Facebook Kong Theihtlei Le Pumpak Hmuhning

By. John Zilpici Cinzahh

Facebook hi vawleicung minung maivan hmanbik mi lakah a pahnihnak a si i, Google hi a pakhatnak ah chiah a si. Mi tampi nih an hman bantuk in kannih Laimi phun hna zong nih kan hman khawh tuk cang. 

Ramchung siseh ramleng ummi Laimi phun hna zong nih biatak tein kan hun hman khawh cang i a ṭha tuk hringhran. Hiti kan hun hman hi a luancia kumhnih thum hrawng lawng in biatakte hman kan hon i ot a si i, hiti Facebook Lai miphun nih kan hun hmanmi hi kan ṭhanchonak lei a langhnak phunkhat zong a si ve.

Cu lioah mi ṭhenkhat nih Facebook cu hman ding a si lo mitthli tlaknak ngeihchiatnak an pek hna lai tiah a chimmi le hman a kan thlauh tawk zong cu an um len ve. Hun ruah ah cun hi an chimmi hi a hmaan ngaingai tak. Facebook ruangah ngeihchiatnak le mualphonak tbk. a phunphun a tongmi an um bantuk in mi ṭhenkhat caah cun ṭhatnak le hlawknak tampi a pek ve khawh hna. 

Zeithil hmanh hi a chia le a ṭha tiah an um i, cucu a hmangtu hna minung cungah ai hngatchan dih. Kan nunnak caah thilṭha a si mi sii-ai hmanh kha a siamtu hna le sibawite nih an kan cawhning in kan eidin lo i, a hleihluat kan ei ahcun kan nunnak caah chiatnak a chuahtertu thilṭha lo ah an cang tawn ko. 

Cu ve bantuk in cun Facebook tehna zong hi mi cheukhat caah cun ngeihchiatnak le lungrawhnak petu zong a si i, mi cheukhat ca ve tu ahcun lunglawmhnak petu hnangamnak phurtu zong kha a si ve fawn. Kum caansaupi ule nau ai hmu ti lomi aa tlaumi ca zongah i hmuh ṭhannak le tonnak tiang a rak chuahter ve. 

Cucaah cun zeibantuk thil hmanh kan i thloh kan tiah hin cun i thloh viar awk in a um liangluang. Cu ti i thlohnak cu a niam ngaingaimi ruahnak phunkhat zong a si rua dah ka ti. I thlohnak in a hmanthiam ding tu le a cintawk thiam ding kha kan i chimh cawnpiak deuh awk tu kha a rak biapi deuh mi cu a si.

Sizung ah a ummi mizaw rual khi sii ei va thloh tuah hna usih law, zeitin dah an kan ruah hnga? Cuti va thlohnak in cun siibawite nih an in khiahpiak ning tein din ei nai zuam lai ti awk deuh tu kha a si hnga lo maw? Zeithil hmanh hi a tuahtu hna duhning nakin kan rak luansual nakhnga lo a hmangtu minung hi rak i ralrin ngaingai a herh ko.

Facebook cu a ṭha loh hmang ti hlah u! Piangtharmi lebang nih cun a hman hmanlo ding. Ngeihchiatnak lungrawhnak an petu a si lai, Pathian he nan i hlatnak a chuahtertu a si lai, nai ngaichih lai tiah an chim ṭheo tawn hi ka hna nih a theih lengmang. 

Facebook chungah hon ti le Pathian thawngṭha bia le thawngpang zeizongte an tling ngai ko fawn. A ṭhatlonak ngaingai ka hmu fawn lo. Pathian rianṭuantu tampi hna zong nih an hman ko fawn. Aziah kannih hi atu bang kan Pathian rianṭuannak nizan tihni te i ai ot ve mi hna nih hiti ko in biachim an hman tawn hnga ka ti i, thil tampi a hei ka ruahter. 

A ngaingai ti ahcun “Facebook a ṭha lo” ti tehna cu hruh nakin khin molh hlah maw a rak si deuh rua ti awkin a um. Hiti ka ti tikah FB nih a ka suai ka duh tuk ruangah a si naisai lo. A ṭhat caah cun dawh vawleicung minung tambik hmanmi pahnihnak tiang a phanh khawh fom cu mu; zei dah a ṭhatlonak tiah halṭhan hna usih law Facebook chiatnak ngaingai kha cu an chim khawh lai cu ka zum bak loh. 

