Mui Dawh Deuh Siamremh Hlainak (Cosmetic Enhancement)

South Korean Nungak: Remh hlai hlan le hnu

South Korea khualipi Seoul khuachung ahcun i chawkvak law, nungak mui dawh taktak na hmuh tengtung ko hna lai, “Mah nungak nu hi khuachung ah a va tam ve, tunaite ahkhan khika hmun ahkhin ka hmuh cang fawn!” ti ding bak in muihmel aa lomi hi na hmuh tung hna lai. Cucu zei ruangah dah a si? Seoul khuapi chung nu 5 lakah 1 hi anmah chuahpimi mui a kengmi an um lo, hmai vun dawh remhcopmi an si hna caah a si. Seoul khuapi nu kum 20-49 karlak zatuak 20% hi cu a hmaifang ai remhmi lawngte an si.

South Korean ‘Mui Ai Dannak’

Cu bantuk in mah chuahpi muihmel a lungtlinglomi le remh a duhmi hna nih cun milar, minthang le muidawh pawl hna muisam thengmang khan thlen an duh ngawt ti a si hoi. 


Muicawl cangtu (Film star) muidawh hmanthlak kha an vai iput riangmang i hmanthlak cu an va piah hna hnu, “Hi bantuk mui hin rak ka ser ve u, hi bantuk mui si hi ka duh” tiah an ti thluahmah tawn hna ti a si. Mitbi tukmi kha an kauhpiak hna, an hnar kha mirang pawl hnar bantuk zohrem tein a langh khawh nakhnga an i remhter. Cuticun, mui aa lo in an tuahmi hna an tam chin lengmang cang. 

Cell phone chuak tharmi i hmuhsak bantuk menmen ahkhin an ruah ko cang, high school le college cacawng liomi sin ko ahhin a lar khun. Pasal nei ding i timhlamhnak a ngeimi hna zong nih ṭamhmawihnak (beautician) panh hmasa loin, doctor te an panh deuh hna. 

Cun an chuah ni lawmhpinak laksawng tehna ahkhan, thilri mawṭaw tbk. laksawng ah i chuah ti loin, muidawhte i remhnak sibawi sinah muiremh ding kha laksawng ah an i pe cang. Nu hi cu ‘Hmai phiah ṭhiṭha hmanh a huam lo’ bantuk ahkhin an ruah men hna. TV i Korean star cangtu kan rak hmuh tawnmi hna a tam u khi cu mui aa remhcopmi lawngte an si hna. South Korea nihhin muiremh duh ruang hrimhrim ah an ram a rak tlawngkaitu pawl sinin phaisa billion tampi an huinak hna. 

Seoul khuapi chungah khin tlang (district) pakhat lebang cu hi bantuk mui remhnak lei pawcawmnak kawlhawlmi hna pawl umnak hmunhmabik a si.

American Nu Pawl Nih An I Hruh/Molhpi Chih Cang

American nu 20 lakah pakhat hi mui aa remh ve mi an si i, 2013 kum ahkhan taksa dawhte remhnak (Cosmetic Enhancement) ca lawng bak ah American nih phaisa a dihheu mi hi $ billion 12 a si. South Korea ahhin, mui i remh dingah minung million 7.5 hrawng an kal cang ti a si. 

American ramchung mui i remh a duhmi hna nih South Korea ram vai remhter an duh deuhnak a ruang cu, thiam deuh ah an ruah hna caah siseh, minung an rak chawnhbiak hna ning le remh man a tlawm caah a si. USA ahcun mui i remhman a tlangpi in $8,000 a si ah, South Korea ahcun $ 2000- $ 5000 hrawng a si. 

Atu bantuk hlai cawm in muihmel sersiam le remh hi an hlaihnu tuah dih hnu ah an taksa fah harsat ning hawih in Sml. 10 hrawng chung hna kha hlainak ihkhun cungah khan ih a hau i, hi nakin a harsa deuhmi cu, zarhhnih chung hna maw taksa fah damnak sii zeihmanh zong ei lo bak in i hngilh khawh lo tluk khan khin um le tuar a si. Mi cheukhat cu leng ah chuak ngam/kho loin thla thum tiang hna maw an tuam tawn hna.  Hmur, biang le khabe hrawng an remh tel chihmi hna cu holh kho lo le ei ding kho loin an um caan chung hi a sau ngai fawn. A fah tuk ruangah hin mi ṭhenkhat cu aa chir lenmi zong an um hna. 

