American Sniper Taktak Thattu Thih Hlanlo Thong Tla Lai

Chris Kyle

Christopher Scot Kyle ti mipa hi a theihngal lo na si zongah blockbuster movi American Sniper hi cu na theih hrimhrim lai ti zumh a um. Hi film, American Sniper hi US Navy SEAL, Chris Kyle a tuanbia an thlakmi movi a si. Kyle hi meithal in kahthah a rak si i, cu an rak thahnak biabuai (Case) hi tuzarh ahkhan biachahnak felfai tuah an lim cang.

Box Office movi ah a hlawhtlingmi, American Sniper film nih a tuanbia a langhter bikmi, Kyle a thattu cu Texas court nih sual an phawt cang i, thih hlanlo thong tla dingin hrem siseh an ti i, hi a tan chungah hin aamahkhan (parole) zong in a chuak kho lo ding tiangin biachahnak tuah a si.

American Sniper movi hi US Navy SEAL, sniper meithal kah thiam taktak mi, Kyle tuanbia an thlakmi kha a si. Kyle hi February 2013 ahkhan Texas i, Fort Worth ah a ummi Eddie Ray Routh nih, Kyle le a hawipa, Chad Littlefield cu a rak kahthah hna.

Routh, kum 27 mi nihhin Kyle le a hawipa, Littlefield hna hi ngeihthlem (ambush) in an hnunglei ah meithal in a kahthah hna. Kyle hi Texas State Cemetery, Austin khua ah phum/vuiliam a si i, hi thlanmual hi thlan palkaitu a hlawhbik zongah aa tel ve.

Sniper pawl hna nih buaibai harsatnak an tonbik tawnmi cu thinlung lei harsat hi a si tawn. Kyle hi a tir ahcun dum kaupi (ranch) a ngeimi a rak si tawn. Mah cu hnuah US Navy SEAL ah a lut i, sniper a hung si tikah, meithal kah zong a thiam tuk hringhran. Ralkap in aa ngol hnu in hin thinlung leiah harsatnak a ton ngai ve tikah, ralkap aa chuak cangmi pawl dang hna sinah bawmhchannak hi a hal ṭheo tawn hna i, annih zong nih an rak ṭanpi ve ṭheo tawn. Amah a kahthattu Rough leti’n zong hin aa theihngal ngaimi an si fawn.

Rough i, a sihni pa nih cun Rough nihhin thinlung lei ah harsat le buainak a ton tikah hin, Kyle le a hawipa hna zong hi amah thah timmi a rak lengkai tawn lengmang tu pawl ah a ruah hna i, amah aa venhimnak ah ti’n meithal hi a hmehpuahnak a si ko, tiah biaceih zung (court) ah, amah Rough a tanhnak kong le, sual ruang le huatnak ruang hrimhrim ah a thahnawnmi hna a si lo tiah a chim.

Prosecutor (sualpuhtu) nihcun Kyle le a hawipa, Littlefield hna hi meithal mu 12 in 13 hrawng nih a khenh hna tiah a chim. Littlefield i farnu vapa, Jerry Richardson nihcun Rough sinah, “Ram le miphun ca rianṭuanmi pasalṭha minung pahnih nunnak na lak i, hi hna hi nangmah kawmh an duh zungzaltu zong an si. Atu thawk hincun nang hi cu American mizapi nihcun na ṭhatlonak lawngte an in hngalh cang lai i, zaangfahnak an in ngei ve ti lai lo,” a ti.

(Chris Kyle: American Sniper tuanbia (history) ah ṭihnung bik tlaitu cu Chris Kyle hi a si i, kum 1974 ah a rak chuak i, kum 2013 February 2 ahkhan meithal in an rak kahthah i a nunnak a rak liam. Iraq ah period li (4) chung kha a rak ummi zong a si. Snipter in a kahthah zat minung tiah an zapite in hin mi 160 an tling i, hi a kahthahmi hna hi ralhrang pawl lawngte an si. Kum 2009 ahkhan ralkap in aa phuak i, aa phuak hnuah hin ralkap dang pawl kha meithal kahcawn a chim tawn hna. Kum 2012 ah a tuanbia cauk ṭialmi, American Sniper cu cuah a si i, hi cauk zong hi mizapi nih an duh ngaingai i, zuarzamh hlawh cauk ah aa tel kho ve. Hi cauk chirhchan hin film an siam/thlak ṭhan tikah hi zong hi a hlawhtling ngaingai rih, mizapi uar le duhmi, chimceih a tong ngaingaimi ah aa cang ṭhan. -TCP)