A hmangtu minung hna vanchiat ruang i an lungrawh le ngeihchiatnak a tongmi hna kong tu kha an chim khawh mi vial cu a va si lai tiah ka ruah. Biana ah, Mawṭaw a ṭha loh kan ti tikah aa citmi le a mawngtu hna kha kan chim duhmi si loin amah mawṭaw seh le thilri a ṭhat lo ruangah a si i; Ai citmi minung pawl an sual ruang le ṭhat lo ruangah mawṭaw cu a ṭha loh ti cu a hmaanmi le a dikmi a si kho ngai hnga maw?

Facebook hi Laimi hna nih biatakte in kan hman hi a sau tuk rih lo caah an hmanning kongkau ah a minung kan tam rup in a theimi hi an tlawm men lai dah tiah ka ruat. A theimi zong tampi an va um ko lai. Cun mi cheukhat cu Group biaruahnak helawchet tiah kan tuah ciammam i an rak kan add lulh a ṭha ko. Natein mah group an tuahmi nih cun zei ngaingai thlahmi (post) an ngei lem hna lo. 

A zeicah hme group tuah hiti rumro in kan uar hnga aw ti hi mineng an thlak tuk tikah ka ruat ngaite. Group a tuahtu admin pawl hi pastor an si lo cu kan van ṭha pastor chuak hna seh law bu a ṭhen ding lawngte pei maw ti tiang in capo biatak khin ka hei ti. Sihmanhsehlaw zeiti awk a ṭha loh. 

Cun Like page a um hoi i hihi cu group nakin cun hna a hnok lo deuh i thilṭha kan ti cio ko lai. Natein remhning (setting) thiammi ca ve tu ah cun a zeihmanh kha a buaibainak a um ve lem lai loh.

Facebook chung kan vahvaih tlawnlennak ah group kan luhnak ah maw, Like page ah maw, kan hawile pakhatkhat nih an rak post mi kongah Like le Comment, Share, Poke tbk. tuah ahhin cheukhat cu kan buai i kan duhning paoh in ca kan rak ṭial ṭheo tawn. Minih like, comment, share, le poke an tuah ko mi kha kan zei hna dek a rak kan hnawh kan sia a rak rem ziar kho deuh rua loh.

A tlangpi in Like i peknak kongkau ah kan buai ngaingai tawnmi cu a si deuh rua lo dah ka ti tawn. ‘Mi pakhat nih thawngpang chia i thahnawnnak kong le tlaihhremnak kong tbk. mi pakhatkhat nih an rak post tikah like tuah hi i ralring cio hna usih’ tiah an ṭialmi zong ka rak rel bal. 

Hi kong a chimmi hi an tam ngaingai cang ko dah. LIKE pek hi keimah ko zong hi ka huam ngai ve LIKE pek le tuah hi “Ka lungtling, ka hnatla, ka duh, nai dawh, A ṭha” ti thangṭhat lawmhpinak kha a sawhchim bikmi le langhter bikmi cu a sitak ko. 

Hi an langhter rualrual in hin khatlei kam i kan ruah awk a si rihmi cu “Ngeihchiatnak i hrawmpinak” asi ti zong hi ruah chih ve ah a ṭha. Zeicahtiah FB ah ngeihchiat langhternak hmelchunh LIKE button bantuk an tuah ve lo caah a si i, ngeihchiatnak le thawngchia an post tikah comment pek hi zaran caah cun i manh a si cio lo tikah Like pek in ngeihchiat langhter le hrawmpimi zong an rak um len ve (atu ahcun a um dih cang). Cuti thawngchia Like kan pek ruangah ai lawmlomi cu an um lai zong ka zum loh. Comment tuah hnu tu ahcun like pek tu cu kei ka hmang lem loh thawngchia lei deuh a si ahcun...

Asinain thawngpang chia thawngpang ṭha zong va siseh, an rak Post-mi Comment le Like kan tuahmi khi kan hawile (friend) kan ngeihmi hna News feed ahkhan direct in a va cuang colh i, thawng hei zamh chin phunkhat ah kan ruah awk deuh a si hnga lo maw ka ti. 

Natein pakhat ruahchih ve awk a si ko lo hlah maw tiah ka ruah rihmi cu, thawngpangchia pakhat maw, hmanthlak ṭhalo pakhat maw an rak post tikah an rak post-mi a chiatnak kongkau he pehtlai in comment tuah hnuah cun like pek kha sum ahcun a ṭha ngaite mi a si i, comment na tuahmanh lo ding a si le cu like zong pek ah a ṭhami thil a si ko. 

