Minung Pa Hleiruk

American Doctor Franklin kha S. Africa ram, khuate pakhat ah Missionary rianṭuan dingin a rak i thawh. Zingka Sml. 7:00am ah S. Africa khuapi Johanesburg cu a phan. Cu a phanhnak khuachung zalamtlang minung kalnak lamṭe pakhat ahkhin tlangval pahnih kha an rak i vel i, pakhat deuh nih hliamhma fak ngai a tuar. 

Cu aa vuami tlangval pahnih an i ngol dih in, Doctor Franklin nihcun hliam a tuarmi tlangval pa kha a zaangfah tuk tikah a zuanhnawh i, a hliamhma tuarmi kha a thianhpiak hnuah sii-ai aa kenmi a chuah i, a hma ah a thuhpiak. A hliamhma a tuampiak dih hnuah sibawipa nihcun lungtha nuam tein a kaltak ṭhan.

Hi thil a can hnu thlaruk a rauh ahkhin Doctor Franklin le tlangval a hliamhma tuamhlawm mipa he cun ruahlopi’n an i tong.

Tlangval, “Doctor, na dam lio a si maw? Bia hal ding kan ngei”.

Doctor, “Aw ka dam ṭha ko. Zeidah hal ding na ka ngeihmi a si. Hong ka hal ko”.

Tlangval, “Khati ka hliamhma na ka thlop lioah khan, America Doctor, Africa khuate ah Missionary rianṭuan dingah a rami na si ti kha kan theih colh. Sii manfak taktak hna le phaisa tampi naa ken lai ti ka ruah caah, na ka kaltak lecangka bak khan ka hawile minung pa 5 phone in ka hei auh colh hna i, hmun fianrial na phanh bak ah damiah ṭaih dingin a thlithup tein kan rak in zulh dawi. 

Asinatein, kan i ruahlopi’n AK-47 aa kenmi minung 16 nih an in ven ti kan theih tikah a naih hrimhrim kan in naih ngam ti lo. Kha liocaan ah na pawng in an rak vengtu minung pa 16 hna kha nan ram acozah nih maw nangmah vengtu le congtu dingah an rak thlahmi hna an si?”.

Doctor, “Cu bantuk thil zeihmanh a um loh. Capo bia maw na chim ka ti?”

Tlangval, “Cuticun, ruat sawh hlah. Kaa capo hrimhrim lo. Keimah lawng si loin ka hawile dang hna zong nih keimah ka hmuhning bantuk te hin an hmuh ve. Na ka zumh lo a si ahcun ka hawile cu ka hei phone hna lai,” a ti i, a hawile pawl cu a phone colh hna. A hawile pawl zong nih cun tlangval pa chimning bantuk tein an hmuhmi thil kong cu an chimh ve.

Cu bia an chim dih in an dihlak an i ṭhen ṭhan hna hnuah Doctor nih cun cu kong cu a ruah lengmang tikah a khuaruah a harter tuk hringhran.

Doctor Franklin cu a rianṭuannak kum donghlei a phanh cang caah Krismas hmang dingin an ram America ah a tlung. Pathianni zing pumh ah a rianṭuannak he pehtlai in report a pekpah ahcun Tlangval pakhat he bia an i ruahnak kong cu a chim chih pah.

Cuti bia a chim lio cuahmahpi ahcun, zapi sin a ṭhumi mipa pakhat hi a rung dir i, “Doctor, Um ta rih hnik, na chimning ah, kha thil a can lio kha Cawnningani zinglei Sml. 9:00am a si i, mah hi caan lio kha biakinn chungah zing thlacamnak kan tuah i, thlacamnak ah nangmah ca campiak dingin na min ka rak telh i, thla kan rak in campiak. Kha lio caan ah thla a campiakmi vialte kha van dir ta hnik usih,” a ti. Kha lio caan thlacammi vial an dir tikah, “An dihlak Minung Pa (16) an rak si taktak”.

“Zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. Cun Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai”. (Filipi 4:6-7)

Hawikom dawt ule nau hna, Pathian sinah lungthin tak tein zumtu hna nih kan thlacamnak hi a lak a si bal lo. Lungthin takte thlacamnak nih hin thil ti khawh ṭhawnnak a ngei tuk timi hi philh hrimhrim hna hlah usih. Dongcat loin Pathian sinah thlacam kan daithlan ding a si lo.

Pathian nih a reltu kan zapite cungah thluachuahnak kan pekpiak ko seh. Amen!

(Theihternak: Hi cathaimi tawite hi internet chungah ka hmuh i, a ṭha ka ti tuk ruangah le careltu caah santlai ṭhathnemnak petu a si hrim lai timi ruahchannak he ka van leh chinmi a si)