Eikhimka Lakphaksen Hang Din Hrial Ding

Chin miphun hi rawlei khimka ah lakphaksen hang din a hmangmi le hmanglomi kan um hna. A tlangpi in kan unau Mizo pawl hi lakphaksen hang din cu a uarbik pawl an si ko lai dah. 

Zeicahtiah mileng an ngeih caan ah siseh, rawlei khimka tbk., ahkhan lakphaksen hang din an uar ngaingai. Lakphaksen hang maw, a thlummi maw, tiah mi zeimaw cu rawlei khimka ah din kan hmang ngai hna. 

Hiti bantuk in ning ah aa ngeihlen cang zong kan tlawm ti lai lo ti zumh a um ngai. Zeicahtiah kan tuahnak a sauh ve cang caah a si ko men lai dah.

Rawl kan ei dihka ah kan pawpi nih a rianṭuan bikmi cu kan thil eimi pawl rial kha a si. Hiti kan pawpi nih ṭhate i rawl a rial nakding ah hin lakphaksen hang si loin thilthur leikam kha a rak si ziar. 


Cu ruangah India ram thlanglei ummi nih an rawl meh zongah a thurmi an telh tawnnak hna khi kan pawpi rawlrialtu ding ca ruah ahcun ṭhahnem santlai taktakmi a rak si. Mirang pawl zong TV chung an rawl chumhchuanmi pawl kan zoh tik hna ahkhin thilthur leikap an telhmi a tam ngai ve. Rawlka a thawtter lawng si loin pawpi nih kan thil eimi rial khawh nakding ah a biapi tuk ti kha, hlanchan liote in khan an rak hmuh chung cangmi a rak si i, cu ticun hmunzakip ah a rak i zamh tinak a si.

Rawlei khimka ah lakphaksen hang kan din minih hin kan pawpi rianṭuan bawm loin, a dawnkhantu le kan pawpi nih a thurdat a sersiammi tu kha a kham i, a khulnuarhter chin. Lakphaksen hang chim loin, eikhimka ah ti tampi dinpiak zong hi pawpi thursersiamnak a dawnkhantu le nuarhtertu a si ruangah mithiamsang pawl hna nih cunṭha an ti lo i, tha an pek bak lomi a si.

Hiti kan van chim tikah hin, lakphaksen hi taksa caah a ṭha lo tiah ruah ding kan tinak a si hrimhrim lo. Kan lakphaksen hang din le ti kan din ning a caan a hmaan lo le a ṭhat deuh lomi tu kha chim duh bikmi cu a si deuh. Vawlei cungah hin miphun dangdang tampi hna zong nihhin lakphaksen hang hi an ding dih cio ngawt ve ko hna. 

Asinain, rawlei khimka ah a dingmi cu an bengbai lai dah. Atu kan Chin miphun chungin kan unau Mizo pawl nih rawlei khimka bakah lakphaksen hang din an hman ṭheo tawnmi hna khiVai (kala) pawl nih an hmuh tik hna ah an khuaruah a harter tuk hna ti a si. Hi nakhin cun, kan din vekvek ko she kan ti a si lecu, hangthlum zu-ut (juice)leikap deuh hna hi ding kho deuh usih law a ṭha hnga.

Rawlei khim hnuah din hrimhrim ding a si bak lo, kan tinak a si theng lem lo. Rawlei khimdih lecangka bak i ṭhuttolecangka lakphaksen hang din kan hman colh tawnmi hi pawpi rianṭuan khul a nuarhter caah khan a si.

Lakphaksen hang kan ding kan ti si ahcun, rawlei khimdih hnu in suimilam pakhat liamhnu ah ding tawn usih law a dik hmaan lai ti zumh a um deuh ving.

Cun lakphak kan din tikah lakphaksen hang a si ahcun, zeihmanh a meh tel lo i kan din zongah a poi tuk lo. A lakphakthlum hang lawng in kan din thluahmahmi khi pawpi nih a huat ngai tawn. Cucaahcun, a lakphakthlum hang in kan din a si paoh ahcun biskit (biscuit) pakhat tel cu i meh tel chih khawh ahcun a ṭha ngaimi a si.

(Theihternak: Hi a cunglei ngandamnak kong hi Lengzem September 2014 chuak chung an ṭialmi kha aa tlakning in remhmi le lehchinmi a si.)