Vawlei Cungah Millionaire Tam Bik An Umnak Khualipi Pawl

Monaco

Vawleicung ahhin minung tam lei in tuak ah millionaire tamnak bik umnak khualipi hi khoika dah a si hnga? New York na zumh khawh men sina’n a si lo. Singapore zong a si hlei lo.

Dubai maw, Abu Dhabi maw hi hna pawl zong hi an si hlei lo. Europe i principality, mahte in khuakhan lairelnak khualipi, Monaco hi a rak si.


Monaco hi minung thongli hrawng umnak hmun an si ko natein, millionaire pawl an tam ngaite. Hi khualipi chungah a ummi minung pahra chungah pathum paoh cu millionaire an si dih! Khualipi rum taktak an si ti theihhngalh khawh colh a si.

Hi atu bangin millionaire pawl an tamnak a ruang cu, tangka chiahnak Bank a ṭhat ruang tehna, a hmunhma nih a pek hrimhrim ruang zongah a si ve. Monaco ah minung khuasami zatuak 29.21 cu Millionaire an si.

Switzerland khualipi lian Zurich hi millionaire an tam biknak a vun changtu pahnihnak a si. Hi khualipi municipality chung lawng ahhin minung tingli hrawng khua an sa. Zurich hi Switzerland ram i an khualipi lian bik zong a si i, minung khuasami zatuak 27.43 cu millionaire an si.

Zurich

Switzerland ramchung i, French holh hmannak khualipi, Geneva hi millionaire an tamnak bik a cangtu pathumnak a si. Geneva municipality chung ahhin minung ting hnih an um i, minung a ummi chungin zatuak 17.93 cu millionaire an si.

New York hi a minung tam lei lawng rel ahcun millionaire tamnak bik a si ko natein, zatuak in hun tah tikah cun palinak lawngah a dir. Minung million 10 tluk hrawng umnak khualipi chungah hin zatuak 4.63 hi millionaire an si.

Germany khualipi lian pawl, Frankfurt hi millionaire tam bik a ngeitu panganak a tling kho ve. Hi khua i, minung zatuak 3.88 hna hi millionaire an si. Hi khuapi hi bank leiah cun vawleicung huap in min lar le minthang a si. Kum 2010 ahkhan Frankfurt ah National Bank hi 63 a um i, International Bank hi 153 leng a um ve. Germany ram Bank lian bibik, Deutsche Bank, Commerzbank, DZ le KfW pawl an hmunlipi a si.

London ahhin minung zatuak 3.39 hi millionaire an si ve i, Sweden khualipi Stockholm hi pasarihnak ah a dir kho ve. Asia ram khualipi minthang Singapore hi pariatnak a si i, Amsterdam cu pakuanak, cun Italian khualipi lar Florence cu pahranak ah a lang kho ve fawn.

Millionaire tam bik a ngeitu khualipi tiah khuapi 20 an thimmi hna chungah hin vawleicung chaklei kam ram deuh pawl hi an lang hna i, Asia ram ahcun Singapore lengah Hong Kong le Doha hna an lang. North America ah khualipi pali an lang i, Canada khualipi lian Toronto zong a lang kho ve. Hi pinlei a langmi pawl hna cu Europe khualipi deuh ngawt an si cang hna.#