Cawnpiaknak Phundang Cabbala

Tutan cu mi tampi nih kan theih lar tuk theng lomi, Judah biaknak ṭengnge pakhat Cabbala asiloah Kabbalah tiah an timi kong zoh rih tuah hna usih.

Cabbala maw, asiloah Kabbalah maw timi min hi a theihngal rih lomi tampi kan um lai ti zumh a um. Tulio vawleicung ah hin Khrihfa tleirawl mino hna caah nuamhcennak lengah hin, cawnpiaknak dangdang, phun tampi an chuak len cang. 

Hi cawnpiaknak lakah hin nitlakram lei milar/minthang hlasak thiam pawl le zukcawl (film star) cangtu hna le mirum, milian pawl nih an uar ngaingaimi a um i, cucu Illumanati hi a si i, adang pakhat cu Cabbala hi a si ve. 

Cabbala hi Judah biaknak ṭengnge pakhat bantuk men ah chim tawnmi a si rual in hin Khrihfa biaknak letin thuk ngai in pehtlaihnak a ngei ve. 


Hi biaknak nih aa timhbikmi cu minung hna kan chungah thilti khawhnak lianngan a ummi tehna, mithleh (magic) tehna le dawi le eih taktak leikap hmangin hai langh tehna, minung cu a tir ah Adam nih chiaṭha thleidannak thingthei a ei hlan i, Pathian tluk bantuk in a si tawn bang si khawh ṭhannak lam hmuhsak/sialpiak kha a si.

Cabbala

Cabbala hi kum zabu pahnih hrawng ahkhan Palestine ram in a rak chuakmi a si tiah zumh a si. Cu hnu in cun Babylon leiah a karhcho chin lengmang. Hi cawnpiaknak hi cauk pahnih Sefer Jetsirah (Book of Creation) an timi le Zohar (Book of Splendor) fonhmi chung in lakmi kha a si. 

Sefer Jetsirah hi Babylon lei in a chuakmi a si tiah an zumhmi a si ve i, miṭhenkhat nihcun hi cauk chung i cawnpiaknak hna hi, Baibal a rak um hlanpi, minung tuanbia a rak umkate, sual in Adam a tluk lio hrawng ah a rak um diam cangmi a si tiah an zumh. Hi book fo creation nih a chimning ahcun vawleicung fimnak ummi vialte hi 32 Paths of Wisdom timi in siseh, Sefirot an inhin theihhngalh khawh dih an si tiah a chim. Hi cauk cawnpiakmi tampi lakah hin thilṭha deuhmi le fimnak lei deuh tampi an i tel. 

Cun, Gnostic cawnpiaknak, Khrihfa biaknak ṭhatlonak lei kal sualpi, Pathian hmuh khawhnak cu vawleicung thil lakah a thianghlimmi pawl hrang lawngah a si ti bantuk phun cawnpiaknak hna hi a doh vemi cu an si. Cabbala a cawnpiaknak ah a sangbikmi phun ahcun minung hna hi bawm tet taktakmi chungah hri in ṭemtawnmi bantuk kan si i, cu chung in chuah khawh nakding lamsialpiak /hmuhsak kha aa timhbikmi pakhat cu a si.

Kum zabu pariatnak hrawng in khan Cabbala cawnpiaknak hi Europe rampi ah karhcho hram aa hun thawk i, cuticun, Germany le France ram hna ah a karh vima tikah cun, Hasidic Movement an timi cawnpiaknak tiangin a hungchuah phahnak a si. 

Hasidic Movement cawnpiaknak ahcun Pathian cu thiang thlarau a si bantuk in a thilti khawhnak hna hi thil khuaruahhar Supernatural Phenomena hna ahhin an lang ṭheo tawn i, cu thilti khawhnak vialte hna cu minung zong nih hin Pathian sinin cun cawn khawhmi a si ve tiah an ti. 

Cabbala cawnpiaknak ahcun Adam sual i a tluk tikah Pathian he an i pehtlaihnak vialte cu a cat dih i, chia le ṭha hngalhnak a let hra tiangpi a thuhnak chungah cun a tla i, cuticun a ropuinak le sinak vialte hna cu a philh dih cikcek. Cuticun minung hna nih kan tuah dingmi thil cu ropuinak/lianhngannak sang a rak philhmi lak ṭhan dingin i zuam kha a si tiah an cawnpiaknak cu a si i, cu thil tlamtlinh khawh hi a harsat tuk ruangah thlarau sinak locun tuah khawhmi a si lo. Cu thlarau sinak he i pehtlaih khawh taktak nakding ahcun minung nih hin amah chungah thilti khawhnak a ummi kha hmang kho dingin a cawnthiam a herh ti’n an cawnpiak fawn hna.

Cabbala ahhin dawi phunkhat mah hngal loin umter khawh ṭung i, duhmi paoh tuahter khawh ṭungmi thiamnak hna, hmailei a cang ding chim chungnak hna, le alchemy hna hehin pehtlaihnak thuk ngai zong a ngei i, minung chunglei thilti khawh ṭhawnnak (inner power) lei i hruainak a si ruangah hin hlanlio black magician hna le tulio black magician mi maksak tampi hna zong hi Cabbala cawnpiaknak in a rak chuakmi an si duh ngai hna. 

Cun, hi biaknak hi a tir kan chim cang bantuk khan nitlak lei ram i minthang milar pawl hna nih heh tiah an luhhnawh thluahmah chin lengmangmi a si i, Madonna, Demi Moore le Mick Jagger hi minthang langsar pawl hna zong hi Cabbala biaknak a biami lakah ruahmi le telhmi an si ti a si cang. Setan biaknak bantuk a si deuh ṭung lomi, Pathian bia zulhlei kam he aa pehtlaimi a si ve ruangah hin mi thinlung a la kho ngaingai mi a si.

