China Nih Mitmunang An Serchuah Khawh Cang

People’s Daily nih an tarlanghning dan ahcun China nih mit a rawkmi pawl caah hman khawh ding tlak a thahnem dingmi mitmunang (cornea) an serchuah khawh cang tiah an thanh. Hi an sermi thil hi khua a hmu lomi mitmunang a rawkmi pawl hman ding caah an sermi a si.  Atu tan hi vawlei cungah a pakhatnak bik mitmunang a serchuak khotu hmasa bik an si tiah a ti.

Atu tan mitmunang an serchuahmi nih hin vawleicung mitcaw khuahmu loin a ummi, minung tampi khuahmuh ṭhannak a pek cang hna lai. Hi thil hi vawleicung science lei nih an serchuahmi ahcun a ropui taktakmi thil cu a si hrim ko.

Hi mitmunang an serchuah tharmi hi a rauh hlan ah mitcaw khuahmu lo caah an zuarzamh khawh colh cang lai. Kan hnung April thla dongh ahkhan National Food and Drug Administration lei nih hi thil zuarzamh khawhnak ding caah nawl an hal hna ning bantuk tein an pompiak khawh cang hna.

WHO phu lei nih an tarlanghning ah vawleicung ahhin mitmunang ṭhatlo ruangah a mitcawmi hi an tam bik a ti. A bik in China ram ahhin hi bantuk mitmunang ṭhatlo ruangah mitcaw khuahmu lomi million 4 renglo an um i, kum fatin minung ting khat lengmang nih atu bantuk harsatnak hi an tong tawn tiah theih a si.

Mitmunang (cornea) thlenpiak lio hmanthlak

Mitmunang hi minung khua kan hmuh khawhnak caah a biapi bikmi a si. Mit an i hlu ti tehna hi kan theih lengmang tawn va si kaw, khi ti mit an i hlut tehna ahkhin an mitmu ningpi khin an la hna lo. Zeitindah mit an hlut tikah an lak hna ning a si tiah cun, a cunglei hmanthlak kan hmuh bantuk khin a hlutu hna mitmunang (cornea) telawng kha an rak lak tawnmi hna cu a si.#