Thawng heizamh chin phunkhat khi a si ko caah a poinak a um tuk loh. A thlahtu (post) thazaang pek zong a si ve. Thilṭha maw siseh, thilchia kha hmanthlak zong va si ko seh, an rak post-mi like tuah/pekmi pawl a ṭhalo lei in kuihpiak ding kha a si lo. 

Bianaah, Hakha innkang mi pakhat an rak post i, comment pe loin like ka tuah cu like ka tuahmi kha vaicei hna seh, a ṭha tuk tinak sullam zong kha a nei lo, comment tuah manh lo ruangah ngeihchiat hrawmpinak caah ka like-mi a si lawng siloin mah hi thawngpang hi rak hmu cio hna seh timi lei deuh in keinih cun ka ruah. Kan chim cang bangin thawngchia a si caah comment tuah ahcun a za ko i, comment pek tuah khawh lo le cu Like ding kha a si ko hnga ka ti.

FB Hawi (friend) Sinak In Hlawt ningcang

Mah hi hawile sinak in hlawt asiloah hlonh ningcang hi a herh ngai ve mi a si ko. Zeicah kan tiah cun Facebook ahhin miṭha he ṭhalo he, thilṭha he ṭha lo he ti’n ca, hmanthlak tbk., post a hmangmi kan tam tuk ruangah khan a si. Mah bantuk thilṭha lo post a hmangmi kan hawile (friend) lakah an i tel sual tikah siseh, holh dawhcah loin mi tuaitam a hmangmi kan hawile si hnaseh, mah bantuk minung pawl nih hnahnawh buaibainak ka pe kho hna hlah seh ti duh ahcun na hawi a sinak in khan hlawt/hlonh mei ding a si ko.

Cucu zeitin dah kan hawi an sinak in kan hlawt hna lai tiah cun; Mah hlawt na duhmi nu/pa i a Facebook timeline innpi kha ong law, a timeline hmanthlak tanglei na orhlei kilte ahkhan sehha bantuk a tanglei hmanthlak bang na hmuh lai i, mah cu zawnte cu na hmeh (click) lai, na click-piak lai i, bawmte a hong chung lai i, a tang hmanthlak bantuk in hin catlang panga; See Friendship, Suggest friends, Poke, Add to Interest Lists..., Report/Block, le Unfriend ti hi na hmuh hna lai. Hi chungah hin na hawi in hlawt le hlonh na duh caah a tanglei bik ummi Unfriend timi kha na thim lai i na hmehpiak lai. Mah na hmeh sin in khan na Facebook hawi sinak in khan a tlau colh lai. Na hawi (friend) a si ti lai lo.

Na hmanthlak maw siseh, na timeline caṭial mi tete zong like, comment tuah a duh zongah a tuah kho ti lai loh i nan i chawn (chat) kho ti lai loh.

Na hawiṭha lo maw an siah miṭhalo holh ṭhalo pawl in mi chawnhbiak a hmangmi hawi (friend) cu a cunglei hawi sinak in hlonh (unfriend) tuah colh hngap ko hna. Cun a hlei in i ralrin awk pakhat cu na hawi si dingin an invite tu minung hna kha ṭha tein mi ṭha a si le silo a timeline maw asiloah poke in hei sawh ta duak law miṭha a si ko ah cun hawi ah (accept) cohlan kha a tha bik a si.

Hawile (friend) Thil Thlah (post) Mi Hmulo Dingin Ṭammawih (setting)

A sen (red) khi Notifications tuahnak cu a si

Hihi hawile sinak in hlawt he khan van fonh ding  si ko natein a dangte lawlaw in ka von chim ṭhan ko lai.

Cheukhat cu kan facebook hawile kan theihhngalh lemlomi hna he hawi (friend) kan si tikah kan buai tawn. Zei ruangah dah tiah cun ṭammawih ning (setting) kan thiam lo ruangah a si ko. 

Cucu zeitin dah hna an kan hnawh tiah cun Notifications in khan atu lelek theihternak a kan tuah. Cucu zeitin dah theihternak (notifications) zong ka tuah hlah seh, ka news feed zong ah lang hlah seh ti duh tikah zeitin kan tuah lai. A tanglei hmanthlak he langhter ning bantuk tein ṭammawihnak (setting) tuah ding a si ko lai.

