Pathian A Tlaihchanmi Boksing Thonghthiam Manny Pacquiao

Manny Pacquiao

May ni 2 ahkhin vawleicung Boksing thonghthiam lakah tuanbia ngei bik pahnih Manny Pacquiao le Floyd Mayweather Jr cu an i thong lai. Hi boksing pahrang ngei pahnih tutan an i thongh ding hi, boksing vawleipi ah phaisa tambik a rut dingmi, i thonghnak a si lai tiah zumh le ruahchan a si i, atu boksing thonhthiam pahnih nih hin atu tan hrihrual kulh chungah zaan khatte an i thonghnak in hin dollar million in an hlawh veve lai. Asinain, hi phaisa a tomtom in a hui dingmi Pacquiao nih a sunhlawih i, aa uanthlar deuhmi cu Jesuh Khrih a si.

Kum 36 upa Filipino boksing thonghthiam Pacquiao (pah-key-OW tiah rel ding) hi division hmun dangdang pariat chungah a champion hmasa bik umchun a si. Voi 64 professional boxing match aa celhnak ah amah he aa khingkhaang mi 57 a tei hna i, voi 38 bak amah he aa khingkhaang kha ‘knock-out’ in a hrilh hna. Voi nga a rak sung i, voi hnih an i tluk.

Tutan a thonghpi ding kum 38 upa Mayweather hi voi 47 aa thonghnak ah a sung bal bak rih lomi a si i, hi aa thonghciami chungah minung 26 cu ‘knock out’ in a hrilh ve hna. Mayweather hi phaisa a hruhmolhpi mi le uangthlar hmang, aa cua taktak minung a si i, a hlan i, ‘Pretty boy’ Floyd an rak ti tawnmi zong kha, atu hnuah cun ‘Money’ Mayweather tiah a ko mi zong an um len phah. 

Asinatein, boksing aa thonghthiam lawng si loin, thluak a ngei i, a fim ngaingaimi a si ruangah atu aa timhmi a dirhmun hi a phan kho ve. Cun hi a phaisa ngeihchiah aa uang thlaar tukmi zong nih hin mitheih a hlawhter chinchap hoi rih ti a si. Atu tan an i thonghnak ding hi amah a ṭhan lianhnak MGM Grand Gerden, Las Vegas, USA ah a si lai.

Floyd Mayweather Jr

Boksing thonghthiam pawl hna nih hin boksing an i thongh lai ahhin an thil hruk-aihmi le ha vennak (mouth guard) man ah hin phaisa tampi an dih heu ve. Tutan Money le Pac-man nih an hman dingmi ha vennak (mouth guard) zong hi van tawng in an man a fak. Money hman dingmi ha vennak hi dollar $25,000 man ah ruah a si i, hihi sui le lungvar cawhpolh in an ṭamhmoih i an sermi a si. 

Pac-man hman dingmi zong hi dollar $25,000 man a si i, muici zawng phunphun cawhpolh in an sermi a si ve. Hi tutan an i thonghnak ahhin Money nih dollar $120 million le Pac-man nih $80 million ti’n an hmuh veve lai.

Pac-Man ti zongah min deu an bunhpiakmi Pacquiao zong hi aa style ning, a thilhruk aih sanning le nungak nonal ṭhaṭha a kawmh zalonpi len khawhmi ko nih khan mi theih a rak hlawhter ngai ve tawn natein, atu ah cun Jesuh khrih ah nun thar a ngeimi a hung sican hnu hin mizapi zaran nih an hmuhning a van i dang ngai.

Kum 2011 ah Khrihfa si aa rak otmi Pacquiao nih 2011 lioah Juan Manuel Marquez an i thongh tan i, England ram thawngcabu lar The Guardian ah teitu a sinak ruangah a lunglawmhmi si loin Jesuh khrih dawtnak a theih ruangah aa lawmhnak cu, “Nihin ni ah ka lunglawmhnak bik cu lam dik/hmaan ka hmuh i, ka hrinṭhanmi ruangah hin a si. Minung hi hrinṭhan dingah ruahchanmi kan si. Jesuh nih a hrinṭhan lo mi paoh cu, vancung pennak chungah an lut kho lai lo tiah fiang tein a kan chimh cawnpiak i, ka caah hin hrinṭhan hi a rak biapi tuk hringhran. Jesuh nih, “Keimah hi lam le biatak le nunnak cu ka si; keimah sinin ti dah lo cun ahohmanh Pa sin an phan kho lo,” tiah a kan ti. Jesuh Khrih lawnglawng hi lam umchun cu a si i, amah ti locu lam dang a um lo,” tiah a hrinṭhannak kong cu a chim phuan.

Pacquiao nih Fox News Sunday sin zongah Jesuh nakin biapi deuh ah chiahmi dang a ngeihlonak kong a chim. “Biakinn kan saknak a ruang cu Baible nih tuah dingin a kan ti caah a si. Rethei harsa le nuhmei ngakṭah buangro kan bawmhchanh hna lai i, hngakchia sinah Pathian khuaruahhar thil tuahmi a nungmi Pa Pathian a sinak kong kan cawnpiak hna lai. Cucu Pathian nih tuah u tiah a kan fialmi rian a si ruangah hi rian hi pehzulh in kan ṭuan zungzal lai,” tiah bawmhchanh a herhmi minung bawmhchanh hi Pathian nih tuah u tiah a kan fialmi kan tuah a si tiah a chim. 

Kan hnungnaite ahkhan Pacquiao nih boksing thonghthiam lawng ka si lo thil dang zongah thiamnak pahrang ka ngei ko pei tiah ram mizapi rethei sifak intuarnak langhter khotu dingah ringawn zukcawl hlaphel aa chuah i, Filipino holh in hla a sa.

Pacquiao nih uangthlar taktak in Khrihfa a sinak a tlangaupi mi nih zeitluk in dah Khrihfa ṭha le Pathian tlaihchannak a ngeimi a sizia a langhter. Hi pin lengah a facebook page lei kan len a si zongah Baibal chaang ṭhaṭha a tarh lenmi hmuh khawh a si rih fawn.#

(Theihternak: A cunglei cabia tawi hi vanglaini daily newspaper (thawngcabu) 23 April 2015 chuakmi le a dangdang hna kha pehtonh in aa tlak bik lai tiah ka tining in ka hun tial chinmi a si)