American bantuk in hin tulio ah Tuluk (Chinese) pawl zong nih i hlai i mui remhter tim in S. Korea an panh ngai ve hna. Ramdang cio in S. Korea ram ah muiremh ruah ah an rat tikah hin, an hmai an remhter hnu i, an chuaklei, kirlei ahhin, an passport an hmanthlak le anmah an i remh tharmi muisam kha an i lawh ti lo caah zohfeltu, michektu pawl an buai ngai tawn ti a si. 

Minung chuahpimi muihmel dawhchin nakding caah chanthar thiamnak hmangin ṭamhmawih i remh hlainak, mirang in ‘Cosmetic Enhancement’ an timi khi, dawhnak dingah i hlai, chap le hlonhpiak (tivun) thuh le eidin phun zeibantuk paoh khi a va si ko hnga. Laiholh in cun “I dawhter Deuhnak” kan ti ko lai. Plastic surgery hi, kan takpum chung aa dawhlonak le eksiden lakhruak tonsual ruangah mui a rawkmi serthannak tbk. letin a huapmi a kauh ngai caah “Ṭha deuh in remh hlainak” ti usih law. Cosmetic surgery cu mah chuahpimi muidawhter deuhnak caah le upa si phenheinak le, mui dawhter nakding, “Dawh Deuh In I Hlainak” tiah kan ti ko lai.

A Tir Ahcun

1917 ahkhan, London i, sibawi rianṭuanmi, New Zealand mi Sir Harrold Gillies nih cun tilawng ralkap a hmaivun fak taktak in aa hliammi kha ṭha deuh in a rak hlaipiak bal. Pum tlamtling lo le lakhruak i hliamkhuainak ruang taksa vun a rawkmi pawl hna ca lawngah ṭha deuh in hlainak (Plastic Surgery) hi rak hman tawnmi a si. Cuticun kum le caan a hun rau vawleicung fimthiamnak le thilthiamnak hna cu a hungcho chin lengmang, thilri an hmanmi pawl zong a ṭha chin lengmang, cun thil thar ṭha deuhmi an hmuh chin lengmang tikah cun mui i thlen khawh ti kha a si ko cang. 

Muidawh duhmi cu rak tam tuk hna kaw, muidawh chin ihun remh hlainak rian cu chanthar vawleipi ah pumpawcawmnak hlawk le phaisa laknak ṭhabik lakah a hung cang. Hi ahhin a langsar thar bikmi pakhat cu dawh deuh in i hlainak (Cosmetic Surgery) hi a si.

Khabe remh hlaipiak hlan le hnu aa dannak

Mui remh hlaipiak hnu ni zeimawzat chung hitihin tuar a si

Hruh/Molhpi Zawtnak

Muidawh lo hi zawtfahnak a si lo ruangah dawh deuh in i hlainak hi taksa damnak nakin thinlung lei ‘damnak’ a si. Faknak siseh, khat le khat hmuhsaknak ruangah a larmi a si. Taksa pum thlennak i hruhpinak hi Body Dismorphic Disorder (BDD) tiah an kawh. Mah i chuahpimi pungsan le mui duhlonak, zahpinak le simhnak pinah, mahle mah zumh ngamnak ngeih kholomi kan si a langhnak a si. 

United States minung zatuak 2% hrawng nih, hihi zawtnak pakhat bantuk in an i molhpi, hruhpi chih cang tiah an ruah. Cu bantuk pawl hna cu sibawi a panhtu hna lakah zatuak 15% hrawng cu hi bantuk lei a duhmi hna an si ti a si. Hi bantuk minung pawl hna hi ṭha tein remh hlainak tuahpiak an si hnu zongah an lungtling kho hlei lo i, a nak dawh deuh in remh hlainak tuah ṭhan an duh dih ngawt hna.