- Na hawile chungin a thil thlahmi zeihmanh, ka news feed zongah lang hlah seh, Notifications zong in rak lang hlah seh ti na duhmi pa/nu kha na Search Bar chung ahkhan a tanglei hmanthlak bantuk in a min na ṭial lai i, Amah Profile zawn kha na (mouse) in khan hmanthlak 1nak bantuk in na hmehpiak hnuah Hmanthlak 2nak bang a Facebook Timeline innpi a hung cuang lai.

Hmanthlak 1nak

Hmanthlak 2nak

- A cunglei hmanthlak 2nak bantuk hin a rak cuangmi a facebook cung zawn i, Friend timi zawnte ahkhan na zuhmur (pointer tool) kha chiahpiak. Cuti na chiahpiak a si ahcun hmanthlak na hmuh bantuk khin bawm a hung mang lai i;  Get Notifications, Show in news feed, Settings..., Close Friend, Acquaintance, Add to another list, Suggest friend, See friendship, Report/block, le Unfriend ti kha a chang tete in na hmuh hna lai. 

Hi na hawi nu/pa a thil post thlahmi theihternak (Notifications) zeihmanh ka tuah ti hlah seh, ka news feed zongah cuang hlah seh ti na duh ahcun Get Notifications tinak zawn ai zahmi te kha a tanglei Hmanthlak 3nk le 4nk bantuk in voikhat cio na hmehpiak ahcun ai zahmi kha an lo lai i zeihmanh a thil rak thlahmi le post mi pawl nih hna an hnawh ti lai lo. Ka tuah ko seh ti zong le cu a dih lak tein zah khawh a si ve than ko.

Hmanthlak 3nk

Hmanthlak 4nk

LIKE page

Like page tuahmi hi an tam ngaite. Vawleicung huap in zukcawl cangtu (Actor) siseh, music lei minthang, capo (comedian) lei minthang, caṭial thiam lei minthang le ram hruaitu min thangthang, le a dangdang tampi an um len rih. 

Mah bantuk pawl hna nih LIKE page pumpak caah an i tuahmi cu nifatin anmah a ngaisangtu minung le midang hna hei hipchinnak caah siseh, an cawlcanghnak le ruahnak tbk. thil theihtlei tete an tonmi pawl hromh duh ruangah an tuahmi a si i , a tam lengluang ko.

Mah hi LIKE page ai tuahmi minthang pakhat i (Like page) kha LIKE kan tuahpiak a si ahcun cu kan tuah ni thawk in amah nih a Like Page ah a rak thlahmi (post) hmanthlak, lungchuak biaum tawite maw tibantuk kha ka News feed ah direct in ai rak pholang colh lai tinak a si. Hi zawn ahhin phunhnihte in ka von langhter lai;

LIKE page Notifications Thlennawn nincang: Laimi chungin pakhat caṭial thiam ngaimi Perhkalh i, LIKE page hi von zoh ta usi law na fiang ko lai dah. Like timi kan hmeh i kan hmeh dih in khan a cungte ah kan chiah peng a si ahcun a tanglei hmanthlak bantuk tein duh thimzahnak bawm a hungmangmi kan hmuh lai.

Hi zawn ahhin Perhkalh page kha like ka tuah lecangka in auto in khan Show in news feed timi kha ai thimzah colh lai. Cuti cun a caṭial tharmi paohpaoh kha kan News feed ah khan kan rak hmuh khawh cang lai.

Show in news feed timi na duh lo i, Get notifications timi kha thimzah na tuahpiak asi ahcun a ca thlah (post) mi paohpaoh kha direct in theihternak a rak in tuah zungzal colh lai. Cu na duh lo i zeihmanh um hlah seh ti na duh ṭhan a si ahcun Unlike timi te kha hmehpiak law. A ca post-mi zeihmanh kha Notifications zong an tuah lai loh i, na News feed zongah khan a cuang thai ti lai lo.

Mi pakhatkhat Like page kha LIKE na tuah tikah Get Notifications, Show in news feed, Unlike tuahning cang cu kan i fiang lai tiah zumhnak ka ngeih. 

