Vawleicung Uico Ṭha Langsarbik Phun Pawl

Vawleicung ahhin Ui ci ṭha phunphun kha an zuat len hna, kan ram ve zongah mi zeimawzat nih an zuatmi hmuh khawh ding zong an um len ve cang. Ui ci ṭha phun tiah kan ruahmi le kan timi hna hi vawleipi nih hin teh uiṭha phun tiah a kan tipiak ve maw ti kha a tanglei ah kan hun zoh tuah hna hnik lai.

Portugues Water Dog

Portuguese Water Dog: A cal bo ngai, a pumfa tuk lo, hmul chah phun a si i, a kir ngaimi hmul a ngei. Ngatlaihnak i tichung sur tangmi, siao thlak i, siao fungkiakmi le lawngcung in thil a tla sualmi pawl chartu caah le nga tlaih dingin nga a rak ṭhawldawitu caah hman ṭheo tawnmi ui phun a si. Ui puarthak, ingchia phun a si ve lo i, komh a nuam ngaimi an si rualrual in cawnpiakzia thiam lo ahcun ui puarthak taktak ah an i chuah ve tawn.

Newfoundland Dog

Newfoundland Dog: Ui lian phun deuh, a hmul puah pawl, a dum renrun, hun zoh ahcun ui puarthak taktak dingmi ko khi a lo nain ui ziaṭha ngaimi a si pinah hngakchia tuai le lentecelhpi le lawmhtertu caah a ṭha taktakmi a si. Ti leuh thiam taktakmi a si ve ruangah titlami chartu ca zongah hman ṭheo tawnmi a si ve i, hngakchia ngeimi caah cun zuat awktlak ngai taktakmi a si.

Maltese

Maltese: Maltese phun pawl hi cu ui fa deuh ci phun an si ve i, kan ram ah kan hmuh ṭheo tawn lengmangmi hna, ui raang a hmul puah tam ngaingaimi bantuk deuh kha an si. Ui ci (breed) upa ngai cangmi, Greek miphun pawl hna nih an rak zuat ṭheo tawnmi ui phun khat a si. A hmul a tla tuk ve lomi a si i, allergy a neimi caah zuat awktlak tak a si pinah a lianmi ui phun a si ve lo caah hin, hmunhma bitnak le remlonak deuh zongah zuat awk a ṭha ngaimi a si.

Golden Retrievers

Golden Retrievers: Ui lian, hmul sau a ngeimi phun a si. Thil chartu dingah a ṭhahnem ngaimi an si ve. Minung komh an huam ngaingai, hngakchia tuaitam le lentecelhpitu caah an ṭha tuk, cun ui ziaṭha phun an si lawng si loin a fim taktakmi zong an si.

Huskies/Siberian Huskies

Huskies: Cenghnia hlah maw hun ti ding khin a um, Chin miphun nihcun, ‘Hawrhra tlangram Ui’ kan timi phun pawl bantuk hi a si ko. Chinram ah hmuh ding a um rua lo dah ka ti. Siberian Huskies an timi phun pawl hi vawleicung ui lakah zuatu a tongbikmi ui phunkhat an si. An hmul a tawi, an dingdawng a lianṭha ngai, an zia a ṭhat pinah ui dawh zohco taktakmi an si. 

Hngakchia zong nih komh huam tuk ding tlak in an i dawh miltlawr pinah, ui dang bantuk in ‘Ui Rim’ kan timi bantuk a nei ve lem lomi an si. Asinatein, ṭhate zohkhenh thiam ngai cu an hau ve i, exercise lak huampi ngai zong an hauh deuh ve pinah, ruahlopi tlik le leet thutthut hi an hman ngai tawnmi a si. Ui dawh a uarmi nih zuat awkah a ṭha ngai ding a si.

Poodles

Poodles: Hi bantuk pawl hi cu an pumrua liantuk lem lo, fa tuk fawn lo, hmul bawrh lei deuh phun kha an si. An fim duh ngaingai i, thil zeimaw cawnpiak an nuamh pinah minung an daw thiam ngaingai i, tuaitam le lentecelhpi zong an nuam khun ti a si. Cuti rualrual in a ngeitu chung pawl kha an i chanh, an venhei tuk hna i, cun ui dang pawl a rem tuk lem lomi ui phun an si. Hmunhma rem nuam deuh a ngei/ummi caah cun zuat tlak taktak an si.

Beagles

Beagles: Vawleicung ah ui fimbik tiah an ti ṭheo tawnmi Beagles hi ui lianmi phun an rak si lem lo. Hmul pantak, hnakhaw tla felfual phun deuh khi an si i, an rim theihnak a ṭhat tuk caah nehhnu zuldawitu le Airport tibantuk ah acozah sian lomi thilphurtu pawl thilri a kawltu caah an hman tawn hna. Ui fim le ziaṭha, hngakchia lawmh a thiam ngaimi zong an si fawn. Hi bantuk ui hi hnachet taktak an si ruangah hin an hmet lio tein khan chimhhrinh zia thiam ngai cu an hau ve.

German Shepherds

German Shepherds: Hi bantuk uitum phun hi kum 1899 lioah khan an breed chuah cawpmi kha a si. Ui lian phun, zumhtlak, fim le ralṭha takmi an si ruangah hin palik le ralkap nih an uar ngai i, a zua tambik zong an si. Sii-ai, minung nehnang le miruak kawlhawlnak caah a ṭha ngaimi an si.

Pembroke Welsh Corgis

Pembroke Welsh Corgis: Queen Elizabeth nih ui a rak zuatmi phun kha a lian tuk an si lem hna lo i, an pumrua zong an i dawh tuk lem lo. An hnakhaw a lian, an hmur tawi, dingdawng saumi le tawkawng lian ngaimi an si. Hlanlio Welsh tuanbia a cuanning ahcun a cungah Lasi an i cit tawn tiah an chim ṭheo. Ui dukṭha taktak an si pinah, a zuatu hna mi lawmh an thiam i, hngakchia nih an duh ngaingai fawn hna.

Labrador Retrievers

Labrader Retrievers: USA, Canada, New Zealand, UK le hmundang dang tiang zongah a larmi Labrador hi ui lian ci phun deuh an si ve nain, a lian tuk lem ṭung lomi an si. Guide dongs/service dogs an timi phun pawl kha an si i, ui fim ngai le ziaṭha, hngakchia komduh/huam ngaimi phun zong an si fawn. Palik pawl zong nih an i ṭhathnempi ngaingaimi ui phunkhat an si.

Mixed Breeds

Mixed Breeds: Kannih nih ‘cross breed’ kan ti ṭheomi, ui thlahpawlh phun pawl hi lung an si lo tiding phun an rak si naisai lo. Zeica’htiah thlahpawlh zong si ko hmanh hna sehlaw, vawleicung uiṭha thimmi lakah a langsar pawl ah an i tel kho ve. Pure breed pawl nakin an ngandamnak a ṭha deuh, zawtnak an kaihar i, zohkhenh an olsam pinah ei le din tiang in an dukṭha khun i, an rawllak a ṭha deuh. An umnak hmunhma khuacaan he a tlakning hoih in aa sersiam thluahmah khomi zong an si caah hin olzaang tein ui zuat le zohkhenh duhmi caah cun ‘Mixed Breed’ phun hi zuat dingah cun an ṭha.

Theihternak: A cunglei Vawleicung Uico Langsar kong hi Lengzem (August 2014) ah Big Daddy Hmahmatea nih a ṭialmi kha aa tlakning in hun leh chinmi a si.)