A Tar Kho Ti Lomi Dolly Parton (65)

Hi hmanthlak hi June ni 28, 2013 lioah Glastonbur Concert thlakmi a si. ‘Pitar’ a si cangmi, Dolly hlunghlai ning (net worth) hi Rs. 59.23 billion (India Phaisa) a si i, tuchun ni tiang ah tar a sinak apelte hmanh aa hngal kho lo. 

Tar i von langh ding zong aa siang nemmam fawn loh! 1980 kum hrawng ahkhan, hmai, hngawng, hnukte le a tawcor/ṭawkhna kha ‘Ṭha deuh in remh hlainak’ arak tuah viarmi a si. “Kum 100 zong dam hmanhning law, ka plastic hmai hi cu a mahbonte peng a si zungzal ko cang lai!” tiah capo tiang in aa ti phah. 

Mui hi hmai lawng hi a si thlu theng lem lo. A hmaifang neitu le a hlaitu duhning thlap tein hmaifang duhtling bak in remh hlaimi zong hi, a hlan hmaifang nakin a ‘mui’ a chia kho ve ṭhanmi a si ko. Cu ruangah cun ṭha deuh in remh hlainak tuahmi hna ahhin, a hlan nakin hmaifang dik deuhmi ngeih cang ko bu ah a nonal lemlomi hmai, duhnung lomi sinak le zohco theng lomi ah ai cang deihmi zong a um kho. 

Cucaah, dawh/ṭha deuh i remh hlainak aa molhpi cangmi hna hi cu voi tampi remh hlai ṭhan an si tawn. American miphun a simi, Michael Jackson zong kha aa remh hlai ve ruangah aa mualphopi ngaingai. Cun Fashion designer, Donatella Versace zong nih khan a ṭhatpi theng ve lem lo ti hmuh khawh a si. 

Joan ‘Plastic’ Rivers

Americantv host le capo saih thiam, Fashion Icon pakhat, Fahion Police i, capo phundang tete a sai tawnmi, tukum Sept. ni 5 ah a thi cangmi Joan Rivers (1933-2014) nih kum 31 a rak si in kum 79 a si tiang, kum 50 chung, voi 738 a hmai a remh hlaiter lengmang. 

“Plastic surgery ka hmang tam tuk cang i, ka thih tikah cun ka taksa hi Tupperware pawl sinah kuat siseh law a ṭha lai!” tiah capo in a chim phah ve. Tivun aa dawh lonak hlih (chemical peel) le Botox hmangin sii chunh pinah, hnar remh hlainak (Nose jobs), hmai cuar dawhnak (Facelift), mit kiangkap tivun dawhternak (Brow lift) le tivun tangah a ummi thau hleihluat ummi hlonh (liposuction) vialte hi a tuahter petmi a si.

Ṭha deuh in remhhlainak phun dangdang tampi a um len hna i, dawh deuh in i remh hlainak hna, meikangh ruangah mui rawkmi remh hlainak tehna, hmur a zummi, ṭe deuhmi remh hlainak hna, kutke tlinglo le kutke bul/zoh dawh lo remh hlainak tehna, tivun chung thisenzam pehtonh tehna,hngakchia remh hlainak lei pawl hna hi cungcuang langsarbik timi hna cu an si.

Muidawh Remh Hlainak Man

Mui Remh Hlainak Phunphun

Dawh deuh in i remh hlainak: (Cosmetic/aesthetic surgery) zong hi phun ṭengnge tampi ah an ṭhen ṭhan hna i, cu lakah cungcuang langsarbik pawl cu:

Hmai dawh remh hlainak: Mit vun cuar renghter deuhnak (eyelid surgery/blepharoplasty),  Hnar remh hlainak (Rhinoplasty/nose job), hmur/ hmur tang remh hlainak (lip enhancement), biang bo/puar tukmi remh hlainak hi ‘cheek implant’ ti a si. Khabe dawh deuh remh hlainak (genioplasty/chin implant) khawbe tawi tukmi hi silicone implant hmangin dawh deuh ser remh hlaipiak khawh an si. Hnakhaw dawh deuh remh hlainak (otoplasty).