Cun LIKE page tuahmi delete-nak bel cu kan ṭial lem lai loh zeicahtiah anih hi cu tuamhlawm ning le ṭemhmawih ning (setting) chungah delete-nak ṭha tein a pek i cu delete tikah a ni thla an ching hnuah an chingmi ni le thla caan ah amah loh tein a loh tawn ko lai caah buai ding a um lo.

Group Page Kong 

Group page hi cu mizapi i hawikomhnak le biaruahnak, thawngca thanhnak tbk., kha an si ko. Like page he hin ai dannak a um tuk lem loin ka hngal. Nain dannak tu cu zeimaw zat an nei ve.

Hi Faceboo Group page hi tunaite ti awk in khan heh law chet tiah hnoksabur in Group tuah kan i theih ngai hna. Kan tuahmi group le zei huaha zoh awktlak le ṭhahnem ngaingai in kan tuaitam kho fawn lo. 

Kan post-mi thil pawl le Group dangah rak post cia cangmi tibantuk ngawt lawngte si kaw Group kan tuah lai ah hin ṭhate kan i ruah cikcek hnu ah tuah kho usih law Group chungtel zapi ca zongah santlai in kan lumsatter khawh lai dah tiah ka ruat.

Like page si loin Group page ahcun Notifications siseh thil dangdang zong an i dannak zawnte a um pah.

Group pakhat kan luh lecangka in khan Group ahcun mah duh thimnak phunthum All posts, Friends’ posts, le Off ti hi an si. Group hlunghlai deuh lebang cu coment le like, le post mi thil a tam tuk tikah hnahnok luri an si tawn i, cuti an um lo nakhnga dingah kanmah tein remh/hlawmthiam kha a rak herh.

Group Notifications thlennawn ningcang: Group page an in luhnak kha na kau lai i, a tanglei hmanthlak bang a hung cuang lai; Notification timi zawn na hmeh sinin a tanglei hmanthlak bantuk in duhthim khawhnak catlang phunthum na hmuh hna lai. Cu hna cu All posts, Friends’ Post le Off,..

All posts: Mah hi na thim hmehpiak ahcun mah na luhnak Group chung an post-mi thil vialte kha notifications in theihternak an rak in tuah peng lai.

Friends’ posts: Hihi cu na luhnak Group chung a lut ve mi na hawile nih an post-mi thil bak lawng kha Notification theihternak ka tuah tawn seh tinak a si ko.

Off: Hihi tu hi cu na luhnak Group chung an thil post-mi hna kha theihternak ka tuah hlah seh tinak kha a si ko.

Group tuah kha heh law chet tiah ai zuammi ko kan lo i, mi add hi le kan huam ngamsam hna mizakip loin kan add hna. An caah a herh lomi le hnahnawk luri kan si ti zong ruah pah awk a si cang. 

Hiti thil asi can tikah mi cheukhat ka hawile nu pawl hna nih “Laimi Group page tuah kan uar ning le zei huaha post-mi le ṭhathnemnak ngaingai a hei si lo ning, an kan neng tuk” tiah an ka ti ṭheo tawn. 

Mah Duh Lomi Group Chuahning le hawidang nih Add Kho Ti Lo Dingin Group Chuahnak Ning

Cutik ah Facebook Group horduhcuainak le horduhcuang thilṭha lo post-nak ah mi pakhatkhat nih member an rak kan luh tik i, chuah ningcang le cu na chuahnak Group ah ahohmanh nih add khawh ti lo dingin a tuahto ningcang kan zoh ṭhan hna lai.

Tc.,

Global Laimi, Group page hi tahchunhnak ah kan von lak ko lai. Group na duh lomi maw Group zei paoh va si ko seh member an in luh tikah cu an in luhnak group in chuah na duh a si ahcun a tanglei hmanthlak ning bantuk tein hin na tuah lai. Hohmanh nih na chuahnak group khan an in add kho ti lai lo.

Group in Chuah Ningcang

Group an in luhnak kha kau law, Joined tinak zawnte kha hmet law a tanglei na hmuhning bantuk in hin a hung lang lai;

Hmanthlak 1

Bawm a hungmangmi catlang tlanghnih ahhin a tangzawn Leave Group timi khi, hi Group in hin chuah ka duh tinak zawn a si i, na hmeh a si ahcun a tanglei na hmuhmi bantuk in hmanthlak a hong cuang ṭhan rih lai i, Group in chuah sawhsawh lawng na duh asi ahcun Leave Group tinak zawn kha hmehpiak colh ding a si ko. Asinatein hi group ahhin ho mizeihmanh nih ka add kho ti hna hlah seh, ka duh si le keimah nih ka joined ko lai na ti si ahcun atanglei hmanthlak bantukin rak tuah. Hohmanh nih an in luh kho ti lai lo.

