Vawleipi Nih Aa Ngaih Tukmi Mayweather Vs Pacquiao

Pacman vs Money

India suimilam ṭem in cun Zarhpini May 3 zing ahkhin vawleipi nih a hngahhlang taktakmi Floyd Mayweather Jr le Manny Pacquiao cu vawleipi nih hrihrual kulh chungah an i tongh len lio an zoh cang hna lai. 

Hi boksing thiam pahnih hna an thawngpang cu hmunzakip ah a tlirh in aa tlirh ko cang.

Boksing vawlei a cawlcanghnak ah voi 47 aa rak thong i voikhat hmanh a sung bal lomi Mayweather nih World Heavyweight champion hlun Rocky Marciano record a phanh deng chin lengmang tinak a hung si. Marciano hi 1950’s lioah boksing vawlei a cawlcanghnak ah voi 49 aa thong i, voikhat hmanh a sung bal rih lomi a si.

Ai Ti Sining Sang Kho An Si Veve Lo

Boksing thiam minthang pahnih hna hi an kum a upa cang i, tu nai chung an i thonghning zoh tikah a hlan an i thongh tawnning he cuaichun ahcun an tla deuh ngai cang ti lang. Kum 36 upa Pacman hi aa rak thongh hmanung bik voi nga chungah voihnih a rak sung. Tikah, Mayweather ‘knock out’ dingah hin cun aa rak thongh hmanung bik voi hra hun dawi tikah voikhatte lawng mi a rak hril ‘knock out’ khomi nih hin teimak chuah in aa zuam taktak cu a hau lai. Pacman nih a hrilh ‘knock out’ khawh lo ahcun, ralring tein aa thong lengmang tawntu Mayweather nih a teite hrim lai tiah a zumtu an tam ngang.

Mayweather zong aa ti san ngam deuhnak a um ve hlei lo. Kum ruk chung ahkhan minung pakhatte lawng a rak hrilh ‘knock out’. Hmanung bik aa thongh tan i, a rak knock out-mi Victor Ortiz hmanh kha an hun i thongh hnik boksing thonghnak kuthruk ‘glove’ an hun i tonghpiak hrulhhralh lioah, aa relhlo kar bak ah ril ko in a thonghmi a si i, mi soisel aa huah taktak.

Boksing Thiam Pawl Nih An Hmuhning Hna

Vawleicung boksing thiam minthang pahnih Ricky Hatton le Manuel Marquez hna hi Pacquiao lei an ṭang deuh ko natein, Mayweather nih a teite lai tiah an ti veve ai! Oscar De La Hoya nih a hei tuaktan ve tikah aa dang hlei lo, hi ṭhiamṭhiam hi a hmuhning a si ve. 

‘The Golden Boy’ tiah min an bunhphahmi De La Hoya nih, “Boksing thiam pahnih an i thong lai tiah thawng ka rak theihka ahkhan cun Mayweather teitu a si deuh te lai tiah ruahnak ka ngeih colh. Asinain, atu hnu Pacquiao aa timhlamh le cawlcanghning ka hun hmuh tikah hin, Mayweather hi aa venning a buaibai ngaite lai. Ka hmuhning ahcun Mayweather nih a tei lai ti hi a si i, ka thinlung tu cu Pacquiao lei ahhin aa fuu deuh ve,” a ti.

Weight division pali ah champion a rak cotu Miguel Cotto nih, “I thongh zohnuam le hmuhnuam taktak an si lai pinah, an i rilh taktak fawn lai ti ka zumh. Pacquiao chimtu Freddie Roach hi ṭuanpi hawi ṭhing a rak sinak ruangah hin a thiamnak le thilti khawhnak pahrang kha ka theihmi a si i, Floyd a dernak zawn hmu kho dingin Manny hi a bawmhchanh khawh taktak lai hi ka zumh tuk. Keinih cun Filipino Boxer nih hin a tei lai tiah zumhnak ka ngei deuh ko,” tiah Roach hi Pacquiao caah mi ṭangkai tak a si lainak kong a chim.

American boksing minlar Shane Mosley nih cun, “Mayweather hi teitu dingah a dirhmun a ṭha deuh. Counter punch ah aa hngatmi a si i, mi a khen tik hna ah a fahning a ti tuk. Pacman belte hi a kut lekzo a ran pinah, a cawlcangh khulvai hi a rang taktakmi a si i, aa phenghei tuk lemlomi open tak in aa thongmi a si ruangah hin mah hi zawnte ah Mayweather nih hin a kuat remcang lak aa thiam tuk lai dah ti hi ka zumhning a si,” a ti.

Tutan Ah Vawleicung Record Zeimaw An Khuhchilh Temen

Vawleipi nih aa hngalhhlang taktakmi zong cu a si i, Mayweather le Pacquiao tutan an i thonghnak nih hin vawleicung boksing record cazin zeimaw cu a hnawh len temen.

Kum 2013 lio Saul Alvarez le Mayweather an rak i thongh ṭum ahkhan gate fee lawng bak in phaisa an rak hui lengluangmi zat kha dollar million 20 a si i, gate fee in phaisa tam bik record tlaitu a si. Natein, tutan Mayweather le Pacquiao an i thongh dingmi nih hin a khuhchilh dingah ruah a si i, dollar million 70 Gate fee lawng bak in an hmuh lai tiah ruahdamh chung a si.

Pay-per-vies purchase bak in phaisa rak ruh tam bik ṭum kha cu kum 2007 lio i, Mayweather le Oscar De La Hoya hna pahnih an rak i thongh ah khan a si. Dollar million 2.48 an hmuhmi dihlak a si i, tutan ahhin a tlawm bik ah dollar million 3 hmuh dingah ruahdamh chung a si ve.

Forbes nih a dothlat i, a cuaichun ning ahcun Mayweather le Alvarez an rak i thongh ṭum kha Mayweather nih dollar million 70 a rak hlawhchuah i, voikhat i thonghnak in amah nak phaisa rut kho an um lo. Amah record thotho kha amah lila Mayweather nih hin a khuhchilh khawh temen i, boksing thiam minthang pahnih hna nih hin dollar million 100 lengkai veve hmuh temen dawh an si.

Floyd Mayweather

Age: 38

Nickname: Money

Stance: Orthodox

Height: 5ft 8ins

Reach: 72ins

Record: 47-0, 26 knockouts

Rounds boxed: 363

World title fights: 24

Birthplace: Nevada, Las Vegas

Nationality: USA

Date of birth: 24 February 1977

Career earnings: $420 million 

Manny Pacquiao

Age: 36

Nickname: Pacman

Stance: Southpaw

Height: 5ft 6ins

Reach: 67ins

Record: 57 wins, 5 defeats, 2 draws. 38 knockouts.

Rounds boxed: 407

World title fights: 19

Birthplace: Kibawe, Bukidnon

Nationality: Philippines

Date of birth: 17 December 1978

Career earnings: $340 million

(Theihternak: A cunglei ca hi vanglaini (01 May) nifatin thawngcabu chuakmi kha aa tlak ning in hun leh chin mi a si.)