Vun reng deuh remh hlainak: (Rhytidectomy/facelift) arsik aa hngal pengmi le vun hmelchunh le upat ruangah vun cuar rengh dawh remh hlainak a si. Hmai vun zong siseh, hngawng vun rengh dawhter remh hlainak (neck lift) le cal vun cuar chahmi renghter remh hlainak (browplasty) le biang vun rengh dawh remh hlainak (cheek lift) hna zong an i tel. The American Sociaty for Aesthetic Plastic Surgery nih a tarlangh ning dan ahcun, kum 2004 ahkhan American 1,50,000+ hna nih an hmaivun tarvun pawl huhphennak le langhlonak dingah an hmai vun cuar dawh deuh in an i rengh remh hlaiter hna a ti.

Hmai ruh dawh remh hlainak (Orthognathic surgery)

Ban vun cuar renh dawh remh hlainak (brachioplasty/armlift)

Thau hlonh (liposuction/Cryolipolysia) thau aa funhlawm tamnak zawn maka thau tlawmter deuh.

Hnuk dawh deuh remh hlainak, lianhter deuh le fualmi chinhternak, (Breast implant/breast liftmammoplasty)

Pawpuar hlonh (tummy tuck/abdominoplasty)

Tawk le tawcor dawh remh hlainak (Butt implant/Butt lift)

Nu (zeimawlo) thilri/zahmawh dawh deuh remh hlainak (Labiaplasty)

Pa (zeimawlo) thilri/zahmawh dawh deuh le lianhter remh hlainak (Phalloplasty)

A cunglei kan chimmi vialte hna hi thilri phunphun hmangin sibawi tenih hlainak ihkhun cungah remh hlai khawhmi lawngte an si dih cang hna. A tanglei bantuk hna belte hi cu remh hlaimi si theng lo i, ‘Ṭammawihnak’ phundangte cu an si ve hna.

Laser hmangin tivun ṭhatlonak zawn remhpiaknak (Laser skin rejuvenation)

Tivun aa dawh lonak zawn thiang tein ziahpiak (Chemical peel) arsik, hmai bo tbk., umnak vun thianh ziahnak. A dihlak a reh khawh lo a si hmanh ah a fatter deuh hrimhrim lai.

Botox: Tulio a lar taktakmi cu Botox (Botolinum toxin) hi a si. Hi toxin hi minung hna nih sivai an thei khawhmi vialte lakah a cakbik pawl a si. Botox gram khat nihhin minung million khat a thah khawh hna hi tluk in a cakmi a si. Botox kg khat nihcun kg nih hin vawleicung minung a ummi vialte hi a thah khawh viar hna lai. Cutluk in a cak/thawngmi sivai cu, muidawh duh tuk ruangah, fil/dal khawh chung in an tuah i, hmaivun chungah an i chunh! Botox hi ṭammawihnak ah hman a si lengah, sii-ai ṭhenkhat ca zongah an hman ve tawnmi a si.

Tha rengh cangmi dorh deuh ṭhannak dingah hin kan theihhngalhnak thazam hri (nerve) nihhin kan thil theihmi hei thanhnak (neurotransmitter) caah acetylcholine hi a hmanmi a si. Botox hi a fil/dal khawh chung nem dingin khan an sersiam hnuah hmai cuar chungah cun an chunh hna. Botox injection chunhmi nihcun theihhngalhnak thazam hri donghnak par le tha cell karlak i acetycholine cu rianṭuan kho loin a um/hngilh/zenter hna. A hun renghtu bik ding nih rianṭuannak caang a theih khawh ti lo tikah cun, a vun cuar kha a ṭhan maw siseh, a chahter kho ve ti lo. 

Botox injection hi lu hem fah rehternak (Chronic migrane) le theihhngalhnak thazam hri aa pialkalh sualmi nih taksa a rengh tuk dingmi vennak ca zongah an hman fawn. Botox hi chunh dih hnu in Sml. 24-72 chung bak ah a rianṭuanmi hi a tlangpi in a lang colh dih ngawt. Asinatein, naupawi lio le nau hnuk dinh liomi le hi sii-ai a huami pawl nih cun i chunh lo hrial ding a si ve.

(Theihternak: A cunglei capar hi Lengzem thawng cabu, November 2014 chuak chungah an ṭialmi kha aa tlakning in von lehchinmi a si.)