Ahohmanh Luh Ṭhan Khawh Lo Dingin Group Chuah Ningcang

Joned timi na hmeh dih khan, bawmte a hung chuak lai i mah cu bawmte a tanglei ah Leave Group tiah ai ṭial lai, mah khakha hmehpiak. 

Hmanthlak 2

Leave Group timi na hmeh dih khan, Hmanthlak 3 bantuk in bawm a hungmang lai i, (Prevents other members of this group from re-adding you) timi zawn kha zah (tick) na tuah hnu ah, Leave Group kha na hmehpiak a si ahcun mah Group ahkhan nangmah duhthimnak te na luh lo paoh ahcun mizei bantuk hmanh nih na chuah cang nak Group ahkhan an rak in add luhter kho ti lo.

Hmanthlak 3

Group Hlonhning (Group Delete)

Facebook hi forum pakhat bantuk a si i, a tuahto ningcang remhzia hlawmzia kha thiam ngai a rak hau. Group hi a tuah cu a fawi ngaite nain hlonh (delete) ning belte hi a thiam lo kan um men lai dah tiah ka ruah. Zeicahtiah a tuah lei si loin a hlonh ningcang hi phundang deih in an kalter caah a si. 

Cheukhat cu Group kan siam kan ti i, kan siamka ahcun mi khumh le ca thlah kan ṭhawng ngai hna. Laimi media cheukhat zong kan lo thulhthalh ka hei ti. Cucaah kan tuah vevek ahcun caanhmaan tein caan suai i mah cu tik caante ahcun ca thlah khawh kha kan i zuam awktu a si. Facebook group cheukhat cu a sau deuh a von kal cun member zong karh hlei hlah, ca thlahmi zong zeihmanh nei ti loin a ummi an tam i, ka khuaruah lei a har tawn.

Ziah mah Group hi an hlonh (delete) ko hnga lo hiti an chiah sawh hnga? tiah keimah ceih in ka hei i ceih len salam ko i, khatlei i ka hon ruah ve ṭhan rih tikah cun a delete an thiam loh le a si ka ti. Zeipaoh hi kan rak thiam ahcun an rak har lo i, thiam lo le hngalh lomi thil cu zeiti tuah awk a rak ṭha ve fom loh. 

Ka thiam sok ai pat ti’n zei thil hmanh hi chikhat lungthawh ah tuah kan hman lo nakhnga ding bel hi an rak biapi tuk ti hi thiamnak nakin rak hngalh deuh kan hau rih ko rua dah. Laimi le Facebook group tuah kan i hngalh hi zeihe dah ai lawh tiah cun “Chikhat lungthawh ah vui that lai bang” timi kan phungthluk ahkhan hlah maw kan chuah ka ti.

Group na tuahmi hloh na duh ṭhan a si ahcun a tanglei bantuk in hin hloh (delete) khawh a si lai:

- Group pakhatkhat kha hloh (delete) duh tikah Admin chungtel pakhat na si hmasa a herh.

- Computer kha na on lai i, na hloh dingmi Group ah khan na lut lai.

- Member timi kha na hmehpiak lai i, Group chungtel (member) vialte an hong lang hna lai i, mah group member chungtel vialte kha lungsau thinfual tein chuah (remove) ta dih hna lai.

- Member vialte na chuah (remove) dih hna hnuah khan, Group hmanthlak tanglei zawn i setting ah na lut ṭhan lai.

- Mahdih cun Edit Group timi kha voikhat in na hmeh hnuah, Group kha Secret tiah na thlenpiak ṭhan lai.

- Ticun, mah na group in khan nangmah kha chuak law, caan rau lo te ah mah group cu hmuh awk a um ti lai lo. A lo thai colh cang ko lai.

Notes: Hi pinleng group hloh (delete) ningcang lam pakhat hmanh a um ti loh.

Poke Sullam

Poke hi a thei len cang zong kan um lai dah. Atu von ṭial duhnak a ruang cu a thei ve lomi hna caah tiah siaherhnak he ṭial chinmi a si.

