sak ah an tui tuk rihmi le an hmai a hngal tuk rih mi ko khi an zia ṭhinh awk a si cang ka ti. Mi cheukhat hui ve cu zohlo in kan sa an ti le an tui bak hui lo ngang ko in dir an hmang an lau cang rua hun ti awkte khin an um i, zohlo i an sak caan ah mu... Cauk asiloah cahnah tein i zohlo nakin zoh bu ah an hlasak a tui mi ko khi hlasatu an sinak ah khuaruah har an si phah tawn ka tinak zawn a si rih.

Miphun dang hlasatu hna cu an hla an sakmi kha studio loah cun mizapi lak ah cun an i zoh loin ka thei. Cun an hla an sak tikah hin zohbu nakin zohlo i sak ah an tuimi nihkhin zeitluk in dah hla a duh le a zuam i, aa pum pek timi ri zong fiang tuk in a langhter. 

Zohlo i mizapi lak ah an hun sak le cawlcangh chinchin lebang ahcun anmah hi hlah maw thiam bik ti cio khi an si. Duh tawk i an hun cawlcangh khawh le sak cang mi hun zoh ah cun tungbang umnak zong ṭhial huaha lem lo i, hlasak hmang pawl hun zoh cu huam khi a um bak ti lo. Hi ti bantuk in an sak len khawh mi nihhin zeitluk in dah a caan an pek le peklo timi kha a kan hmuhsak.

Laimi a tam u kan hlasa ve cang cu hla zoh bu an sak le saklo hi aa dang tuk lo cheukhat cu zohbu ah a tui deuh mi an lo hna. Hihi zei ruangah dah a si tiah cun kan hlasakmi le Album chuahmi ah a caan kan pek tlawm tuk ruangah a si bik lai dah ka ti.

Lai hlasa lakah cun kan unau Lawngtlai Laimi zong khi an ti kho ngaingaite. Mizo lebang cu hla leiah cun a titi awkte khi an tha lo an thiam ngaingai. Hla Album aa chuah cangmi nih cun a hla chuahmi kha by-heart tein zei tik caan poah ah a sak khawh. Chim duhmi cu hla album aa chuah cangmi Mizo lakah hla zohbu a sami hi ka hmu ri hna lo. Zoh bu in hlasak cu hlasa thiam pakhat kan sinak zong a tla timi hi an hngal fiang tuk deuh i a rak si rua. Anmah Mizo hla an sak ah siseh, a aw tuahpiak in Lai hla sakter zong ah thiam an i olh ngaingaite. Hla cauk zoh bu in hlasak hi sakpiakmi hna zapi caah zoh aa dawh lo ngai timi hi kan hlasa pawl nih an theih len ko nabu in an kan ṭhinhpiak khawh ri lomi hi a poi ngaingaite ka ti ṭheo.

Kan hnung a luancia caan ahkhan, Delhi ah Mizo Pathian hlasa pakhat an cah, cun Delhi Laimi lakah a thiambak timi pakhat in an sawm chih ve. Pumh caan ahcun an hun sakter tawn hna Mizo nu cu CD phel tein ringawn kha a chuahter hna i zoh lo bak in cucu hla, mah khakha hla tiah a thim i, a hla Album chung ta kha a chimh hna i amah caan teah cun mahti cun a sak tawn i lung hi aa hmui ngaingai ko.

Delhi hlasak thiam pakhat cu an hun auh tawn ve tikah cauk bak he cun a chuak i aa zoh bu khan a kan sakpiak ve. A aw cu a tha ngaingai natein zoh bu a sakmi nih khan mi thinlung a hip ding tluk in a hip lo ngaingaite.

Hi Pathian hlasa Mizo nu hi Laiholh a thei bal tuk lem lai lo zeicahtiah Aizawl i a ummi a si tikah hin Laiholh hi a holh bal lai zong ka zum lo. Mah nih cun tlawmpal a rauh hlan a um ah Laihla cu zoh lote bak khin a hun cheih ko ai. Aziah! Ka ti i kei lebang cu a lau hin ka lau. A umnak zong sauh ri ṭung lo, kan hlasak thiam kan ti lenmi hna nih heh law chet tiah cauk le cahnah zoh bu in an sak len mi cu maw zoh lo bak cun a hun kan cheih piak salam ko e ka ti. 

Ka chim duhmi cu zeidang si lem loin zei ruangah dah mah holh zong a si lomi olzaang tein hin le by-heart bak in zapi lakah a kan sakpiak khawh hnga tiah cun hlasak thiam, hla uarmi le hla a duhmi, hla leiah zeitluk in dah a tumruh i a tlik cang timi aa zuamnak ruangah khan a si bik kan ti khawh. Lai hla a kan sakpiak lio zongah cun amah Mizo a tui tluk tein a tui tuk hringhran khin a sak.

Mi phun dang hna hi hla an sak tikah hin a tlangpi in cun an sakmi hlabia ahkhan an thinlung dihlak an pek in hin ka thei. An hlasak zoh tik le ngaih tikah hin lungdi a riam ngaingai ko. Kannih Laimi cu a hla aw lawng kan ngaih tikah a ṭha ngaingaite mi lung a su ngai e kan ti sihmanhsehlaw cu a hlasatu nih donhhlei cung a hun sak tikah a aw lawng kan ngaihmi nih khan mark tam deuh a hmuh tawn ko rua dah e. Zohlo i sak tikah a tui bak lomi kan um. Cun mizapi hmai umtu asiloah hlasak a ti kho lo zong kan um ve. 

A poinak bik cu hla cauk ah hla kha ṭialṭial i by-heart huam theng loin mah cauk chung ṭialmi rinh kan hman ṭheo tawn hi a si. Pumhnak ah maw? Donhhlei cung tbk. Asiah hlasak hun thiah bak in hla cauk banh colh hman khi cu a dawh in aa dawh lo tuk hringhranmi khi a si. Cucaah cun kan hlasa hna nih hi zawnte ahhin biatak thlak in nanmah ṭhanchonak ca zongah siseh, zapi ca zongah aa dawhmi le zoh a nungmi zohlo tein byheart hlasak hi hunkan zuampiak kho ulaw ti hi ka duhbik mi cu a si.

A cunglei ka chimmi hna hi keimah pumpak nih ka hmuhphak khawh tawkte a si i aho hlasa pumpak ti duhnak si loin sikho seh law zoh a vai dawh hringhran hnga dah ka ti duhnak bik kha a si. Kan dirhmun nih le sining nih a phanh ri lo bia zong a si kho men ko lai. Sihmanhsehlaw zuam ahcun zei thil hmanh hi a si kho lomi a um lo ti a si bangin kan hlasatu, a bik in Album a chuah cangmi nih hin cun kan hla Album chung ta hi cu by-heart tein sakpiak hram kan zuam kho u law ti hi ka saduhthah mi cu a si. 

Sihmanhsehlaw hun ṭhinh colh awk ding cun kan i harh rih men ko lai nain aa zuam ve mi nih cun sak khawh lo ding kha a um lo. Zohlo a sami cu zohbu sa mi nakcun mi an hip deuh hrimhrim ko lai. Uar an um deuh lai, mizapi zong an hip deuh hrimhrim lo awk a ṭha lo cu ta. Cucaah cun ahlei khun in hla album pakhat chungah hla aw a chuah cang minih cun biakinn chungah maw, siloah donhhlei cung .. tbk. ahcun hlabia zohbu in hlasak hman hi zoh aa dawh deuh lo caah ra kan hrialpiak hram kho cang ulaw tiah ka bia ka donghter.

Vaute (March) 2013

N. Delhi, India.

-------0-------