Mayweather Tei Dingin Pacquiao Aa Zumhning A Hnget Tuk

Cawnnithum thawk khan Las Vegas khualipi cu boksing thonghthiam pahnih thongh lai dingmi thawng lawngte nih a zelh i a leng cang ko. Zeica’htiah, vawleicung boksing thonghthiam Floyd Mayweather le Manny Pacquiao thongh lai ding caan aa naih cang tikah, Cawnnithum zan ahkhan an i thonghnak ding hmun khualipi cu boksing thonghthiam minthang pahnih an phanh ruangah a si.

Pacquiao Nih A Ngamh Ning A Tituk

Amah a uarṭanhtu (fans) pawl hmai ah Pacman cu a biachim pawr ngai, nan thinphang hrimhrim hlah u tiah amah uarṭanhtu pawl sinah biatawi chimnak a ngei. Kum 36 upa Filipino boksing thonghthiam nih, “Nan thingphang hlah ngat u, aa thong ding cu nanmah siloin keimah dah kaw ka si. Atu ahhin kaa ngaihning hi a lawmmam tuk lengah ka tei hrimhrim lai tiah 100% kai zum. Atu tan hi Mayweather nih sung mithmai le dirhmun a ton hmasa bik caan ding cu a si lai,” tiah ṭihphannak a ngeihlonak kong a uarṭanhtu pawl hmai ah bia pawr ngai in a chim.

Mi tampi nih a sung ding dirhmun ah a kong an ceihmi kong he pehtlai in Pacman nih, “Boksing kaa thongh lai fatinte a sung ding dirhmun ah ruahmi ka si tawn zungzal, natein kei cu hihi nih hin lawmhnak thazaang a ka pek ṭheo. Zeitin an kan chimceih timi kongkau ah a buai huammi ka si bal ve lo,” a ti.

Mayweather zong nih a ngamhning a mak, “Kaa timhlamhning a ṭha deuh i, boksing thongthiam ṭha deuh zong ka si rih. Pacman hi duh paoh ummi rak si hlah se law atu nakin boksing thonghthiam ṭha dirhmun a phan lai. Duh paoh um bu in voi tamtak teinak a rak hmuh len ve i, hiti a duhpaoh um ruangah ‘knock out’ zong a rak i huah len fawn. Juan Manuel Marquez kha kan pahnih in kan rak thonghpi veve cang va si kaw, keinih olzaang tak i ka tei lioah, anih tu cu ‘knock out’ a rak si diam kha teh,” a ti.

Pacquiao Thongh Chimtu Roach A Bia Pawr Ngai

Freddie Roach nihhin Oscar De La Hoya a rak chimh lio hrawng ahkhan Mayweather hi an rak theihhngalh cangmi a si i, voi 47 aa thonghnak ah amah he aa khingkhang thonghthiam a hril dihtu hi Roach nakin a sining dirhmun a hngalfiangtu an um lai lo dah.

Pacquiao thongh chimtu Roach nih, “Hi boksing thonghnak ahhin timhlamhnak kan ngeihning hi a ṭha hringhran teitu kan si hrimhrim lai. Kan ‘knock out’ khawh a si lebang ahcun lawmh a um taktak hnga asinain Manny hi mi thonghfak phun a si lem lo tikah hin, cu belte cu a har deuh men lai dah. Kan i hngahnak bik belte hi cu a cawlcangh le thonghlei a kut rannak hi a si i, counter attack ah aa hngatchan tawntu Mayweather lakah i phenhei ning dan zong hi kan hngalh,” tiah Mayweather a hngalhfiangtu a sinak kong he pehtlai in a bia pawr ngai ve.

Roach nih Pacman cu a fak ngai, “Kum 14 chungte bak Pacquiao leti’n hin kan rak i zuldawi cang va si kaw, atutan thluk in a ṭhat hi dah ka hngalh kun lo. Vawleicungpi nih hi thonghpuai hi an zoh lai timi a hngalh fian ruangah hin, teitu dirhmun ah ka dir hrimhrim a herh ti hi aa fiang tuk,” a ti.

