The Story Of A Blind

Caankhat lioah mit khua a hmulomi ngaknu pakhat a um. Khua a hmuhlo ruangah mi zei hmanh kha an ṭhatnak lei in a hmu kho hna lo i a huat dih hna. 

Zei bantuk thil paoh ah a nawl a zulpiaktu le amah pakhat caah tiin a pawngte ah a umhnawh zungzalmi a tlangval pakhat dah ti lo cu ahohmanh kha a daw kho bak hna lo. A chim ṭheo tawnmi bia cu ka mit khua a hmuh a si ahcun nangmah hi kan vat hrimhrim lai ti hi a si.

Cutikah nikhat cu mit a hlutu ding an um i mah cu thawk cun a mit nih khua a hon hmuh khawh cang. A mit nih khua a hmuh tikah cun a tlangval pate cu amah sinah cun a va kal riangmang i;

“Dawtmi... atu cun na mit nih khua a hmuh cang si ko lo maw? Cucaah cun na chim bantuk tein na ka va taktak cang ko lai lo maw cu..?” tiah a hal. 


Sihmanhsehlaw nungak nute nih cun a rak hnawl ko cang ai; zei ruangah tiah cun a dawtmi a tlangval pate kha mit khuahmulo a si ko kha a hmuh tikah cun a lau tuk i von vat ding awkah khan a buai cang.

Nungak nute nih tlangval pate a mit khua a hmuhlo tikah cun mit khua a hon hmuka a simi a nungak nihkhan a mit a cawmi a tlangvalpa cu nangmah vat ding cu ka si thiam ti lo, ka duh lo tiah a rak hnon. Cutikah tlangval pate cu lungzur ngeihchia le mitthli tla bute he hnulei chit in a dawtmi nungak nute cu a kaltak ruangmang.

Nikhat cu tlangval pate nihcun nungak nute sinah cahnah tlapkhatte a kuatmi a va phan. Cu cahnah chungah aa tialmi ca tlangkhatte cu –

“Ka mit kha ṭha tein rak ka zohkhenhpiak ko kun ne law Dawtmi...” tiin......

---------------------------

Hi tuanbia nih hin minung hna nifatin kan nun khuasaknak pawngkam sining aa thlen nawnning hna kha a kan ruah hngalhter. Mi cheukhat cu nifatin kan nunnak ah kanmah le zatawk sining sang le dirhmun sangbik tiang kan phak hmanh ah; a sining aa philhlomi le tangniambik sinak theithiam bu tein a nungmi hi kan tlawm tuk hringhran.

Cucaah zeimaw caancann i harsatnak siseh, teminnak le kan i peknak man hi a rak cohlangtu he aa tlak maw tlak lo ti hi thate le felfai tein tuaktan le kan ruah kha a herh tuk hringhran mi a si ve. 

A cohlangtu lei zong nih kei ka tinco mi bawmhnak, zaangfahnak, theihthiamnak, pekchanhnak, pumpeknak le dawtnak kan hmuhmi thil hna hi ti’n sunhlawih zia le hmanzia thiam cio hram hna seh tiah thlazacam bu tein...

+++++

“Dawtnak kan ti lengmangmi hi khat le khat cungah izawnruahnak, ipekchanhnak, itheihthiamnak, le ingeihthiam khawhnak thinlung ngeih hna hi a rak si ko” Calettu

---------

(Theihternak: Hi tuanbia ‘The Story of a Blind girl’ timi hi Maivan chungah ka relmi kha ka Laiholh he aa tlak ningning in ka hon lehmi a si. Calettu – John Zilpici Cinzahh)

******