Beautiful Story

Caankhat lioah a sifak ngaingaimi nuva tuahkhat an rak um.

Nikhat cu, an nu nih, a sam ṭhan khawh nakding caah le a thianhhlimh deuh khawh nakding caah khan samthih ka cawkpiak law tiah an pa cu a chimh.

Sihmanhsehlaw, An pa nih a poi ka ti tuk hringhran. Kan cawkpiak kho lai lo e tiah a leh. Kei zong atu hi ka suimilam kai khih liomi a rawk le mah cu koko siam nakding hmanh ah a zatawk in phaisa ka nei loh e tiah a hrilhfiah i a chimh.

Cu tikah an nu zong daite in a um i ka cawkpiak ko tiah a tiṭhan ti ve lem lo.

An pa cu rian a ṭuan i a ṭin pah ah suimilam dawr ahcun a pial duak i, a suimilam rawkmi cu remh lo tein man dengte ah a zuar i, a nupi nih ka cawkpiak a timi sam ai hriah nakding samthih cu a cawkpiak pah.

A nupi caah samthih a cawkpiakmi cu i putpah bute le lung hnangam bu hen cun zaanlei cu inn ah a rak ṭin i, a thil cawkmi pek lai zong aa ngaih ngaingaite.

Sihmanhsehlaw, Ruahlopi in, mah cu zanlei sang a rak ṭin ahcun an nu a hmuh tikah cun a lau i, a khuaruahhar tuk hringhran, Zeica’htiah an nu nih a sam tawite in a rak i tan diam cang kha a hmuh.

A vapa rianṭuan a kalkar ahkhan a sam kha a tan i a rak zuar, cu a zuarmi man in cun suimilam tharte a vapa caah a rak cawkpiak ve.

An pahnih tein an von i hmuhton cu an biangki cungah mitthli a luang veve; an santlaihlonak ruangah an mitthli a tlak kha si loin, i pek ciocio duhnak thinlung an rak i ngeihmi an i dawtnak ruang tu ah khan a si.

*****

Mi va duh cu zeihmanh lo a si, mi tu nih an rak duhmi si khi thilṭha deuh le santlai a si; asinain kanmah nih kan va duhmi hna le kan duhmi hna nih an rak kan duh ve khi a tlamtlingmi cu a si. Duhnak cu man lo hmuhmi tiah la sawhsawh hlah, an ka duh aipat tiah mi va tuaitam hna hlah, milung va father hrimhrim hna hlah!

+++++++++

Khat le khat duhdawtnak timi hi cohlangtu, rak pekmi, le duhtluanhmi dirhmun lawng dirhuar kha a si loh, cu ve bangin a petu, cohlanmi, le duhtluanhtu lei hei dir lawng zong kha a si ve fawn lo i, khat le khat dawtnak thinlung hen tikhawh tawk i pek ciocio duhnak thinlung tu kha a si ziar. Khatlei lawngin siloin aitluk ceo tein ti khawh tawk kan i pek duhnak thinlung tu hi a sangbikmi khat le khat i duhdawtnak taktak cu a si.

**00**

(Theihternak: A cunglei tuanbia tawite hi maivan mirang in tialmi kha aa tlakning in von leh chinmi a si - John Zilpici Cinzahh)