Kum 38 upa Mayweather nih Freddie Roach biachimmi hi lehnak a tuah colh ve, “Ka thonghpi cangmi pawl hna nih timhlamhnak an ngeih zungzal ṭheomi cu khulvai rang taktak in cawlcangh i thongh thongh len cu a si. Natein, hi an i timhlamhnak vialte nih hin kum 19 chung voi 47 kaa thongh cianak ah zeihmanh sullam a ngeihter kho an um bal lo,” tiah bia pawr taktak in a phomh ve.

American Mayweather nih aa thawh ṭhan i, “An i timhlamhnak a ṭhat thlu le thlu lo cu kan i thonghte tikah kan hngalh lai,” tiah a bia pawr tak khin a ti rih.

Mayweather Nih Tei Lai Ti A Zumtu Marquez

Mexican boksing thonghthiam minthang chim paoh ah an telh zungzal tawnmi Juan Manuel Marquez hi Mayweather le Pacquiao a rak thonghpi veve cangmi a si.

Voi li Pacquiao thonghpi cangmi Marquez nih, “Pacman nih hin tei a duh asi ahcun Mayweather hi pressure thazaang fak taktak in a pek peng a hau i, a khulvai rannak hmangthiam bu tein voi tampi fak taktak in a thongh a haute lai,” a ti. Marquez nihhin Pacquiao hi voihnih tiang a rak tei lo i, voi khat an rak i tluk i, an i thongh hmanung bik kum 2012 ahkhan ruahlo taktak in Pacman hi a rak ‘knock out’.

Mayweather teicia Marquez nih, “Mayweather nih hin cawltalnak lawngkaang i siamrem hi a thiam taktak i, a counter-punch hi i ton fuhsual ahcun a fahning a ti tuk hringhran. Thonghning Style phun dangte a ngeihmi ruangah hin Mayweather mi teitu a si tawnnak cu a si ṭheo,” tiah Mayweather lei ṭanh in bia a chim.

British boksing thiam minthang Ricky Hatton nih Mayweather nih a teite ko lai tiah a zumhning a rak chim bal ve cang. Phaisa cawi in i thapnak hmun lei zongah Pacquiao nakin Mayweather teitu a si lai tiah a zumtu an tam deuh.

An I Thongh Ding Ni Le Caan

Boksing minthang pahnih hna hi MGM Grand, Las Vegas ah an i thong lai, hi an i thongh ni le caan cu; May ni 2 zan ah a si. Zanlei Sml. 2:00-ah gate on hram thawk a si lai i, Sml. 3:00-ah hin boksing thonghthiam dangdang pawl an i thong hmasa lai. Cu aa thong hmasa ding pawl hna cu;

> WBC Super Bantamweight World Champion Leo "El Terremoto" Santa Cruz (29-0-1, 17 KOs) vs. Jose Cayetano (17-3, 8 KOs)

> WBO Featherweight Champion Vasyl Lomachenko (3-1, 1 KO) vs. Gamalier Rodriguez (25-2-3, 17 KOs)

> Chris "Sweet" Pearson (11-0, 9 KOs) vs. Said El Harrak (12-2, 7 KOs)

> Jesse Hart (16-0, 13 KOs) vs. Mike Jimenez (17-0, 11 KOs)

> Andrew "The Beast" Tabiti (9-0, 9 KOs) vs. Anthony Caputo Smith (15-4, 10 KOs)

> Brad Solomon (24-0, 9 KOs) vs. Adrian Rene Granados (13-3, 9 KOs)

Hi aa thong ding midang pawl an i thongh dih ahhin Mayweather le Pacquiao hna hi an i thong ve lai i, zan Sml. 8:00-ah an i thong kho manh lai tiah ruah a si. Atu an i thongh ding caan tarlanghmi hi local time in a si i, India suimilam ṭem in cun Pathianni (zarhteni) zinglei Sml. 9:30-ah a si lai.#

(Theihternak: A cunglei ca hi nifatin thawngcabu vanglaini (30 april) chuak chung kha aa tlak ningin hun char chin mi a si.)