Poke hi a siamtu hna nih sullam an  ngeihtermi sawh duh loin phundang deih ah a kui len zong an um. Hi poke nih ai timhmi tu cu phunthumte lawng a si ko sihmanhsehlaw an tining nak luan deuh in a hmanning zong langhter khawh kan von i zuam lai.

A hmaisabik ahcun Poke ti hi a tluangtlammi mipa ngai caah cun, “Na dam maw? Na ṭha maw? Tulio zeidah na lawh?” tinak ah an hman deuh tawn. Natein mi cheukhat nih ningcang loin, “Nupa sinak (sex) na hmang huam maw? Khoika hmun le hma ah thla kan i ton lai? tibantuk ah an hman.

- Secret privacy caah tin a hmang ve caah cun, POKE an click ahkhin rak i ralring luau tinak ah an hman.

- Secret privacy hrang i a hmang lo pawl ca zongah POKE ti hi cu, rak i ralring/manh (ready) tinak ah an hman.

- Mi pakhatkhat kha va buaibainak ca hrimhrim ah siseh, an ningzahter nakding ahle zuamcawh (challenge) nak hna ah an hman.

1. Poke hi mi pakhatkhat hei dainak sullam zei nei lem ṭung lomi, hei hliphlauhnak sawhsawh men a si.

2. Mi pakhatkhat kan hawi a si lomi kan hei Poke i, a rak kan Poke ve a si ahcun a profile kha duhduh in kan zoh khawh lai tinak a si.

3. Poke hi mi pakhatkhat nih kan FB page kha nithum chung an duhduh in zoh hna seh tiah cohlannak phunkhat a si i, cun aho mizei bantuk dah kan si timi an theih khawh nakding le an kan add duhnak ding ca santlai ah an tuahmi phunkhat khi a si.

Hihi Poke sullam an ngeihter ning le hmanning a tlangpi hna cu an si.

Hi Facebook kongkau ka von ṭialmi hi keimah nih ka rel i ka theihhngalh khawh tawk le thiamtawkte kha a si i, a hleikhun in ka hawile hna nih an ka hal ṭheo tawn ruangah atu bantuk in hin miring ca a rel kho lo le Facebook lenvahnak maivan hmunlipi ah a buaimi kan um sual ah tiah caantenh in ka von ṭialnak hi a si. Hi a cunglei ṭha tein na pian ko a si ahcun Facebook ah buaibainak na ngei ti lai loh tiah zumhnak ka ngei.

Zei thil paoh hi a hmangtu minung nih a hmanning daan le lungput ah i hngatchan in an i dang kho. Pathian bia, Baibal biatak koko zong hi minung hna nih asi lo ning le a kan duhpiak  ning in kan hman lo a si ahcun sualnak lei a kan kalpi tu a ve ṭhiamṭhiam ko. 

Damnak sii-ai le zu hna zong hi a si lo ningcangpi a hleihluat in kan hman ah khan cun thihnak a si tawn i, a cintawk le si ningcang tein kan hmanthiam ahcun damnak ah an cang ve. Cu ve bantuk in cun Facebook tehna zong hi a siamtu hna nih an siam hnawhchan le an duhning khan si loin a luarpar kan kai tawn i thilṭha a si ko mi zong kha kan caah thilṭha lo sivai bantuk ah an can tawnnak a si.

Cucaah cun Facebook hi a ṭhatnak lei kan hman ahcun kan caah santlai a si ko lai natein a chiatnak lei i hman ahcun kan caah hrawktu le mi va ngeihchiatternak ah kan canter ve ko lai. Cu ti si tikah kanmah nih kan hmanning ah i hngatchan in ka caah zeitluk in dah hlawknak a ka pek le pek lo ti cu theihhngalh khawh a si hnga. 

Zei thil paoh hi kanmah nih kan hmanning he pehtlai in a ṭha le ṭhalo hlawknak hna kha kan tinco i, a bik in kanmah pumpak cio kan hmanning ahkhan ai hngat dihmi an si ti hi philh hram hna hlah usih. 

Hi a cunglei vial hi kan hon tial khawh tawk cu a si. Tial tiah cun a tam lengluang ko tial awk lawngte an si. Nain atu a cunglei langhtermi vial tha tein na thiam ahcun hi pinlei cu na thiam thluahmah cang ko lai tiah zumhnak ka ngei ko.

Lunglawmhnak he...

Ref:

- Wekipedia (Facebook like)

- Facebook.com 

+++