Two Brothers

Oikhat lio caan ah an hringtu nu le pa hna nih  tuante ah an thihtakmi hna unau pahnih an rak um. Tikah, an nu le pa nih an rohtakmi hna lo pakhat ahkhan rian an ṭuanṭi tawn. 

Kum caan zeimawzat a hung liam hnuah khin a upa deuh pakhat kha nupi a ngei i, cuticun a chungkhar hetin fa pahnih ngei in khua an sa. 

A naupa bel cu amahte lawng in a um i nupi a nei lo. An loram ahcun nifatinte khan rian an ṭuan zungzal i, an lo in an hmuhchuahmi thil zeipaoh kha an unaute cun aa zatte in an i sem lengmang tawn.

Nikhat cu a nau deuh pate cu facang lo hmun ahcun amahte lawng rian a ṭuan, cu a ṭuan lio caan ahcun amah le mah kha ti hin bia ai ruah i khua a ruat,“Hiti ka u he aa zatte in kan hmuhchuahmi kipte kan i ṭhenh cheuhmi hi a hmaan lo. Zeica’htiah kei hna cu mahte lawng khuasami pei maw ka si ko cu, keinih cun tlawm deuh ka hmuh le ka ngeih ahcun a za ko cuta. Anih cu chungkhar he khuasa an si, zingtin zantinte an heuleumi zong a tam khun. Keimah nakleng tampi ka u nih a herh cucaah cun tam deuh in a tin co awkte a si,” tiah aa ti. 

Cutikah cun amah facang kha sawngkhoi khat in a rawn zau hnuah a upa facang chiahnak rawlruk leiah cun daite le huamsam tete khin a va kal i a tlen. Cuticun zanfatinte cu dongcat lo tein a pehzulh i kum tluanchuak a tuah peng.

Cuti a naupa nih ruahnak a ngeihmi he aa khat bak in a upa nupi le fate he a ummi zong nih cun,“Hiti ka nau he aa zatte in kan hmuh chuahmi kan i sem cheuhmi hi a hmaan ṭun lo. Hihnu hmailei caan a ralai dingmi ah kei thamtham cu a ka cawmkengtu ding nupi le fate pei kai neih ko hna. Asinatein ka nau cu a nei ve lo chungkhar a neimi a si ve lo. Cucaah cun amah nih hin keimah lengpi in a tinco deuh awk tu a rak si,” tiah a ti i, zanchairte a thlithup in a naupa rawlruk ahcun facang sawngkhoi khat peng a va ṭhemhpiak ve.

Zantinte cu ahohmanh i theihpiak veve loin a thli tein an rak i pe lengmang. Cuti in cun kum cu ahong dih liam vuaimai tikah cun an pahnih in an rawlruk veve an hon zoh cu; a zor tlawm hlei lo veve tikah an khuaruah a harter tuk hringhran hna.

Zankhat cu, an pahnih i khat le khat kan i ṭhemh ṭhan lai an tinak rawlruk lam ahcun an unaute in cun ruahlopi in an von i ton cu a luancia kum caan ah an facang a rak zor veve khawh lonak a ruang sining kha an theih hngalh tik ahcun; an unau pahnih tein cun an sawngkhoi cu an chiah duak i, an lunglawmh thannuam mitthli he an i kup an i rek.

+++

Hi a cunglei tuanbia tawite zoh tikah an unau zeitluk in dah an rak i dawt timi kha a kan hmuhsak. Kannih cio hna teh kan unaule hna cungah zeitluk in dah dawtnak thinlung ṭha kan ngei khawh ve. 

Kan unaule cio cungah thinlung tak in dawtnak a ngeih kho ve mi kan si maw? Na u na nau nih bawmh an hal lioah teh na chungkhar khuasak tintuknak ah na heuleunak kong lawng maw na chimh; amah a dirhmun sining hna teh na tuaktanpiak kho ve bal maw? Mah vial nupi le fate he tin miṭhawngṭha minei nung si lio caan ah kan unaule hna cu ṭuancawp eibar cawp an si sual maw?

Dawtnak thinlung he i bawmhchanhnak timi hi ngeih le chiah chawva tampi ngeih le chungkhar khuasak tintuknak heuleumi a dihtam he khan pakhat hmanh aa rak seengtlaimi a si bal lo i thinlung tu kha a rak si deuh tawn.

Kan unau dawt khawh chungin dawt i zuam cio ve hna usih tiah kan sawm hna.

***---***

(Theihternak: Mah a cunglei tuanbia tawite "Two Brothers" timi hi maivan innpi kai chawhleh lio ah ka relmi a si i, theih santlai tuk a si ko tiah ka Laiholh he aitlak ning in ka hon lehmi a si. 
- John Zilpici Cinzahh)