Mayweaher – Pacquiao Thongh Ding Thlihran A Ṭha Chin Lengmang

Pacquiao - Mayweather

May ni 2 ahkhin vawleipi nih aa ngeih hringhranmi Floyd Mayweather le Manny Pacquiao cu hrihrual kulh chungah an i thong lai. Hi an i thonghnak hmun Las Vegas ahcun hi hna pahnih kong dah ti lo cu atu ah zei thil kong hmanh a leng lo tluk a si cang ti a si.

Phaisa A Tamnak Cu: Atu tan ah Boksing thonghthiam pahnih an i thongh ahhin dollar 400 million an hmuhte lai tiah ruah a si i, hi phaisa vialte hna hi lehmah zuarmi le vawleicungpi TV in an pekchuahhmi in a lut dingah ruahmi a si. 

Mayweather nih tutan aa thonghnak in hin dollar 150 million hrawng a hui lai tiah ruah a si i, Pacquiao belte hi a hlawhmi a tlawm deuh i, dollar 100 million a hui ve lai. I chawr awk ngaingai cu a tling ve hrimhrimmi a si ko rua dah ka ti.

Sining Aalo Lomi Minung Pahnih: Michigan khua ah a chuakmi Mayweather hi a phaisa a ngeih ngaimi a si i, mi hmai ah i pholangh le i chawr tepawl hi nuam a ti sazawng phun khat a ti. Boksing thonghnak in phaisa a hmuhmi vialte hi atu tiang ah dollar 400 million a tling cang i, mawṭaw manfak taktak mi 98 hrawng a ngeih pinah, lawngkasa leiah cen zong hi a huam ngaingaimi a si.

Vawleicung boksing thonhthiam Muhammad Ali nak hmanh khan thiam deuh ah aa ruahmi mahfak Mayweather nih, “Ali nih khan ‘bosing thonghthiam roling bik’ ka si tiah aa chim, Asinatein, kei tu hi cu ‘boksing thiam vialte lakah a ṭha bik ka si ve,” a ti.

Pacman tiah theih le milar Pacquiao tu hi cu tangdor nun ngeimi a si pinah, Pathian a ṭihzahmi pa zong a si rih. Ringawn hlasak lei zongah thiamthil pahrang a ngeimi a si i, hlasak a thiam ngaingai. A chuahkehnak ram Philippines lebang ahcun a uar hin, an uar kho tuk hringhran i, an i molhpi  hlah maw ti awklei khin an um ti a si. 

An ram Sarangani zongah congressman a si rih. Boksing vawleipi a luh ni thawk in phaisa a hmuhmi dihlakte hi dollar 300 million a si cang. Philippines senator Sonny Angara nih, “Manny hi kan zohchun bik a si. Amah aa thongh caan paoh ahhin cun khuachung hi michawk let an um bak lo i, daidup khin a king tawn,” tiah a uarnak kong a chim. Pacman nih hin 2017 an ram thimnak ah Philippines President cuh zong aa tim ti a si.

Pacman hi a uarṭanhtu (fan) pawl an tam ngaingai i, hi amah a uarṭanhtu lakah hin Prince Harry zong aa tel. British siangpahrang innchungkhar leti’n hin an i pehtlaihnak a ṭha ngaingai ti a si i, fanu panga a hrinmi lakah pakhat cu ‘Queen Elizabeth’ tiah min tiang in aa sak phah.

A zoh an nuam lai maw?

Boksing thonghthiam pahnih hna hi micheukhat nih zoh an i ngaih ngai lioah, mi ṭhenkhat ve nih cun a zoh an nuam theng lem lai lo tiah a ti zong an um ve. Hiti an ti hnawhchannak biknak a ruang tiah an purhdah cio ning cu, Mayweather hi aa thongh fatinte i phenhei le ven lawngte a rianh ruangah hin a si bik. 

Kum 38- upa a simi boksing thiam nih hin aa thonghnak cuanh le zoh lengmang tikah mah nih hei zuanh le hei thongh hmaisa (attack) a tuahmi hi a tlawmte i, hrihrual kulh (ring) chung i hrihrual zawn zul in i hel chukcho ‘counter-attack’ ah aa hngatchat tuk tawnmi a si. Boksing thiam a rak celhpimi vialte hna lakah a tha bik a simi Pacquiao he an i thongh hnik tikah hin voiding nak let in aa ralring fawn lai i, hi nih hin an i thongh zoh a dawhterte lo viar khawh tiah micheukhat an thinphang ngai.

Kum 36 upa a simi Pacquiao belte hi cu a cawlcangh ran le kut rang tukmi a si i, mah pumpak aa venghei tuk lomi ‘open’ taktak in aa thong tawnmi a si. An i celhning dan style aa lawh bak lomi nih hin ruahnak lengpi in an i thongh zoh a dawhter khawhte menmi a si.

Ricky Hatton Zumhning: British boksing lar minthang le sinak sang bik pawl a phanmi Ricky Hatton nih hin Mayweather le Pacquiao hi aa rak thonghpi veve cangmi hna an si.

Kum 2007 ah Las Vegas khualipi ah Mayweather leti’n an rak i thongh tan i round 10-nak ah a sungmi Ricky Hatton nih, “Pacquiao thongh a chim cawnpiaktu Freddie Roach hi Mayweather dirhmun ṭha tein a hngalfiang dihtu pa a si. Mayweather nih a rak celhpi cangmi hna Oscar de la Hoya thongh a chim cawnpiaktu hlun a si ruangah amah tluk in Mayweather dirhmun sining a hngalfiangtu hi an um lo. Tikah, hihi Pacquiao caah caanṭha caanrem (chance) taktak a si kho,” a ti.

Pacquiao he an i thongh lioah round hninhnak bakah Pacman nih a hrilh ‘knock out’ mi Ricky Hatton nih cun, “Mayweather tei dingah cun kut le ke cawlcangh a rang taktak mi si a herh i, mah cu bantuk minung cu Pacquiao hi a si. Asinain, an mithongh fahning dan le thiamning dan cuai hunthlai chun tikah cun Mayweather hi a cakte men lai ti ka zumh i, Pacquiao hi cak deuh sehlaw ti hi cu ka duh deuh fawn,” tiah a chim.

Hatton nih, “Mayweather hi cu aphi (result) ṭha tein a hmuh i, phaisa a hlawhphawt ahcun aa lungtling dimdiam tawn. Pacman belte hi bantuk minung a si lo, uarṭanhtu (fan) pawl caah aa thongmi a si i, amah a uaṭtanhtu pawl kha biapi ngai ah chiah a thiam hringhranmi zong a si. Hi boksing thonghthiam pahnih hna hi caan khatkhat ahcun boksing vawlei in hin an i dinh caan a phante lai i; mah cu tik ahcun Mayweather kong nakin Pacquiao kong hi chimceih a hlawh deuhte lai. Mayweather hi cu boksing aa ngol/ dinh rualrual in vawleicungpi nih an philh colhte ding minung khi a si,” a ti. 

(Theihternak: Hi a cunglei thawngpang bantuk hi vanglaini thawngcabu 29 April 2015 chuak chung ta kha aa tlak ning in hun leh chin mi asi.)