Lakphakchok Bangin...

Oolong/Wulong Tea

Voikhat ah nu pakhat nih zeitluk in dah nifatin a nun ah harsat a innak a tonmi thil kong kha a nu sinah a chim. A tonmi harsatnak hna cu zeitindah kianter ning a si lai ti awk zong thei kho ti lo tiangin lungdonghnak he a khat ko. 

Nitinte a nunnak a ruah tikah lungdong in a um. Harsat buaibainak thil pakhat ṭha tein kan hun kianter khawh theo tawn ko asinatein a dang pakhat hnu pakhat an hun i chapchuah chin lengmang tawn ee ti kha a nu sinah a chimmi cu a si.

Tikah a nu nih cun a fanu cu chumhchuannak coka ahcun a auh i a luhpi. A nu nih cun beel pum pathum cu hmakhatte ah a lak riangmang hnuah pakhat hnu pakhat ti khatte cio in a ṭhemh dih hna hnuah khin lum dingin mei cungah cun a chuan hna. 

Beelpum a khinmi hna cu caan tlawmpal a hun rauh cun a hung so hluahmah. A nu nih cun beel pakhatnak ah kazer (carrot) a thlak, pahnihnak ah arti le a donghnak bik belpum ahcun lakphakchok ti’n a phaih hna. A nu nih cun biakam khatte zong chim hleng lo tein beel a khinmi hna cu caan zeimawzat chung a bul i a tlawhter.

Minute pa 20 a rauh hnuah mei cu a phih hna i beel chung i a chuanmi hna kazer (carrot), arti le lakphakchok hang pawl cu pakandei chungah a chiah dih hnu ahkhin a fanu cu, “Mah hihi zei bantuk dah an si ti von ka chim hnik tuah,” tiah a ti.

“Kazer (carrot), Arti le lakphakchok hang na chuanmi hna an si,” tiah a leh.

A nu nih cun a fanute cu amah he naih deuh tein a hon ṭhutter hnuah zeidah an lawh tiah a tehther. A fanute zong nih cun a nunih a fial bantuk tein a tuah tikah, kazer (carrot) cu nem kirker tete in an um kha a hngalh khawh. Cu dih cun arti kha a khuaiter ṭhan rih. A fanute nihcun arti cu a hon khuai ṭhan tikah cun arti ve zong cu a hmin cang i hak ngai in a um kha a hmuh khawh rih.

Cu a hon dih hnu in khan a nunih a fanu kha lakphakchok hang kha a pelte in a hun hnimh tehter ṭhan. A fanu zong nih cun lakphakchok hang cu a hunteh tikah hmui ziziai tein a rim hmui tuk tikah thanuam ngai khin a von mirh ti si. Tikah a fanu nih cun, “Ka nu hi thil hna hi zeidah na duhnak sullam an si,” tiah a nu cu a hal.

A nunih cun a thawh i, “Hi kazer (carrot), Arti le lakphakchok hna nihhin aa khat bak a simi ti a lum i a linsa hringhranmi harsat teminnak kha an tuar cio hna. Asinain an tuarin mi harnak hna cu i khat ko hmanhseh law an hun i thlenning sinak zong kha an ni dang cio dih hna a si ko lo maw ka fa." 

"Hi kazer hi tilum in chuan a rak si hlan ah khan cun hak kirker tein a um si lo mei, asinatein tiso he an hun i ton tikah cun anih cu a thazaang a der i nem kerkuarpi in a um cang. Arti ve zong hi titlok chung chuan a si hlan ahkhan cun fawile bai teah a kuai a olmi kha a si. A lenglei ummi a hawng nih hin a chung i a ummi a hang hna kha ṭha tein a venhim hna. Asinatein tisa tlok he an hun i ton ve tikah cun a chung i a ummi tihang hna kha an khal i, hak deuh in an hung i um ve. Lakphakchok cu phundang deuh tein a um ko lo maw. Zeica’htiah tisa lin he an hun i ton ve tikah anih nih  cun tisa kha a zawng a thlen lawng hmanh si loin khan a rim le thawtnak tianghmanh khan a thlen khawh dih ee” tiah a fanu cu a hrilhfiah.

Cu tikah a nunih, “Khah! ka fanu nang zei dedeuh hi dah na si ve kun? Harsatnak nih na kawtka hram in an hngah ko. Zeiti’ndah nang na lehrulh ve ning a si kun ne lai cu - Kazer bangin maw, Arti bantuk in dah, asiloah lakphakchok bantuk khin dah?,” tiah a fanu cu a hal.

Ruat ve hmanh hna usih. Kannih cio teh zei hi dah kan si ve. Kazer bangin a hak in a ṭhawngmi kan si ko nain harsatnak le teminnak kan ton tikah kan nem i kan thazaang a der ve sual tawn maw?

Arti bangin a nemmi thinlung kan nei ko nain harsatnak thil phunkip kan hon ton tikah  cun kan thinlung a nemmi kha hah/cannak hna in a thleng ve tawn maw? Lenglang men in cun harsatnak ton hlan le ton hnu zongah aa khatmi kan lo ko lai nain kan chunglei thinlung a rak kha in, a rak hak ve mi kan si hnga maw?

Asiloah lakphakchok bantuk in dah na si kun. Lakphakchok cu harsatnak le fahnak a in ko zongah harsatnak a petu tisa kha a zawng dawh tein a thlen khawh dih. Ti a hunsat le a so sinte in khan anih cu amah a thawtnak le rimhmui hna kha a chuahpiak chintu a si. 

Cu ve bangin nang zong lakphakchok he kan i bang ko lai na ti si ahcun a chiabik sining dirhmun na phakphanh lio ko zongah nang nih cun cu na sining dirhmun hna cu ṭha le dawh deuh in a sersiam i, a thleng kho tu dirhmun sining ah khan na phan kho ve ko lai. 

Cucaah cun a vel lengmangmi suimilam caan chung kan nunnak hna ah hin, harsatnak hna le sifah tuarnak phunzakip hna na ton tik cu caan ah nangmah le mah kha cuai hun i thaichun ṭheo tawn law.

Nang hi kazer maw, arti dah, asiloah lakphakchok deuh hi thla ka si tiin...?

(Theihternak: Hi cabia te hi Myanmar News Updates ah an hun zamhmi ဘာသာျပန္ပံုျပင္မ်ား timi chungta kha aa tlak ningning in hun leh chinmi a si. Kaa lawm ngai. Calettu- John Zilpici Cinzahh)

----++----