Kan I Dannak

Cabbala hi Khrihfa biaknak he ai lawh/khah lonak bik pakhat cu sualnak ah a tlu cangmi minung sual ngeihthiamnak kan hmuh khawhnak/cohlannak kong i cawnpiak ning dan ahhin a si. Cabbala nihcun minung hna nihhin Eden sualnak in ngaihthiam kan si khawhnak ding lam cu kanmah minung hna nih midang pawl nakin thilti kho dingin kan i zuam ve i, midang nakin thilti khawhnak sang deuh kan ngeih i, cu bantuk lamlei hoih incun thlarau sual kan timi bantuk tiang in uk/venhim khawhnak (power) leti in komh hnuah kan tuah a herhmi a si ti leikap in a cawnpiak hna.

Asinain Khrihfa biaknak ahhin cun sualnak ah a tlumi hna an sual ngeihthiamnak caah cun kanmah thilti khawhnak lei si loin Pathian nih ngeihthiam ding in Fapa ngeihchun, kan caah a rak thlahmi zumh kha a zami a si ti kha a si. Hika zawnte hi an i lawhlonak lian taktak cu a si. Cun Cabbala cawnpiaknak nihhin mithleh (magic) lei thiamnak hi biapi tuk ah a ruahmi le sang ngai ah a chiahmi a si fawn i, Baibal chung i Pathian thil khuaruahhar tuahmi vialte zong kha magic a si tiah a ti. 

Moses zong kha magician lianngan taktak a si ve fawn tiah an ti i, Pathian sinin damnak an hmuhmi vialte zong kha magic lei thilti khawh ṭhawnnak a si fawn tiah a chim. Bawi Jesuh kha hi vawleicung magician a ummi vialte hna lakah liannganbik mi cungcuang a si tiah an cawnpiak hna.

I Ralring Usih

Atu ah Cabbala konglam ka rak ṭial duhnak a ruangbik cu kannih Chin miphun hna hi nitlaklei ram pawl tining cang uar le i cawn in ṭhutto kan hmang chin lengmang, mirang rap hlasa minthang pakhat nih bawngbi fual petput ai hrukmi hmuh ahcun rak i hruk ve menmen, sam a linter le linter ve, dinter le dinter ve mei, an thil hruk-aih, an i ṭamhmoihning, an holhning, an nunning hna le an tuah tawnmi thil hna kha hehlawchet tiah zei ruatrat huaha loin hei i cawn ve salam kan hmang ngai va si kaw. An ṭhatnak lei; an teimaknak hna, tei an rialnak tehna, an intuar khawhnak tehna, mah le mah i cawm le i todelh dirhmun siseh, mah kutke te dir khawh ding an i timhnak tehna belte hi cu zohchun kan va duh naisai hna ṭung lo. 

Cucaah cun, Cabbala cawnpiaknak zong hi nitlaklei ram minthang le milar pawl nih an uar chin lengmang tikah hin, a rauh hlante ah kan ram ahhin a hung larte lai timi hi theih khawh chung a si ko. Cu ruangah hi cawnpiaknak konglam ah a hlankante in kan rak i ralrin chung khawhnak caah ti’n ka ti khawh tawk in ka hun thai vemi a si.

Cun tuchan ahhin cun, dawithiamnak le mithleh (magic reality show) phun dangdang, TV channel dangdang ah kan hmuh ṭheo tawn hna. Micheukhat lebang nihcun kan hmuh lio cuahmah ah, khualai i minung a ṭhu sawh komi hna hmanh kha mitṭhep hlan ah an tan mei ko hna i, camera hmai lila ahcun an hei pehtonh khawh ṭhan viar hna. A tam deuh hi cu hlenthawinak hmangin tuahmi a si ko lai dah. Hi chungah hin dawi taktak le Setan nih thilti khawhnak a pekmi hna zong an va um len khomi zong an si.

Vawleicung huap i, tleirawl ṭhangthar mino pawl nih an uar i an i buaipi ngaingaimi cu khuaruahhar thilmak tuah hi a si. Hihi Hollywood nih fakpi in an market mi zong a si ve. Baibal cawnpiaknak taktak langhter hlengṭung loin, Baibal chungah thilmak le khuaruahhar tuahnak pawl paoh kha khawmsuat riangmang in film an siammi a tam ngai cang. 

Tu lioah langsar ngai in mino deuh nih hmuh nuambik zukcawl an timi Harry Potter te pawl hna zong hi dawi lei deuh lawngte kha a si ko. Cucaahcun, Khrihfa biaknak he aa pehtlaimi thil, Baibal he aa tlak ko hlah maw tiah kan ruahmi cheukhat hna hi atu Cabbala biaknak pawl i an zumhning lei hoih hna a rak si sual diam khomi zong kha a si. 

Chin miphun hi thil chimphuanthiam hna nih an chimmi paoh kha i zumh a hmang ngaimi kan si tikah hin, Cabbala cawnpiaknak hna zong hi mizeimaw biachimphuan thiam taktakmi nih van chim ciammam sehlaw tleirawl mino deuh hi cu a burh in kan hei i burh/bung hmanh maw thei ve hlah! Cu caan zong nih cun a hung kan phanh thut khawhmi zong a si caah kan dihlakte in ralring tein um cio ko hna usih.

(Theihternak: Hihi Lengzem chungah an tialmi kha aa tlakning in hon lehcop mi a si)