US President Pawl Pumhnak Khrihfabu

US President pawl hi an dihlak in Khrihfa an si dih ti cu zapi theih le hngalh a si. Khrihfa ṭha taktak tehna, khrihfabu ngaihven i biapi ngai a chiami tehna, le a ngaihven/biapi a chia theng lem lomi tehna, cun Khrihfa si ve ko nain pumhnak khrihfabu reprai ngei lo zong an um ve fawn i, Khrihfabu ah an buai lo timi kha hmuh khawh an si hna. Kan hnung i, New Research nihcun US President ṭuanmi vialte an i pumhkhawmhnak Khrihfabu kha dothlatnak ṭha tein an ngei.

Hi dothlatnak an ngeihnak i a langhning ahcun US President lakah hin Episcopalian Khrihfabu in a tam bik an i pum, George Washington, James Madison, William Henry Harrison, John Tyler, Zachary Taylor, Chester A. Arthur, Gerald R. Ford, George W Bush te pafa le Franklin D. Roosevelt hna hi Episcopal Church ah chungtel (member) a lami an si. Presbyterian hi a vun changtu a si i, Andrew Jackson, James Buchanan, Grover Cleveland, Benjamin Harrison, Dwight D. Eisenhower, Woodrow Wilson le Ronald Reagan hna hi Presbyterian biakinn ah a pum khawm tawnmi an si. 

US ah khin Roman Catholic (RC) hi a lian theng lem lo, John F. Kennedy lawng kha US President ṭuanmi chungah Roman Catholic ah aa pumkhawm i member a lami umchun cu a si.

James Polk le William McKinley hna kha Methodist Khrihfabu aa pumkhawmmi an si i, Theodore Roosevelt le Martin Van Buren hna kha Dutch Reformed Khrihfabu ah an i pum tawn ve i, James Garfield le Lyndon B. Johnson hna kha Diciples of Christ Khrihfabu ah an i pum tawn ve. Herbert Hoover le Richard Nixon hna kha Quaker an si i, John Adams, John Quincy Adams, Millard Fillmore le William Howard Taft hna kha Unitarian an si ve.

Andrew Johnson, Ulysses Grant, Rutherford Hayes, Thomas Jefferson le Abraham Lincoln hna kha Khrihfa an si ko hmanhsehlaw khrihfabu theng chungtel sinak maw, i pumhnak khun timi maw, pehtlaihnak a ngei lomi an si i, Jefferson hi a hlan ah Orthodox a si tawnmi a si natein a hnuah Orthodoxy hi a chuahtak hnuah Bawi Jesuh cawnpiaknak a cohlangmi ah aa cang ve. 

Lincoln zong hi Pathian bia le Pathian konglam a chim lengmang tawnmi a si natein zei khrihfabu theng ti pehtlaihnak tuah in, chungtel member sinak a la lo i, Khrihfa a si le si lo kongah hin i elhnialnak hna a um ṭheo tawn ti a si.

Bill Clinton, Jimmy Carter, Harry S. Truman, le Warren G Harding hna hi tipil (Baptist) khrihfabu an si i, Jimmy Carter hi US President vialte lakah Pathian ai bochanbik le zumtu ṭhabik tiah an ruahmi pa a si.

Atu lio US President Barack Obama hi a pa Muslim, a nu Khrihfa an si. Amah hi biaknak lei biapi ah a chia theng lem lomi chungkhar ah a ṭhanglianmi si ko hmanhsehlaw a upat hnuah khrihfa ah a lut i, United Church of Christ ah aa pum tawn ve. Asinatein Jeremia Wrigh letin an van i sukkhak nawn hnu in khan hi khrihfabu hi daithlanh in a um i, khrihfabu dangdang ah ai pum i khrihfabu i pumhnak bik a ngei ve ti lo.

(Theihternak: Hi a cunglei cabia tawite hi Makedonia Weekly ah an tialmi kha aa tlakning in von leh chinmi a si)