JAPAN Ram Ahcun...

Japan Ram Sianghngakchia Sianginn Chuncaw an ei khim Ha an i tawl lio...

1. Sianginn (school) ah nifatin minit 15 chung peng, cachimtu saya/mah pawl nih sianginn thianhlimhnak an tuah lengmang. Hiti an tuahmi hi hlan an pi le pu chanlio  tein khan an rak tuahṭhanmi an nunphung pakhat a si.

2. Japan miphun a simi paoh nih ui an zuatmi khuachung an lenvahpi tik paoh ah, ui nih a ek sual tik i, a ken nakding bawm pakhatkhat an i ken zungzal.

3. Thianhhlimhnak lei rianṭuantu pawl hna hi “Hmunphiak” an ti ve hna lo. “Health Engineer” tiah an ti hna. Thlakhat ah US Dollar 5,000 – 8,000 (Rs. 2,83,000 – 4,53,000) tiang  in thlahlawh an pek hna.

4. Japan miphun pawl nih hin an ramchung thil chuak chim awktlak an ngei tuk theng lo. Lihninhnak ram a si ruangah zeitik caan paoh i lihnin lakin an him khawh nakding ah an i zuam zungzal. Asinatein, cucu an ram ṭumchuknak le santlaihlonak caah an hmang bal lo i, vuleicung ram ṭhangchobik dirhmun tiang ah an i vorh kho ko.

5. Vuleicung tuanbia (history) ah bomh ṭihnungbik tuksaphur Atom Bomb thlaknak Hiroshima khualipi kha, bomh nih a tlak hnu kum 10 ah, bomh rak thlak hlan bantuk khualipi pangai ningkelte ah an sersiam khawh ṭhan. Kum 40-50 chungah Chinland kan ram hi zeitluk in dah kan ṭhanchoter i kan sersiam khawh ve. Ruat tuah hna usih!

6. Japan ram ahcun, tlanglawng, lakphak dawr (restaurant) le fianrial hmun paoh ah mobile phone hman an khap.

7. Japan ram ahcun tang 1 le tang 6 karlak ah, Ethics Subject hi sianginn ah an cawnpiak hna. Minung kan i pehtlaih ningcang le i biakchawnh ning ziaza lungput ṭha kha biatak tein an chimh cawnpiak hna i, cu nih cun ziaza aa dawhmi sinak lei hunchonak ah lam a hruikaai hna.

8. Vuleicung ah ram rumbik pawl an si ve ko natein, sal le sinum an ngei bal lo. Chungkhar rian le hngakchia zohkhenh cu nulepa nih an tuahto dih viarmi a si. Chungkhar a sunhsak ngaingaimi an si i, chungkhar kehkuai lai hi an phanbikmi a si ve.

9. Tang 1 – tang 3 tiang hi sianginn ah thil tuaktan, khuaruah thiamnak le ziaza lungput ṭha hna an ngeih khawhnak kha a pakhatnak bik ah ruah khunmi a si i, sianginn ah camipuai (exam) tuahter a um bal lo.

10. Buffet timi (artlang tein meh an hun i, mahle duhmi paoh kha mahte in i suahmi rawl-ei ningcang phunkhat) rawl an ei tikah zeitik hmanh ah an eimi rawl an ngan bal lo. An ei zat ding tein an i lak i, an i lakmite cu a dih khitkhet tiang an ei zungzal tawn.

11. Caan a upat taktakmi miphun an si fawn. Caan ṭhate hmanzia thiam le upat hi Pathian he i tluk bantuk phunkhat ah an ruah. Zeitluk in dah caan an upat khawh tiah cun, kumpi kumkhat chung tlanglawng amah caan teah a kal lo a tlai (delay) hi fonh dih ah second 7 tehna a si tawn!

12. Sianghngakchia pawl nih sianginn ah chuncaw an ei khim dih paoh in an ha an i hnawt, kam an thuah zungzal hna. Cu bantuk nun ziazaṭha ngei dingin cun an hmet lio tein an ṭhanlianhter hna.

(Theihternak: Hi theihtlei kong hi Lengzem June 2013 chuak ka relmi kha aa tlak ning in von lehchinmi a si)