Thinghlamtu Pa (Woodcutter)

Voikhat lio caan ah thinghlamtu mipa pakhat nih thingah zuartu mirumpa sinah khan rianṭuan awk hal dingin a va kal i  bawmh a va hal. 

Cu tikah a hal bantuk tein mirumpa nih cun a sin rianṭuan dingah khan a rak pom i rianṭuan awk a rak pek taktak ve.

Thinghlamtu pa zong nihcun thinghlam rian cu hlawh a tam tikah siseh ka caah rianṭha tuk a si timi kha aa hngalh i aa lawm tuk ve. 

Cu ruangah cun thinghlamtu pa nihcun a thazaang dih um ek chuah in hi thinghlam rian ahhin teimak le tumruh tein ka ṭuan lai tiah a lung aa thlek.

A rian a ṭuanpiaktu ding mirum papi nihcun hreitlung har pakhat a pek hnuah thing a hlam nakding hmun le hma vialte hna cu ṭhate le felfai in a hmuhsak dih. A nikhatnak ni a hon hlam ahkhan thingkung 15 a hau khawh. Tikah mirumpa nih, “Kailawm tuk ee! Atu na ṭuan bantuk in hmailei zongah teima tein le tumruhnak ngei bu tein ṭuan i tim/zuam hram ko law,” tiah a ti.

Mirumpa nih thazaang peknak le forhfialnak biachimmi nih cun a lawmhter tuk hringhran, cu lawnghmanh siloin zaangtlun chinchinnak ah a hman phah. Asina beltin a nihnihnak ni a von domh ṭhan tikah cun kung 10 lawnglawng a hau khawh i; zorlei a panh ziahmah. 

Ni le caan a hon rauh deuh tluahmah cang hnuah khin cun a thinghaumi zat zong kha nikhat hnu nikhat tete in a tlawm chin lengmang i, nikhat ah kung tlawm tete lawngin a hau/hlam khawh cang.

Cutik ahcun “Thazaang ka ngeihmi nih a tlinh ti lo si ko lai, ka thazaang a ṭumchuk deuh ko cang hi teh, ka thazaang a zor” tiah thinghlamtu pa nihcun amah thazaang kha a mawhpuh i aa ruat ko cang. 

Cutikah a rian a ṭuanpiakmi mirumpa sinah cun a va kal riangmang i, “Zei ruangah hme a si hnga? Heh! ti’n kai zuam le ka hau ko hna natein nikhat hnu nikhat in ka thinghlammi hi a ṭumchuk lei a panh peng ko; an tlawm ching lengmang ee,” tiah lungawṭawm in a umnak cu a va chimh ti a si.

“Na hreitlung haa kha zeitik caan ah dah na taat tawn, a har nakding caah na taatpiak bal el maw?” tiah mirumpa nihcun a rak hal chin.

Thinghlamtu mipa nihcun ai thaw hi, “Taat ding maw a rak si cucu ka hngalh ṭun lo, thinghlamnak in pei ka caan vialte cu ka hman le ka buai tuk hringhran tikah a harnak dingah taatnak caanrem ka ngeih bal kun lo cu,” tiah thinghaupa nihcun a leh.

Cu ticun a hnu a hnu ahcun mah thinghlam mipa nihkhan zeidah ka herhmi a si timi le zei ruangah dah ka thinghlammi hna hi an zor ti kha fiangfai khitkhet tein a tuaktan i, a theih hngalh khawh ee ti a si.

++++

Kannih lak zongah mi tam u cu kanmah kan thliti thiamnak le zungthiamnak (skills) hna kha zeitik hmanh ah tharchuah lengmangnak (update) tuah kha kan hngal ṭheo tawn hna lo. 

Kan cawnmi fimthiamnak le thilti khawhnak, zungthiamnak pawl tehna hi a tling in a za ko tiah kan i ruat ṭheo lengmang tawn. Aṭha (Good) timi biafang lawng hi a rak zami a si hrimhrim loh; ṭha deuh (Better) timi biafang ngah ṭhan khawh nakding ah nai zuam hrimhrim ko lai dah. 

Cucaah cun kan thilti khawhnak, cawnmi thiamnak le hngalhnak, zung thilthiamnak tbk. pawl tehna kha hreitlung harnak kan taat bang in, thar kan chuah lengmang an rak herh tuk; cuti caankhat hnu caanfatinte kan taat asiahcun hlawhtlinnak (success) timi cu kan hmuh hrimhrim ko lai.

**+**

#(Theihternak: Hi a cunglei tuanbia tawite hi miring in ‘Vangeepuram Sreenathacharya’ nih a ṭialmi kha Myanmar Ca in (Tat Tanh Cho) nih a lehmi kha ṭha ka ti ngaingai caah Laiholh in aa tlak ningning in ka hon leh ve cawpmi a si. - John Zilpici Cinzahh)

ooo0ooo